ବାଲିଅନ୍ତା ସୌମ୍ୟ ହତ୍ୟା ଘଟଣାରେ ପୋଷ୍ଟମର୍ଟମ ରିପୋର୍ଟରେ ସାମ୍ନାକୁ ଆସିଲା ଚାଞ୍ଚଲ୍ୟକର ତଥ୍ୟ । ମୃତକଙ୍କ ଶରୀରରେ ଥିଲା ୨୧ଟି ଆଘାତ ଚିହ୍ନ ... ମୁଣ୍ଡରୁ ପିଠି, ବେକରୁ ହାତ ପର୍ଯ୍ୟନ୍ତ ବିଭିନ୍ନ ସ୍ଥାନରେ ଥିଲା କ୍ଷତ ... ମସ୍ତିଷ୍କରେ ଭୟଙ୍କର ରକ୍ତସ୍ରାବ ଓ ଆଘାତରୁ ମୃତ୍ୟୁର କାରଣ ବୋଲି ସ୍ପଷ୍ଟ କରିଛନ୍ତି ଡାକ୍ତରୀ ଟିମ୍ । ଆଘାତ କଠିନ ଓ ଭାରୀ ବସ୍ତୁର ପ୍ରହାରରୁ ହୋଇଥିବା ରିପୋର୍ଟରେ ଉଲ୍ଲେଖ କରାଯାଇଛି...

ବାଲିଅନ୍ତାରେ ସୌମ୍ୟରଂଜନଙ୍କୁ ପିଟିପିଟି ହତ୍ୟା ଘଟଣାରେ ସାମ୍ନାକୁ ଆସିଛି ପୋଷ୍ଟମର୍ଟମ ରିପୋର୍ଟ । ବ୍ୟବଚ୍ଛେଦ ରିପୋର୍ଟରେ ରହିଛି ଚାଞ୍ଚଲ୍ୟକର ତଥ୍ୟ । ମୃତକଙ୍କ ଶରୀରରେ ମୋଟ ୨୧ଟି ବାହ୍ୟ ଆଘାତ ଚିହ୍ନ ରହିଛି। ମୁଣ୍ଡ, ମୁହଁ, ବେକ, ପିଠି, ହାତ ଓ ଗୋଡ଼ ସମେତ ଶରୀରର ବିଭିନ୍ନ ସ୍ଥାନରେ ଆଘାତ ଲାଗିଥିଲା ।

ଡାହାଣ ଆଖି ଉପରେ ଗଭୀର ଆଘାତ ଓ ପିଠିରେ ମଧ୍ୟ ଗଭୀର କ୍ଷତ ରହିଥିଲା । ଉଭୟ ହାତ ଉପରେ ଗଭୀର କ୍ଷତ ଚିହ୍ନ ମିଳିଛି । ଯାହା ବାନ୍ଧି ରଖାଯାଇଥିବା କିମ୍ବା ଜୋରକରି ଧରାଯାଇଥିବା ଯୋଗୁ ସୃଷ୍ଟି ହୋଇଛି । ବାମ ଆଖିରେ ରକ୍ତସ୍ରାବ ହୋଇଥିଲା । ସମ୍ପୂର୍ଣ୍ଣ ମୁଣ୍ଡରେ ରକ୍ତ ଜମାଟ ବାନ୍ଧିଥିଲା । ମସ୍ତିଷ୍କର ବିଭିନ୍ନ ଭାଗରେ ରକ୍ତସ୍ରାବ ହୋଇଥିଲା ।

ଏଥିସହ ପଢ଼ନ୍ତୁ: ଡାକ୍ତରୀ ଛାତ୍ରୀ ଚନ୍ଦ୍ରିକାଙ୍କ ମୃତଦେହ ମିଳିବା ଘଟଣାର ଆସିଲା ଶବ ବ୍ୟବଚ୍ଛେଦ ରିପୋର୍ଟ, ପାଣିରେ ବୁଡିବା ପରେ ଶ୍ୱାସରୁଦ୍ଧ ଯୋଗୁ ମୃତ୍ୟୁ ହୋଇଥିବା ସୂଚନା, ରିପୋର୍ଟ ଉପରେ ପରିବାରର ସନ୍ଦେହ

ବେକର ମାଂସପେଶୀରେ ମଧ୍ୟ ରକ୍ତସ୍ରାବ ହୋଇଥିଲା । ଉଭୟ ଫୁସଫୁସରେ ରକ୍ତ ଜମା ଅବସ୍ଥା ଥିଲା । ଡାକ୍ତରଙ୍କ ମତରେ ସମସ୍ତ ଆଘାତ ଜୀବିତ ଅବସ୍ଥାରେ ଲାଗିଥିଲା । କଠିନ ଓ ଭାରୀ ବସ୍ତୁର ଆଘାତରୁ ଏହି କ୍ଷତ ସୃଷ୍ଟି ହୋଇଥିବା ଡାକ୍ତର ମତ ଦେଇଛନ୍ତି ।

ମସ୍ତିଷ୍କର ରକ୍ତସ୍ରାବ ଓ ତାହାର ଜଟିଳତା ଯୋଗୁଁ ମୃତ୍ୟୁ ଘଟିଥିବା ପୋଷ୍ଟମର୍ଟମ ରିପୋର୍ଟରେ ଉଲ୍ଲେଖ ରହିଛି । ମୃତ୍ୟୁ ପରେ ପ୍ରାୟ ୧୨ରୁ ୨୪ ଘଣ୍ଟା ମଧ୍ୟରେ ପୋଷ୍ଟମର୍ଟମ କରାଯାଇଥିଲା । ବିଷାକ୍ତ ପଦାର୍ଥ କିମ୍ବା ନିଶାଦ୍ରବ୍ୟ ସେବନ ହୋଇଥିଲା କି ନାହିଁ, ତାହା ଜାଣିବା ପାଇଁ ଭିସେରା ଓ ଅନ୍ୟାନ୍ୟ ନମୁନା ସଂଗ୍ରହ କରାଯାଇଛି ।