ଅର୍ଗସ ବ୍ୟୁରୋ: ବଡ଼ ରୋଚକ ସ୍ଥିତିରେ ରାଜ୍ୟ ରାଜନୀତି । 24 ନିର୍ବାଚନ ପାଇଁ କସରତ ଯେତିକି, ବିଜେଡ଼ି - ବିଜେପି ମେଣ୍ଟ ସମ୍ଭାବନା ନେଇ ଚର୍ଚ୍ଚା ବି ସେତିକି । ଏଭଳି ସ୍ଥିତି ଭିତରେ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହଙ୍କ ଜାତୀୟ ଗଣମାଧ୍ୟମରେ ବୟାନ ଆଣିଛି ନୂଆ ଟ୍ୟୁଇଷ୍ଟ । ଶାହ କହିଛନ୍ତି, ଓଡ଼ିଶାରେ ବିଜେପିର ଶକ୍ତିଶାଳୀ ହେବାକୁ ଯାଉଛି । ଓଡ଼ିଶାରେ ବଢ଼ିଛି ମୋଦିଙ୍କ ଲୋକପ୍ରିୟତା। ଉଭୟ ଲୋକସଭା ଏବଂ ବିଧାନସଭାରେ ବୃଦ୍ଧି ହେବ ସିଟ ସଂଖ୍ୟା। ରାଜନୈତିକ ବିଶାରଦଙ୍କ ଆକଳନ ଠାରୁ ବହୁ ଗୁଣ ଅଧିକ ଆସନ ଜିତିବ ବିଜେପି । ଏକା ଲଢିଲେ ବି ସରକାର ଗଢ଼ିବା ପାଇଁ ବିଜେପି ଓଡ଼ିଶାରେ ଲଢିବ ବୋଲି କହିଛନ୍ତି ଶାହ ।

ସେପଟେ ନିର୍ବାଚନୀ ପାଇଁ ଫୁଲ ଦମରେ ପ୍ରସ୍ତୁତି ଚଳାଇଛି ଭାରତୀୟ ଜନତା ପାର୍ଟି । 147 ବିଧାନସଭା ଓ 21 ଲୋକସଭା ଆସନରେ ନିର୍ବାଚନ ଲଢିବା ପାଇଁ ରୋଡ଼ ମ୍ୟାପ ତିଆରି କରୁଛି ଦଳ। କୋର କମିଟି ଓ ନିର୍ବାଚନ କମିଟିରେ ବିସ୍ତୃତ ଆଲୋଚନା ପରେ ଦିଲ୍ଲୀ ଯାଇଛନ୍ତି ରାଜ୍ୟ ସଭାପତି । ଏପଟେ ଗାଁ ଚାଲ, ବୁଥ ଚାଲ ଅଭିଯାନ ଜୋରଦାର ଢ଼ଙ୍ଗରେ ଜାରି ରଖିଛି ଦଳ। ଆଗାମୀ ନିର୍ବାଚନରେ ପାଇଁ ସଂପୂର୍ଣ୍ଣ ପ୍ରସ୍ତୁତ ଥିବା କଥା କହିଛି ବିଜେପି । ଅନ୍ୟପଟେ ବିଜେଡ଼ି ମଧ୍ୟ 24 ରାନଙ୍ଗଣକୁ ଓହ୍ଲାଇବା ପାଇଁ ପାଗ ଭିଡୁଛି । ଲୋକସଭା ଏବଂ ବିଧାନସଭା ନିର୍ବାଚନ ମଣ୍ଡଳୀୱାରୀ ପ୍ରତିଦିନ ନବୀନ ନିବାସରେ ବସୁଛି ବୈଠକ । ପର୍ଯ୍ୟବେକ୍ଷକ ଓ ନେତାଙ୍କ ସହ ସମୀକ୍ଷା କରୁଛନ୍ତି ସୁପ୍ରିମୋ । ଅନ୍ତଃ କନ୍ଦଳ ଉପରେ ପ୍ୟାଚ ପକାଇବାଠୁ ନେଇ କେଉଁ ସିଟରେ କିଏ ହେବ ପ୍ରାର୍ଥୀ ତାକୁ ନେଇ ଚାଲିଛି ଅଙ୍କକଷା । ସେପଟେ କଂଗ୍ରେସ ଉଭୟ ଦଳଙ୍କ କାର୍ଯ୍ୟକଳାପ ଉପରେ ରଖିଛି ନଜର ।

ପୂର୍ବରୁ ଏକାଧିକ ଜାତୀୟ ଗଣମାଧ୍ୟମ ସଂସ୍ଥାର ସର୍ଭେ କହୁଛି ଓଡ଼ିଶାରେ ତୀବ୍ର ହୋଇଛି ସରକାର ବିରୋଧୀ ହାୱା । ଯାହାର ସିଧା ଲାଭ ବିଜେପିକୁ ମିଳିପାରେ । ଦ ଫେଡରାଲ ଇଣ୍ଡିଆର ସର୍ଭେ ଅନୁଯାୟୀ ଏଥର ଓଡ଼ିଶାରେ ବିଜେପିକୁ ମିଳିବ 54.90 ପ୍ରତିଶତ ଭୋଟ ଏବଂ ବିଜେଡିକୁ ମିଳିବ ମାତ୍ର 19.35 ପ୍ରତିଶତ ଭୋଟ ।ସେମିତି ଟାଇମ୍ସ ନାଓ, ଇଣ୍ଡିଆ ଟୁଡେ ଏବଂ ନ୍ୟୁଜ-18 ଭଳି ପ୍ରମୁଖ ଗଣମାଧ୍ୟମ ମଧ୍ୟ ଓଡ଼ିଶାରେ ବିଜେପି ବଢିବା ଓ ବିଜେଡ଼ି କମିବା ନେଇ ଆକଳନ କରିଛନ୍ତି ।

ଅଧିକ ପଢ଼ନ୍ତୁ ଓଡିଶା ଖବର:

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV