Subarnarekha Flood / ବାରମ୍ବାର ବନ୍ୟା ବଢାଉଛି ଲୋକଙ୍କ ଦୁର୍ଦ୍ଦଶା, ସୁବର୍ଣ୍ଣରେଖା ବନ୍ୟା ନେଲା ଦୁଇଟି ଅମୁଲ୍ୟ ଜୀବନ

କାଳ ସାଜିଛି ସୁବର୍ଣ୍ଣରେଖା ବନ୍ୟାଜଳ । ବଢିପାଣିରେ ଚାଲି ଯାଇଛି ଭୋଗରାଇ ଅଂଚଳର ଦୁଇଟି ଅମୂଲ୍ୟ ଜୀବନ । ବନ୍ୟାଜଳରେ ବୁଡ଼ି ନାଚିନ୍ଧl ଗାଁର ସନ୍ୟାସୀ ରାଜ ଏବଂ କୁଳିଦା ଗାଁର ସୁମତି ଜେନାଙ୍କ ମୃତ୍ୟୁ ହୋଇଛି । ଦୁଇ ଘଟଣାକୁ ନେଇ ଏବେ ଦୁଇ ଗାଁରେ ଶୋକାକୁଳ ପରିବେଶ । ବନ୍ୟାର ପାଣିରେ ଚାରିଆଡ଼େ ଜଳମଗ୍ନ । ଘରଦ୍ୱାରଠାରୁ ରାସ୍ତାଘାଟ, ସବୁଠି କେବଳ ପାଣି ଆଉ ପାଣି । ଆଉ ଏହି ବନ୍ୟାଜଳ ହିଁ ଦୁଇ ପରିବାରର ଆଖିରେ ଲୁହ ଦେଇଛି ।

କୁଳିଦା ଗାଁର ସୁମତି ଜେନା । ରାତିରେ ଘରଦ୍ୱାର ବନ୍ୟାଜଳରେ ବୁଡ଼ିଯାଇଥିବାରୁ ସୁମତି ତାଙ୍କ ପୁଅକୁ ଶୌଚ କରିବାକୁ ଡଙ୍ଗାରେ ନେଉଥିଲେ । କିନ୍ତୁ ଭାରସାମ୍ୟ ହରାଇ ପୁଅ ଖସି ପଡିବା ପରେ ତାଙ୍କ ଶାଶୁ ବନ୍ୟା ପାଣିରେ ଫସି ଯାଇଥିଲେ । ନିଜ ଜୀବନକୁ ବାଜି ଲଗାଇ ସୁମତି ପୁଅ ଓ ଶାଶୁଙ୍କୁ ସୁରକ୍ଷିତ ଉଦ୍ଧାର କରି ବନ୍ୟା ପାଣିରେ ବୁଡି ଯାଇଥିଲେ ।

ସେପଟେ କମର୍ଦ୍ଦା ଥାନା ନlଚିନ୍ଦା ଗ୍ରାମର ସନ୍ୟାସୀ ରାଜ ବିଲରେ ମାଛ ଧରିବା ପାଇଁ ଆଉ ଫେରି ନଥିଲେ । ବହୁ ଖୋଜାଖୋଜି ପରେ ତାଙ୍କର ମୃତଦେହ ଉଦ୍ଧାର କରାଯାଇଥିଲା । ବନ୍ୟାପାଣି ଦୁଇଟି ପରିବାରର ଖୁସିକୁ ଉଜାଡି ଦେଇଛି।

ଭୋଗରାଇ ଅଂଚଳରେ ବନ୍ୟା ସ୍ଥିତି ଅତ୍ୟନ୍ତ ସଙ୍ଗୀନ୍ । ଯୁଆଡେ ଦେଖିବ ଖାଲି ପାଣି ଆଉ ପାଣି । ଲୋକମାନେ ଅଣ୍ଟାଏ ଉଚ୍ଚର ପାଣିରେ ଯାଆସ କରୁଛନ୍ତି । ରାସ୍ତାରେ ଚାଲୁଛି ଡଙ୍ଗା । ଏପରିକି ନିତ୍ୟ ବ୍ୟବହାର୍ଯ୍ୟ ଜିନିଷ ଆଣିବାକୁ ଡଙ୍ଗା ହିଁ ଏକମାତ୍ର ସାହାରା । ଭେଳାରେ ପାରି ହେଉଛନ୍ତି ଲୋକ । ଦୋକାନରେ ଥିବା ଜିନିଷ ପତ୍ର ଭାସୁଛି ।

ସେପଟେ ସୁବର୍ଣ୍ଣରେଖା ବନ୍ୟାପାଣି ଯୋଗୁଁ ବାଲିଆପାଳ ବ୍ଲକର ୯ ପଞ୍ଚାୟତ ୧୨୦ ଅଧିକ ଗାଁ ପ୍ରଭାବିତ ହୋଇଛି । ମୁଖ୍ୟ ରାସ୍ତା ଉପରେ ବନ୍ୟା ପାଣି ପ୍ରବାହିତ ହେଉଥିବାରୁ ଲୋକଙ୍କ ଯାତାୟତ ପାଇଁ ପ୍ରଶାସନ ପକ୍ଷରୁ ୯ ଟି ଏସଆରସି ବୋଟ୍, ୩ ଓଡ୍ରାଫ୍ ଟିମ୍ ଏବଂ ଅଗ୍ନିଶମ ବାହିନୀ ନିୟୋଜିତ କରାଯାଇଛି । ୬୦ ହଜାରରୁ ଅଧିକ ଲୋକ ପ୍ରଭାବିତ ହୋଇଛନ୍ତି, ଶହ ଶହ ହେକ୍ଟର ଚାଷ ଜମି ଜଳମଗ୍ନ ହୋଇ ରହିଛି । ବିଭିନ୍ନ ସ୍ଥାନରେ ରାସ୍ତା ଉପରେ ୪ ଫୁଟର ବନ୍ୟା ପାଣି ପ୍ରବାହିତ ହେଉଥିବାରୁ ଯୋଗାଯୋଗ ବିଚ୍ଛିନ୍ନ ହୋଇଛି । ବାଲିଆପାଳ ନିକଟ ଭୁଆବନ୍ଧର ଆଉସା ଛକ ଓ ରଣକୋଠା ମଧ୍ୟରେ ଥିବା ସ୍ଲୁଇସ୍ ଗେଟର ଗୋଟିଏ ଫାଟକ ଭାଙ୍ଗିଯିବାରୁ ସ୍ଥାନୀୟ ଅଞ୍ଚଳରେ ଆତଙ୍କର ବାତବରଣ ସୃଷ୍ଟି ହୋଇଛି ।

ଅନ୍ୟପକ୍ଷରେ ବୈତରଣୀ ନଦୀରେ କମିଛି ଜଳସ୍ତର ମାତ୍ର ବଢିଛି ଲୋକଙ୍କ ଦୁର୍ଦ୍ଦଶା । ବୈତରଣୀ, କାଣୀ ନଦୀରେ ବନ୍ୟା ଆସିବା ଫଳରେ ଦଶରଥପୁର ବ୍ଳକର ୧୯ ଗ୍ରାମ ପଞ୍ଚାୟତର ୬୨ଟି ଗାଁ ପ୍ରଭାବିତ ହୋଇଛି । ପୂର୍ବ ବନ୍ୟାରେ ସୃଷ୍ଟି ହୋଇଥିବା ଘାଇ ମରାମତି କାର୍ଯ୍ୟ ସରି ନଥିବାରୁ ପୁଣି ନିର୍ମାଣଧୀନ ଘାଇ ବାଟେ ଗାଁକୁ ବନ୍ୟାପାଣି ମାଡି ବ୍ୟାପକ ଅଞ୍ଚଳ ଜଳମଗ୍ନ ହୋଇଯାଇଛି । ଦଶରଥପୁର ବ୍ଲକରେ ବନ୍ୟା ପାଣି ଲୋକଙ୍କ ମେରୁଦଣ୍ଡ ଦୋହଲାଇ ଦେଇଛି ।

ଯାଜପୁର ଜିଲ୍ଲା ବିଂଝାରପୁର ବ୍ଲକ ନାଉବାଙ୍କ ନୂଆମାହାରା ନିକଟରେ ସୃଷ୍ଟି ହୋଇଥିବା ଘାଇ ଏବେ ବି ବିପଦ ସୃଷ୍ଟି କରୁଛି । ଘାଇ ମରାମତି କାମ ସମ୍ପୂର୍ଣ୍ଣ ହୋଇନଥିବାରୁ ବନ୍ୟା ଜଳ ଲଗାତାର ପ୍ରବେଶ କରୁଛି ଏବଂ ଅନେକ ଅଞ୍ଚଳ ଜଳମଗ୍ନ ରହିଛି ।

ସେପଟେ IMDର ଆକଳନ ଅନୁସାରେ ଆଗାମୀ ୫ ଦିନ ପର୍ଯ୍ୟନ୍ତ ବର୍ଷା ସମ୍ଭାବନା ନାହିଁ । ରାଜଘାଟରେ ସୁବର୍ଣ୍ଣରେଖାର ଜଳସ୍ତର କମୁଛି । ଆଗାମୀ ଦିନେ ଦୁଇ ଦିନ ଭିତରେ ସବୁ ଅଂଚଳ ଜଳମୁକ୍ତ ହୋଇଯିବ ବୋଲି ଜଳ ସମ୍ପଦ ବିଭାଗ ସର୍ବୋଚ୍ଚ ଯନ୍ତ୍ରୀ କହିଛନ୍ତି । କାଣୀ ନଈରେ ସୃଷ୍ଟି ହୋଇଥିବା ଘାଇ ୫ ଦିନ ଭିତରେ ମରାମତି ସମ୍ପୂର୍ଣ୍ଣ କରିବାକୁ ଚେଷ୍ଟା କରାଯାଉଛି ।