ଶ୍ରୀମନ୍ଦିର ପ୍ରଶାସନର ମୁଣ୍ଡବିନ୍ଧାର କାରଣ ପାଲଟିଛି ରଥକାଠ ଅଭାବ । ସେପଟେ ରଥଖଳାରେ ଖେଇ ବା ପ୍ରାପ୍ୟକୁ ନେଇ ବିବାଦ ଦେଖାଦେଇଥିଲା । ୪ ଘଣ୍ଟା କାମ ବନ୍ଦ କରିଥିଲେ ବିଶ୍ବକର୍ମା ମହାରଣା । ପ୍ରଶାସନିକ ଆଲୋଚନା ପରେ ରଥକାମ ସ୍ୱାଭାବିକ ହୋଇଥିଲେ ମଧ୍ୟ ଦାବି ପୂରଣ ନହେଲେ ଆଗକୁ ପୁଣି ରଥ କାର୍ଯ୍ୟ ବନ୍ଦ ପାଇଁ ଚେତାବନୀ ଦେଇଛନ୍ତି ।

ଶ୍ରୀମନ୍ଦିର ପ୍ରଶାସନର ମୁଣ୍ଡବିନ୍ଧାର କାରଣ ପାଲଟିଛି ରଥକାଠ ଅଭାବ । ଧଉରା, ଅସନ, ଫାଶୀ, ବଳକା ରଥକାଠକୁ ଆଗାମୀ ବର୍ଷ ପାଇଁ ସୁରକ୍ଷିତ ରଖିବାକୁ ଶ୍ରୀମନ୍ଦିର ପ୍ରଶାସନର ପଦକ୍ଷେପ । ନିର୍ମାଣ କାର୍ଯ୍ୟ ପରେ ବଳକା ରହୁଥିବା ଉପଯୁକ୍ତ କାଠକୁ ଶ୍ରୀମନ୍ଦିର ପ୍ରଶାସନକୁ ହସ୍ତାନ୍ତର କରିବାକୁ ନୋଟିସ୍ ପରେ ରଥ ମହାରଣା- ଶ୍ରୀମନ୍ଦିର ପ୍ରଶାସନ ମଧ୍ୟରେ ଘନେଇଛି ବିବାଦ । ଏଥିଯୋଗୁଁ ୪ ଘଣ୍ଟା ପ୍ରଭାବିତ ହୋଇଥିଲା ରଥ ନିର୍ମାଣ । ଗତ ୧୩ ଜୁନରେ ବିଶ୍ୱକର୍ମା ମହାରଣାଙ୍କୁ ନୋଟିସ୍ କରିଥିଲା ଜିଲ୍ଲା ପ୍ରଶାସନ । ଏହି ନୋଟିସକୁ ନମାନି, ନିଜ ଜିଦରେ ଅଟଳ ରହିବା ସହ ୪ ଘଣ୍ଟା କାଳ କାର୍ଯ୍ୟ ବନ୍ଦ କରି ପ୍ରଶାସନକୁ ଚେତାବନୀ ଦେଇଛନ୍ତି ବିଶ୍ୱକର୍ମା ମହାରଣା ।

ସେପଟେ ବିବାଦୀୟ ପରିସ୍ଥିତିକୁ ସୁଧାରିବା ପାଇଁ ଶ୍ରୀମନ୍ଦିର ନୀତି ପ୍ରଶାସକଙ୍କ ଅଧ୍ୟକ୍ଷତାରେ ବିଶ୍ଵକର୍ମା ମହାରଣାଙ୍କୁ ନେଇ ହୋଇଥିଲା ବୈଠକ । ବିନା ଆଲୋଚନାରେ ନୋଟିସ୍ ପଠାଇବାକୁ ନେଇ ତତ୍ତ୍ୱାବଧାରକଙ୍କୁ ଦୋଷ ଦେଇଛନ୍ତି ବିଶ୍ୱକର୍ମା ମହାରଣା । ଘଟଣାର ସ୍ଥାୟୀ ସମାଧାନ ନ ହେଲେ ଆଗକୁ ରଥ ଗଡାଇ ଦେବୁନି ବୋଲି ଚେତାବନୀ ଦେଇଛନ୍ତି ବିଶ୍ୱକର୍ମା । ସେପଟେ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ନିର୍ଦ୍ଦେଶ କ୍ରମେ ପ୍ରତିବର୍ଷ ଏଇଭଳି କାର୍ଯ୍ୟାଳୟଦେଶ ବା ନୋଟିସ୍ ବିଶ୍ୱକର୍ମା ମହାରଣାଙ୍କୁ ଦିଆଯାଇଥାଏ ବୋଲି ନୋଟିସରେ ଉଲ୍ଲେଖ ରହିଛି ।

ବଳକା କାଠକୁ ଖେଇ ହିସାବରେ ନେବା ପାଇଁ ବିଶ୍ୱକର୍ମା ମହାରଣା ସ୍ଵତ୍ଵଲିପିର ଦ୍ୱାହି ଦେଉଥିବା ବେଳେ ପ୍ରଶାସନ କିନ୍ତୁ ରଥକାଠ ଅଭାବକୁ ନେଇ ଏଭଳି ନିଷ୍ପତ୍ତି ନେଇ ଆସୁଛି । ତେବେ ଏଭଳି ଛୋଟ ଘଟଣାରେ ରଥ ନିର୍ମାଣ ବନ୍ଦ କରିବାକୁ ନେଇ ଅସନ୍ତୋଷ ଝାଡ଼ିଛନ୍ତି ଜଗନ୍ନାଥ ପ୍ରେମୀ ।