ବହୁଚର୍ଚ୍ଚିତ ପୋଲିସ SI ପରୀକ୍ଷା କେଳେଙ୍କାରୀ ମାମଲାରେ ସିବିଆଇର ଚାର୍ଜସିଟରେ ଖୋଲିଛି ସାଂଘାତିକ ଷଡ଼ଯନ୍ତ୍ରର ଗୋଟିଏ ପରେ ଗୋଟିଏ ଫର୍ଦ୍ଦ । ୟା ଭିତରେ ଦୀଘା ମଡ୍ୟୁଲର ହୋଇଛି ଖୁଲାସା । ଗିରଫ ବିରଞ୍ଚି ନାୟକ ଓ ସହଯୋଗୀ ଅରବିନ୍ଦ ଦାସ ମାର୍ଚ୍ଚ 8 ଓ 9 ପରୀକ୍ଷା ପାଇଁ ରଚିଥିଲେ ପୂରା ଷଡ଼ଯନ୍ତ୍ର । ଚାକିରି ପିଛା ହୋଇଥିଲା ୨୫ ଲକ୍ଷ ଟଙ୍କାର ଡିଲ୍ । ପୂରା ନେଟଓ୍ବାର୍କ ପଛରେ ମୁନା ମହାନ୍ତି, ଶଙ୍କର ପୃଷ୍ଟି, ତ୍ରିନାଥ ଜେନା, ଗୋବିନ୍ଦ ତ୍ରିପାଠୀଙ୍କର କ'ଣ ଥିଲା ଭୂମିକା ତା'ର ହୋଇଛି ପର୍ଦ୍ଦାଫାସ୍ ।

ଏସଆଇ କେଳେଙ୍କାରୀରେ ଦୀଘା ମଡ୍ୟୁଲର ବଡ଼ ଖୁଲାସା । ଅର୍ଗସ ହାତରେ ଲାଗିଲା ଦସ୍ତାବିଜ୍ । ଇଏ ହେଉଛି ସେହି ହୋଟେଲ ଯେଉଁଠି ପରୀକ୍ଷାର୍ଥୀମାନେ ରହିଥିଲେ । ହୋଟେଲ ଆଗରେ ଅର୍ଗସ ଟିମ୍ । ସୂଚନା ଅନୁସାରେ ଏସଆଇ କେଳେଙ୍କାରୀରରେ ଗିରଫ ବିରଞ୍ଚି ନାୟକ ଓ ତା ସହଯୋଗୀ ଅରବିନ୍ଦ ଦାସ ମାର୍ଚ୍ଚ ୮ ଓ ୯ ପରୀକ୍ଷା ପାଇଁ ପୂରା ଷଡ଼ଯନ୍ତ୍ର ରଚିଥିଲେ । ୩ରୁ ୫ ତାରିଖ ଦୁଇ ଦିନ ପୂରା ଆଶ୍ରୟ ଲକଜରୀ ହୋଟେଲକୁ ବୁକ୍ କରିଥିଲା ଅରବିନ୍ଦ । ସେଠାରେ ପିଲାଙ୍କୁ ରଖି ସୁନ୍ଦରବନ ନେଇଥିଲେ । ମାର୍ଚ୍ଚ ମାସର ପରୀକ୍ଷା ବାତିଲ ହୋଇଥିଲା । ପରେ ଅକ୍ଟୋବରରେ ବି ବିରଞ୍ଚି ଓ ଅରବିନ୍ଦ ଆଶ୍ରୟ ଲକଜରି ହୋଟେଲ୍ ବୁକ୍ କରିବା ପାଇଁ ଉଦ୍ୟମ କରିଥିଲେ । ହେଲେ ପର୍ଯ୍ୟଟକଙ୍କ ଭିଡ଼ ଯୋଗୁଁ ରୁମ୍ ମିଳିନଥିଲା । ପାଖରେ ଥିବା ମନ୍ଦାରମଣି ଭିକ୍ଟୋରିଆ ହୋଟେଲ୍ ବୁକ୍ ହୋଇଥିଲା । ୧୫୦ ଛାତ୍ରଙ୍କ ପାଇଁ ହୋଇଥିଲା ହୋଟେଲର ହଲ୍ ବୁକ୍ । ସୂଚନା ପାଇଁ ସିବିଆଇର ଟିମ୍ ହୋଟେଲରେ ଯାଞ୍ଚ କରିଛି । କାଗଜ ପତ୍ର ଜବତ କରିଛି । ସବୁ ଏକ୍ସକ୍ସୁସିଭ୍ ଦସ୍ତାବିଜ୍ ଲାଗିଛି ଅର୍ଗସ ହାତରେ ।

ସିବିଆଇ ଚାର୍ଜସିଟ ଅନୁସାରେ ମାର୍ଚ୍ଚ ମାସରେ ଅରବିନ୍ଦ ଦାସ ୧୦୦ ଜଣ ଚାକିରୀ ଆଶାୟୀଙ୍କୁ ଯୋଗାଡ କରିଥିଲା ଦୀଘା ନେବା ପାଇଁ । ଆଉ ବିରଞ୍ଚି ୮୪ ଜଣଙ୍କୁ ଟାର୍ଗେଟ କରିଥିଲା । ସେଥିମଧ୍ୟରୁ ୪୫ ଜଣଙ୍କୁ ଦୀଘା ନେଇଥିଲା । ବାକି ୩୯ ଜଣଙ୍କୁ ଭୁବନେଶ୍ବରରେ ହୋଟେଲ ଅପୁଲେନ୍ସରେ ରଖାଯାଇଥିଲା । ସିବିଆଇ ଖୋଳତାଡ ସମୟରେ ଅରବିନ୍ଦର ନାଲି ଡାଏରୀ ଖୋଲିଥିଲା ପୂରା ଘଟଣା ପଛର ରହସ୍ୟ ।

ଏହିପରି ମୋଟ ୧୮୪ ଜଣଙ୍କୁ ନେଇ ଦୀଘା ମଡ୍ୟୁଲର ଖେଳ । ୨ ଲକ୍ଷ ଅଗ୍ରୀମ ଆକାରରେ ନେଇଥିଲେ । ବାକି ଚାକିରି ହେବା ପରେ ୨୩ ଲକ୍ଷ ନେଇଥାନ୍ତେ । ଏହିପରି ମୋଟ ୨୫ ଲକ୍ଷ ଟଙ୍କାର ଡିଲ୍‌ । କେବଳ ମାର୍ଚ୍ଚ ମାସରେ ଜଣଙ୍କା ପିଛା ୨ ଲକ୍ଷ ହିସାବ କରାଯାଏ ତେବେ ୧୮୪ ଜଣ ଆଶାୟୀଙ୍କ ଠାରୁ ନେଇଥିଲେ ୩ କୋଟି ୬୮ ଲକ୍ଷ । ଏହାବାଦ ଚନ୍ଦକା ରିସର୍ଟରେ ମୁନା ମହାନ୍ତି ଏବଂ ଲୋକନାଥ ସାହୁ ୧୫୦ ଜଣ ଚାକିରୀ ଆଶାୟୀଙ୍କୁ ରଖିଥିଲେ । ସେଠାରେ ମଧ୍ୟ ପ୍ରଶ୍ନପତ୍ର ଦେଖାଯାଇଥିଲା । ଏଠି ବି ସମାନ ଡିଲ୍‌ ।

ଗିରଫ ଦଲାଲମାନେ ମାଷ୍ଟରମାଇଣ୍ଡ ମୁନା ମହାନ୍ତି ନିର୍ଦ୍ଦେଶରେ କାମ କରୁଥିଲେ । ମୁନାର ଡ୍ରାଇଭର ଲୋକନାଥ ସାହୁ, ପ୍ରିୟଦର୍ଶୀନି ସାମଲ, ଶ୍ରୀକାନ୍ତ ମହାରଣା, ଟି ଅଭିମନ୍ୟୁ ଦୋରା, ବିଶ୍ବରଂଜନ ବେହେରା, କନେଷ୍ଟବଳ ଅର୍ଜୁନ ନାୟକ ଏମାନେ ଚାକିରୀ ଆଶାୟୀ ଯୋଗାଡ କରୁଥିଲେ ମୁନା ଇସାରାରେ । ଖାଲି ସେତିକି ନୁହେଁ ସେମାନଙ୍କୁ ମୋଟିଭେଟ୍‌ ମଧ୍ୟ କରୁଥିଲେ । ମୋଟ ୯୩୩ ଏସଆଇ ପଦବୀ ଥିଲା । ଏହାର ୨୦ ପ୍ରତିଶତ ପଦରେ ଚାକିରି ଦେବାକୁ ହୋଇଥିଲା ପୂରା ଗେମ୍‌ ପ୍ଲାନ । ମୁନା ମହାନ୍ତି, ଶଙ୍କର ପୃଷ୍ଟି, ତ୍ରିନାଥ ଜେନା ପୁରା ନେଟଓ୍ବାର୍କକୁ ଅପରେଟ କରୁଥିଲେ । ଏବେ ବଡ଼ ପ୍ରଶ୍ନ, ପୂରା କେଳେଙ୍କାରୀ ପଛରେ କିଏ ସେ ମାଷ୍ଟରମାଇଣ୍ଡ ? ପୂର୍ବ ସରକାରରେ ୧୦୦୦ କୋଟି ଟଙ୍କା ଡିଲ୍‌ ପଛରେ କାହାର ରହିଛି ହାତ ?