Odisha Flood Snakebite / ବନ୍ୟା ଭିତରେ ସାପ ଭୟ, ୨ ମାସରେ ସାପ କାମୁଡାର ଶିକାର ହେଲେଣି ୨୪୨ ଜଣ

ବନ୍ୟା ଭିତରେ ଘାରିଛି ସାପ ଭୟ । ଗତ କିଛି ଦିନ ଭିତରେ ସାପ କାମୁଡାରେ ୧୦ ଜଣଙ୍କ ମୃତ୍ୟୁ ହୋଇଛି । ଯଦି ୨ ମାସର ହିସାବ ଦେଖାଯାଏ ତେବେ ସାପ ଚୋଟର ଶିକାର ହେଲେଣି ୨୪୨ ଜଣ । ଗୁରୁତ୍ବପୂର୍ଣ୍ଣ ଦିଗଟି ହେଲା ଟିକିଏ ଅସାବଧାନତା କାରଣରୁ ଲୋକଙ୍କ ମୃତ୍ୟୁ ହେଉଛି । ଏବେ ଲୋକଙ୍କୁ ସତର୍କ କରି ସାପ ଧରୁଛି ସ୍ନେକ ହେଲ୍ପଲାଇନ ।

ମାଡ଼ି ଆସିଛି ଉଛୁଳା ନଦୀ ଜଳ । ଆଉ ନଦୀ ଜଳରେ ଭାସି ଆସୁଛନ୍ତି ମାଳ ମାଳ ସାପ । ଘରେ ପଶୁଛନ୍ତି, ଶୋଇଥିବା ବେଳେ ଲୋକଙ୍କୁ କାମୁଡୁଛନ୍ତି । ଯାଜପୁରର ଦଶରଥପୁରରେ ଚାରି ଆଡ଼େ ମାଳ ମାଳ ବିଷଧର ସାପ । ନାଗ, ରଣା, ଗୋଖର, ତମ୍ପ ଭଳି ସାପ ଦେଖି ଲୋକ ବି ଭୟଭୀତ । ଲୋକଙ୍କୁ ସତର୍କ କରି ସାପ ଧରୁଛି ସ୍ନେକ ହେଲ୍ପ ଲାଇନ ।

ତେବେ ବନ୍ୟା ମଧ୍ୟରେ ସାପ କାମୁଡ଼ି ବୃଦ୍ଧି ପାଉଥିବା ବେଳେ ଏନେଇ ବିଶେଷଜ୍ଞ କିଛି ପରାମର୍ଶ ଦେଇଛନ୍ତି...
ବନ୍ୟା ପାଣି କମିବା ପରେ ରାତିରେ ଘରକୁ ଯାଆନ୍ତୁ ନାହିଁ
ପାଖରେ ସବୁ ବେଳେ ଲମ୍ବା ବାଡ଼ି ରଖନ୍ତୁ
ଘରକୁ ଫିନାଇଲ ଓ ବ୍ଲିଚିଙ୍ଗରେ ସଫା ରଖନ୍ତୁ
ସାପକୁ ବାଡ଼େଇଲେ ଦୂରରେ ଫିଙ୍ଗନ୍ତୁ ନ ହେଲେ ନଦୀରେ ଭସେଇ ଦିଅନ୍ତୁ

ସରକାରୀ ତଥ୍ୟ କହୁଛି ଗତ ଦୁଇ ମାସରେ ବନ୍ୟା ପ୍ରପୀଡ଼ିତ ୮ ଜିଲ୍ଲାରୁ ୨୪୨ ସାପ କାମୁଡା ମାମଲା ସାମ୍ନାକୁ ଆସିଲାଣି । ସବୁଠୁ ଅଧିକ ଭଦ୍ରକରେ ୭୦ଟି, ଯାଜପୁରରେ ୫୭ଟି ଓ ଜଗତସିଂହପୁରରେ ୫୬ଟି ସାପ କାମୁଡା ମାମଲା ସାମ୍ନାକୁ ଆସିଛି । ଗତ କିଛି ଦିନରେ ସାପ କାମୁଡା ଯୋଗୁଁ ପ୍ରାୟ ୧୦ରୁ ଅଧିକ ଜୀବନ ଗଲାଣି । ଏଭଳି ସ୍ଥିତିରେ ସାମାନ୍ୟ ଅସାବଧାନତା ଆପଣଙ୍କ ଜୀବନ ନେଇ ପରେ । ସାପ କାମୁଡ଼ିଲେ ଗୁଣି ଗାରେଡ଼ି ନ କରି ତୁରନ୍ତ ହସ୍ପିଟାଲ ଯାଇ ଚିକିତ୍ସା କରିବାକୁ ସତର୍କ କରାଇଛନ୍ତି ସ୍ୱାସ୍ଥ୍ୟ ବିଶେଷଜ୍ଞ ।

ବିଧାନସଭା ତଥ୍ୟ କହୁଛି ୨୦୨୩ ରୁ ୨୦୨୫ ମଧ୍ୟରେ ୨୧୧୮ ଜଣଙ୍କ ସାପ କାମୁଡାରେ ମୃତ୍ୟୁ ହୋଇଛି । ସାପ କାମୁଡା ପାଇଁ ସରକାର ଏବେ ୪ ଲକ୍ଷ ଟଙ୍କା କ୍ଷତି ପୂରଣ ରାଶି ଦେଉଥିବା ବେଳେ ସୁପ୍ରିମ କୋର୍ଟଙ୍କ ନିର୍ଦ୍ଦେଶ ମୁତାବକ ୧୦ ଲକ୍ଷ ଟଙ୍କାକୁ ଏହି ରାଶି ବୃଦ୍ଧି କରିବାକୁ ଦାବି ଉଠିଛି ।