ଅର୍ଗସ ବ୍ୟୁରୋ : ଅର୍ପଣ ରଥ ବୁଲିବା ସଂପୂର୍ଣ୍ଣ ଭାବେ ରାଜ୍ୟ ସରକାରଙ୍କ ବିଧିବଦ୍ଧ ଯୋଜନା ଥିଲା । ଏବଂ ଉଷୁନା ଚାଉଳରେ ମହାପ୍ରସାଦ ରାନ୍ଧି ମହାପାପ କରିଛନ୍ତି ରାଜ୍ୟ ସରକାର । ସେଥି ପାଇଁ ରାଜ୍ୟ ରାଜକୋଷରୁ କୋଟି କୋଟି ଟଙ୍କା ବ୍ୟୟବରାଦ କରାଯାଇଛି ଏବଂ ଏହି କାର୍ଯ୍ୟକ୍ରମକୁ ରାଜ୍ୟ ପ୍ରଶାସନ ପ୍ରତ୍ୟକ୍ଷ ଭାବେ ପରିଚାଳନା କରୁଛି । ତେଣୁ ଏ ସମସ୍ତ ବିଭ୍ରାଟ ପାଇଁ ଏକମାତ୍ର ରାଜ୍ୟ ସରକାର ହିଁ ଦାୟୀ । ଉକ୍ତ ସମ୍ବେଦନଶୀଳ ଘଟଣାରେ ହସ୍ତକ୍ଷେପ କରି ସଂପୃକ୍ତ ବ୍ୟକ୍ତିବିଶେଷଙ୍କ ବିରୁଦ୍ଧରେ ରାଜ୍ୟପାଳ ତୁରନ୍ତ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି ବିରୋଧୀ ଦଳର ନେତା ମୋହନ ମାଝୀ ।

ଶ୍ରୀ ମାଝୀ କହିଛନ୍ତି, ଭକ୍ତଙ୍କ ବିଶ୍ୱାସ ଉପରେ କୁଠାରାଘାତ କରିବା ବିଜେଡ଼ି ସରକାର ଅଭ୍ୟାସ । ପବିତ୍ର ଜଗନ୍ନାଥ ସଂସ୍କୃତି ଏବଂ ପରମ୍ପରାକୁ ଧୂଳିସାତ କରିବାରେ ମାହିର ରାଜ୍ୟ ସରକାର । ପରିକ୍ରମା ପ୍ରକଳ୍ପ ସମୟରେ ଶାସକ ବିଜୁ ଜନତା ଦଳ ତରଫରୁ ଯେଉଁଭଳି ଭାବରେ ‘ବାରମିଶା’ ଚାଉଳ ସଂଗ୍ରହ କରାଗଲା, ତାକୁ ନେଇ ଜଗନ୍ନାଥଭକ୍ତଙ୍କ ମନରେ ଅନେକ ପ୍ରଶ୍ନ ଓ ସନ୍ଦେହ ସୃଷ୍ଟି ହୋଇଥିଲା । ସେହିପରି ନୀତି ଅନୁଯାୟୀ ମନ୍ଦିରରେ ସଂଗୃହିତ ‘ବାରମିଶା’ ଚାଉଳରେ ମହାପ୍ରଭୁଙ୍କ ପାଖରେ ଭୋଗ ଲାଗିପାରିବ ନାହିଁ ଏବଂ ଏଥି ପାଇଁ କେବଳ ଗୋଟି ଚାଉଳ ବ୍ୟବହାର କରାଯାଏ ବୋଲି ଶ୍ରୀମନ୍ଦିର ସେବାୟତମାନେ କହିଥିଲେ । ତଥାପି ଏ ସମସ୍ତ ବିଷୟକୁ ଅଣଦେଖା କରି ସରକାରୀ ଦଳର ରାଜନୈତିକ ଚାପରେ ଉଷୁନା ଚାଉଳକୁ ମନ୍ଦିରରେ ଭୋଗ ଲଗାଯାଇ ହଜାର ହଜାର ବର୍ଷର ଶ୍ରୀମନ୍ଦିର ନୀତି ଓ ପରମ୍ପରାକୁ ନଷ୍ଟ କରିଛନ୍ତି ବୋଲି ଶ୍ରୀ ମାଝୀ କହିଛନ୍ତି ।

ସେହିପରି, ଅର୍ପଣ ଯାତ୍ରାବେଳେ ଦାନରେ ମିଳିଥିବା ଟଙ୍କା, ସୁନା, ରୁପା, ଗହଣା ଗଲା କୁଆଡେ ? ସରକାରୀ ଆୟୋଜନରେ କରାଯାଇଥିବା ଅର୍ପଣ ଯାତ୍ରାରେ ସଂଗୃହିତ ହୋଇଥିବା ଅର୍ଥ ପାଇଁ କାହିଁକି ରସିଦ୍ ବ୍ୟବସ୍ଥା କରାଗଲା ନାହିଁ ? ସେହିପରି ନିକଟ ଅତୀତରେ ଜଣେ ଗୋମାଂସ ଭକ୍ଷଣକାରୀଙ୍କୁ ଶ୍ରୀମନ୍ଦିରରେ ପ୍ରବେଶ କରାଇ ତାଙ୍କ ଦ୍ୱାରା ମହାପ୍ରସାଦର ସ୍ୱାଦକୁ ଜନପ୍ରିୟ କରାଯିବାର ଏକ ହୀନ ପ୍ରୟାସ ମଧ୍ୟ ପଦାକୁ ଆସିଛି । ଯାହା ଅଗଣିତ ଜଗନ୍ନାଥ ଭକ୍ତଙ୍କ ଭାବାବେଗକୁ ଶକ୍ତ ଧକ୍କା ଦେଇଛି । ଶ୍ରୀମନ୍ଦିର ଇତିହାସରେ ଏଭଳି କୁକର୍ମ ନା କେବେ ହେଇଥିଲା ନା ଓଡ଼ିଶାର ଲୋକ କେବେ ଏଭଳି ଦୁଃଖଦ ଖବର ଦେଖିଥିଲେ । ତେଣୁ ଏଭଳି ସମ୍ବେଦନଶୀଳ ଘଟଣାରେ ମାନ୍ୟବର ରାଜ୍ୟପାଳଙ୍କ ହସ୍ତକ୍ଷେପ ଲୋଡିଛୁ ବୋଲି ଶ୍ରୀ ମାଝୀ କହିଛନ୍ତି ।