Deba Snana Purnima / ରତ୍ନ ସିଂହାସନରେ କାଲିଠୁ ପୂଜା ପାଇବେ ପଟି ଦିଅଁ; ଜ୍ଵରରେ ପଡ଼ି ଅଣସର ଘରେ ରହିବେ ଚତୁର୍ଦ୍ଧା ମୂରତି

ପୁରୀ: ପ୍ରତିଦିନ ରତ୍ନ ସିଂହାସନରେ ବିମ୍ବସ୍ନାନ କରୁଥିବା ମହାପ୍ରଭୁ ଆଜି ପବିତ୍ର ଦେବସ୍ନାନ ପୂର୍ଣ୍ଣିମାରେ ସ୍ନାନ ବେଦୀରେ କରିଛନ୍ତି ଦିବ୍ୟ ସ୍ନାନ ଲୀଳା । ମହାବାହୁଙ୍କର ଏହି ଦୁର୍ଲଭ ଲୀଳା ଦର୍ଶନ କରିବାକୁ ବଡ଼ଦାଣ୍ଡ ହୋଇଛି ଲୋକାରଣ୍ୟ । ଘୋଷଯାତ୍ରାର ଆଦ୍ୟପର୍ବ ଦେବସ୍ନାନ ପୂର୍ଣ୍ଣିମାରେ ଜନସମୁଦ୍ର ପାଲଟିଛି ପୁରୀ । ଲକ୍ଷାଧିକ ଭକ୍ତ ଓ ଶ୍ରଦ୍ଧାଳୁଙ୍କ ଗହଳି ।

ନିର୍ଦ୍ଧାରିତ ନୀତି ନିର୍ଘଣ୍ଟ ଅନୁଯାୟୀ ଭୋର ୫ଟା ୫ରେ ମଙ୍ଗଳାର୍ପଣ ଶେଷ ସହ ଆରମ୍ଭ ହୋଇଥିଲା ଦେବସ୍ନାନ ପୂର୍ଣ୍ଣିମାର ସ୍ଵତନ୍ତ୍ର ରୀତିନୀତି । ଭୋର ୫ଟା ୧୫ରେ ପହଣ୍ଡି ଆରମ୍ଭ ହୋଇଥିଲା । ଶ୍ରୀମନ୍ଦିର ରତ୍ନ ସିଂହାସନରୁ ଓହ୍ଲାଇ ଆସିଲେ ଚତୁର୍ଦ୍ଧା ମୂର୍ତ୍ତି । ଧାଡ଼ି ପହଣ୍ଡିରେ ପ୍ରଥମେ ଆସିଥିଲେ ଚକ୍ରରାଜ ସୁଦର୍ଶନ । ପରେ ପରେ ବଡ଼ଠାକୁର ମହାପ୍ରଭୁ ବଳଭଦ୍ର ଓ ଦେବୀ ସୁଭଦ୍ରାଙ୍କୁ ଅଣାଯାଇଥିଲା । ଶେଷରେ ଝୁଲି ଝୁଲି ସ୍ନାନ ବେଦୀକୁ ବିଜେ କରିଥିଲେ କାଳିଆ ସାଆନ୍ତ ।

ଏଥିସହ ପଢ଼ନ୍ତୁ: ମହାବାହୁଙ୍କୁ ସ୍ନାନବେଦୀରେ ଦର୍ଶନ କଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ 

ସକାଳ ୭ଟା ୨୫ରେ ଶେଷ ହୋଇଥିଲା ପହଣ୍ଡି । ବିଭିନ୍ନ ନୀତିକାନ୍ ପରେ ସେବାୟତମାନେ ଆଣିଥିବା ୧୦୮ ଗରା ସୁବାସିତ ଜଳରେ ମହାପ୍ରଭୁଙ୍କୁ ସ୍ନାନ କରାଯାଇଥିଲା । ଶ୍ରୀଜଗନ୍ନାଥଙ୍କୁ ୩୫ଗରା, ବଳଭଦ୍ରଙ୍କୁ ୩୩ଗରା, ଦେବୀ ସୁଭଦ୍ରାଙ୍କୁ ୨୨ଗରା ଏବଂ ଚକ୍ରରାଜ ସୁଦର୍ଶନଙ୍କୁ ୧୮ ଗରା ସୁବାସିତ ଜଳରେ ସ୍ନାନ କରାଯାଇଥିଲା ।

ମହାପ୍ରଭୁଙ୍କ ସ୍ନାନ ସରିବା ପରେ ତାମଯାନରେ ଆସି ପହଞ୍ଚିଥିଲେ ଶ୍ରୀଜିଉଙ୍କ ଆଦ୍ୟସେବକ ଗଜପତି ମହାରାଜ । ଅପରାହ୍ଣ ୩ଟା ସୁଦ୍ଧା ଛେରାପହଁରା କରାଯିବା ପରେ ପୁଷ୍ପାଳକ, ସିଂହାରୀ, ମେକାପ ସେବାୟତଙ୍କ ଦ୍ୱାରା ଶ୍ରୀଜିଉଙ୍କୁ ହାତୀ ବେଶରେ ସୁସଜ୍ଜିତ କରିଥିଲେ ସେବାୟତ ।

ଦୁର୍ଲଭ ହାତୀ ବେଶ ଦର୍ଶନ କରି କୃତ୍ୟ କୃତ୍ୟ ହୋଇଛନ୍ତି ଶ୍ରଦ୍ଧାଳୁ । ଆଖିରୁ ଝରିଛି ଖୁସିର ଲୁହ । ଭାବ ବିହ୍ଵଳ ହୋଇ ଭୁଲିଛନ୍ତି ସଂସାରର ସମସ୍ତ ଦୁଃଖ କଷ୍ଟ । ଘଣ୍ଟ ଘଣ୍ଟା ଆଉ ମୃଦଙ୍ଗର ମୂର୍ଚ୍ଛନା । ଜୟ ଜଗନ୍ନାଥ ଧ୍ବନି, ହରିବୋଲ ଓ ହୁଳହୁଳିରେ ପ୍ରକମ୍ପିତ ହେଉଛି ଶ୍ରୀକ୍ଷେତ୍ ।

ସ୍ନାନବେଦୀ ନିକଟରେ ମହାପ୍ରଭୁଙ୍କୁ ଦର୍ଶନ କରି ଓଡ଼ିଶାର ପ୍ରଗତି ଓ ଉନ୍ନତି ପାଇଁ ପ୍ରାର୍ଥନା କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ପୁରୀ ଯାଇ ମହାପ୍ରଭୁଙ୍କ ସ୍ନାନ ଲୀଳାର ପ୍ରତ୍ୟକ୍ଷ ଦର୍ଶନ କରିଛନ୍ତି । ମହାପ୍ରଭୁଙ୍କୁ ଦର୍ଶନ କରିବା ପରେ ଶ୍ରୀନଅର ଯାଇ ଗଜପତି ମହାରାଜ ଦିବ୍ୟସିଂହ ଦେବଙ୍କୁ ଭେଟିଥିଲେ ମୁଖ୍ୟମନ୍ତ୍ରୀ । ଏହାସହ ବଡ଼ଦାଣ୍ଡରେ ରଥଖଳାକୁ ଯାଇ ରୂପକାର ସେବାୟତଙ୍କ ସହ କଥା ହୋଇଥିଲେ ।

ଏଥିସହ ପଢ଼ନ୍ତୁ: ନା ଘଣ୍ଟଘଣ୍ଟା ବାଜିବ ନା ଶଙ୍ଖ ବାଜିବ: ଆଜିଠୁ ପୁରୀ ଜଗନ୍ନାଥ ମନ୍ଦିର ରହିବ ଶୂନଶାନ୍‌ 

ଭକ୍ତଙ୍କ ସୁରକ୍ଷା ପାଇଁ ୫୫୦ ଅଗ୍ନିଶମ କର୍ମଚାରୀ ଓ ୫୦ ସିଭିଲ ଡିଫେନ୍ସ ଯୁବକ ଯୁବତୀ ନିୟୋଜିତ ହୋଇଥିଲେ । ୮ଟି ସ୍ପେସିଆଲ ରେସ୍କ୍ୟୁ ଟିମ୍ ପ୍ରସ୍ତୁତ ରହିଥିବା ବେଳେ ଭିଡ଼ ଭିତରେ କୌଣସି ପ୍ରକାର ଅଘଟଣ ଏଡ଼ାଇବାକୁ ଅକ୍ସିଜେନ କଣ୍ଟେନର ସହ ପ୍ରସ୍ତୁତ ରହିଥିଲା ଅଗ୍ନିଶମ ବାହିନୀ ।

ସ୍ନାନ ମଣ୍ଡପରେ ଅତ୍ୟଧିକ ସ୍ନାନ ଯୋଗୁ ଆସନ୍ତାକାଲି ଠାରୁ ଜ୍ବରରେ ପୀଡ଼ିତ ହେବେ ଚତୁର୍ଦ୍ଧା ମୂରତି । ଅଣସର ଘରକୁ ବିଜେ କରିବା ସହ କାଲିଠୁ ଆରମ୍ଭ ହେବ ଶ୍ରୀଜିଉଙ୍କ ଗୁପ୍ତସେବା । ଏହି ସମୟରେ ଶ୍ରୀମନ୍ଦିରରେ ପୂଜା ପାଇବେ ପଟିଦିଅଁ, ଆଉ ଅଲାରନାଥରେ ଲାଗିବ ଭକ୍ତଙ୍କ ଭିଡ଼ ।