Argus News - ଶ୍ରୀମନ୍ଦିରରେ ଅଭାବନୀୟ ଘଟଣା, ନୀଳଚକ୍ରରୁ ଛିଣ୍ଡିଗଲା ବାନା….ଶୁଭୁଛି ତ୍ରାହି ତ୍ରାହି

ବଡ଼ଦେଉଳ ନୀଳଚକ୍ରରୁ ଛିଡ଼ିଲା ମାନସିକ ଧ୍ୱଜା । ଏପରି ଦୃଶ୍ୟ ଶ୍ରଦ୍ଧାଳୁ ଓ ସେବକଙ୍କୁ ମାନସିକ ଆଘାତ ଦେଇଛି । ଚୁନରା ସେବକମାନେ ନୀଳଚକ୍ରରେ ମାନସିକ ବାନା ବନ୍ଧୁଥିବା ବେଳେ ଏହି ଘଟଣା ଘଟିଥିଲା । ନୀଳଚକ୍ରରୁ ଅଁଳା ବେଢ଼ା ଯାଏ ପ୍ରତ୍ୟେକ ଦିନ ମାନସିକ ବାନା ବନ୍ଧା ଯାଇଥାଏ । ନୀଳଚକ୍ରରୁ ଅଁଳା ବେଢ଼ା ପର୍ଯ୍ୟନ୍ତ ୧୪ଫୁଟିଆ ସମସ୍ତ ମାନସିକ ବାନାକୁ ତଳକୁ ତଳ ଗୁନ୍ଥି ବାନ୍ଧି ଦିଆଯାଏ । ବାକି ଛୋଟ ବାନାଗୁଡ଼ିକ ବଣ୍ଡଲ କରି ନୀଳଚକ୍ରରେ ବାନ୍ଧି ଦିଆଯାଏ । ବୁଧବାର ଅପରାହ୍ନରେ ଗୁନ୍ଥା ଯାଇଥିବା ଏହି ୧୪ଫୁଟିଆ ମାନସିକ ବାନା ବନ୍ଧା ଯାଉଥିବା ବେଳେ ହଠାତ୍ ମଝିରୁ ଛିଣ୍ଡି ଯାଇଥିଲା । ପରେ ଚୁନରା ସେବାୟତମାନେ ଛିଣ୍ଡି ଯାଇଥିବା ଡୋରକୁ ଯୋଡ଼ି ବାନା ବନ୍ଧା ନୀତି ସମ୍ପନ୍ନ କରିଥିଲେ । ଯାହାକୁ ନେଇ ଶ୍ରଦ୍ଧାଳୁ ଓ ବୁଦ୍ଧିଜୀବୀଙ୍କ ମଧ୍ୟରେ ବିଭିନ୍ନ ପ୍ରକାରର କଳ୍ପନା ଜଳ୍ପନା ଲାଗି ରହିଛି ।

ପ୍ରତ୍ୟେକ ଦିନ ବାନା ବନ୍ଧା ଦେଖିବାକୁ ଶ୍ରୀମନ୍ଦିର ଚାରିପାଖରେ ହଜାର ହଜାର ଶ୍ରଦ୍ଧାଳୁ ଉତ୍କଣ୍ଠାର ସହ ଅପେକ୍ଷା କରିଥାଆନ୍ତି । ଏହା ପ୍ରତ୍ୟେକ ଦିନ ଭିଡ଼ର କାରଣ ହୋଇଥାଏ । ବୁଧବାର ଅଘଟଣ ପରେ ଶ୍ରଦ୍ଧାଳୁଙ୍କ ଭିତରେ ଆଲୋଡ଼ନ ସୃଷ୍ଟି ହୋଇଥିଲା । ଜୟ ଜଗନ୍ନାଥ ଧ୍ୱନିରେ ଚାରିପାଶ୍ୱର୍ କମ୍ପି ଉଠିଥିଲା । ଅନେକ ତ୍ରାହି ତ୍ରାହି... ମଧ୍ୟ ଡାକିଥିଲେ ।

ଅଧିକ ପଢ଼ନ୍ତୁ: ରଥଯାତ୍ରା ସମୟରେ ବଡ଼ଦାଣ୍ଡରେ ପଡ଼ିବନି ପତ୍ର ,ପାଣି ବୋତଲ, ଆସିବ SOP

ସୂଚନା ଥାଉକି, ଗତ ସପ୍ତାହକ ଭିତରେ ବଡ଼ଦେଉଳ ନୀଳଚକ୍ର ଅକ୍ଷୟ ଦଣ୍ଡ ଉପରେ ଦୁଇ ଥର ଚିଲ ବସିବା ନଜର ଆସିଥିଲା । ଏହି ଘଟଣା ପରେ ଇରାନ ସହ ଆମେରିକା ଓ ଇସ୍ରାଏଲ୍ର ଯୁଦ୍ଧ ହୋଇଥିଲା । ଯାହା ଏବେ ମଧ୍ୟପ୍ରାଚ୍ୟରେ ଯୁଦ୍ଧର ଘନଘଟା ଦେଖାଦେଇଛି । ଏହି ଯୁଦ୍ଧଜନିତ ଦରଦାମ୍ ବୃଦ୍ଧି ଏବେ ଭାରତ ସମେତ ସମଗ୍ର ବିଶ୍ୱବାସୀଙ୍କ ଉଦବେଗର କାରଣ ହୋଇଛି। ଏହି ଯୁଦ୍ଧ ବିଶ୍ୱଯୁଦ୍ଧରେ ପରିଣତ ହେବା ନେଇ ବିଭିନ୍ନ ଫୋରମ୍‌ ପୂର୍ବାନୁମାନ କରାଯାଉଥିବା ବେଳେ ଶ୍ରୀମନ୍ଦିରରୁ ଏହାର ସଙ୍କେତ ମିଳିଥିବା ଚର୍ଚ୍ଚା ହେଉଛି ।

ଶ୍ରୀମନ୍ଦିର ପୁରୋହିତ ବିଶ୍ୱଜିତ୍ ମହାପାତ୍ର କହିଛନ୍ତି, ବଡ଼ ବିପର୍ଯ୍ୟୟ ଆସିବା ପୂର୍ବରୁ ଆମ ମହାପ୍ରଭୁ କୌଣସି ଜରିଆରେ ଚେତାଇ ଦେଇଥାଆନ୍ତି । ଫୋନି ବାତ୍ୟା, କରୋନା ମହାମାରୀ, ଟାରିଫ୍ ବୃଦ୍ଧି ଭଳି ଘଟଣା ପୂର୍ବରୁ ଏହାର ସଙ୍କେତ ନୀଳଚକ୍ରରୁ ମିଳିଛି । ଧ୍ୱଜା ଛିଣ୍ଡିବା ଘଟଣାକୁ ହାଲୁକାରେ ନିଆଯାଇନପାରେ । ବିଶ୍ୱବାସୀଙ୍କ କଲ୍ୟାଣ ନିମନ୍ତେ ମହାପ୍ରଭୁଙ୍କୁ ସମସ୍ତେ ପ୍ରାର୍ଥନା କରିବା । କେବଳ ସେ ହିଁ ସବୁ ବିପଦକୁ ଟାଳି ଦେବାରେ ସକ୍ଷମ ।