ଭୁବନେଶ୍ଵର,୩୦/୩: ରାଜ୍ୟ ସରକାରଙ୍କ ପ୍ରମୁଖ ମହିଳା ସଶକ୍ତିକରଣ ଯୋଜନା ‘ସୁଭଦ୍ରା’ ପ୍ରଭାବରେ ହିତାଧିକାରୀମାନଙ୍କ ସଞ୍ଚୟରେ ଉଲ୍ଲେଖନୀୟ ବୃଦ୍ଧି ଘଟିଛି। ଭାରତୀୟ ଷ୍ଟେଟ୍ ବ୍ୟାଙ୍କ (ଏସ୍‌ବିଆଇ)ର ଗବେଷଣା ଶାଖା ପକ୍ଷରୁ ଜାରି କରାଯାଇଥିବା ଏକ ରିପୋର୍ଟରେ କୁହାଯାଇଛି ଯେ ‘ସୁଭଦ୍ରା’ ଯୋଜନା ହିତାଧିକାରୀଙ୍କ ସଞ୍ଚୟରେ ୪୫ ପ୍ରତିଶତ ବୃଦ୍ଧି ହୋଇଛି। ହିତାଧିକାରୀ ମାନଙ୍କ ବ୍ୟୟରେ ମଧ୍ୟ ୨୮ ପ୍ରତି ପ୍ରତିଶତର ବୃଦ୍ଧି ହୋଇଛି।

ଓଡ଼ିଶାର ପ୍ରମୁଖ ସୁଭଦ୍ରା ଯୋଜନା ଆର୍ଥିକ ସୁରକ୍ଷା ଓ ଅର୍ଥନୈତିକ ଅଂଶଗ୍ରହଣ ବଢ଼ାଇ ଲୋକଙ୍କ ଜୀବନରେ ରୂପାନ୍ତରଣ ଆଣୁଛି। ରିପୋର୍ଟରେ ‘ସୁଭଦ୍ରା’ ହିତାଧିକାରୀ ଓ ଅନ୍ୟ ମହିଳାମାନଙ୍କ ସଞ୍ଚୟ ଓ ବ୍ୟୟ ମଧ୍ୟରେ ଏକ ତୁଳନାତ୍ମକ ଚିତ୍ର ପ୍ରଦାନ କରାଯାଇଛି। ଯୋଜନାରେ ସାମିଲ ହୋଇ ନ ଥିବା ମହିଳାଙ୍କ ତୁଳନାରେ ସାମିଲ ହୋଇଥିବା ମହିଳାମାନଙ୍କ ସଞ୍ଚୟ ରାଶି ବୃଦ୍ଧି ପାଇଥିବା ଏଥିରେ କୁହାଯାଇଛି। ଯୋଜନାରେ ସାମିଲ ହେବା ପରଠାରୁ ସେମାନଙ୍କ ବ୍ୟାଙ୍କ ଖାତାର ମାସିକ ବାଲାନ୍ସରେ ୪୫ ପ୍ରତିଶତର ବୃଦ୍ଧି ହୋଇଛି।

ଅନ୍ୟ ମହିଳାମାନଙ୍କ ତୁଳନାରେ ହିତାଧିକାରୀଙ୍କ ଆର୍ଥିକ ସ୍ଥିତିରେ ହୋଇଥିବା ଗୁଣାତ୍ମକ ଉନ୍ନତିକୁ ଦର୍ଶାଉଛି। ‘ସୁଭଦ୍ରା’ ଯୋଜନାରେ ଥିବା ୪୬ ପ୍ରତିଶତ ହିତାଧିକାରୀଙ୍କ ବୟସ ୩୦ରୁ ୪୪ ବର୍ଷ, ୩୧ ପ୍ରତିଶତଙ୍କ ବୟସ ୪୫ରୁ ୪୯ ବର୍ଷ ଓ ୨୩ ପ୍ରତିଶତ ହିତାଧିକାରୀଙ୍କ ବୟସ ୩୦ ବର୍ଷରୁ କମ୍ ରହିଛି। ‘ସୁଭଦ୍ରା’ ଭଳି ବିନା ସର୍ଭ ଭିତ୍ତକ ନଗଦ ରାଶି ହସ୍ତାନ୍ତର ଯୋଜନା ଏବେ ରାଜ୍ୟଗୁଡ଼ିକର କଲ୍ୟାଣକାରୀ ଯୋଜନାଗୁଡ଼ିକର ହୋଇଛି। ଏଭଳି ଯୋଜନାର ଅର୍ଥନୈତିକ ପ୍ରଭାବ ସୁଦୂର ପ୍ରସାରୀ ରହିଛି। ତାହା ମହିଳାମାନଙ୍କୁ ଆବଶ୍ୟକ ଓ ଜରୁରୀକାଳୀନ ଆର୍ଥିକ ସ୍ବାଧୀନତା ପ୍ରଦାନ କରିଥିବା ରିପୋର୍ଟରେ କୁହାଯାଇଛି। ବିଶେଷ କରି ସମାଜର ତଳ ପାହାଚରେ ରହୁଥିବା ୫୦ ପ୍ରତିଶତ ମହିଳାଙ୍କ ପାଇଁ ଏହି ଯୋଜନା ବିଶେଷ ସହାୟକ ହୋଇପାରିଥିବା ରିପୋର୍ଟରେ ଦର୍ଶାଯାଇଛି।

ପଢନ୍ତୁ ଏହି ଖବର: ବିଜେଡି ବିଧାୟିକା ମନୋରମା ମହାନ୍ତିଙ୍କ ବାସଭବନରେ ପୋଲିସ, ଅଭିଯୁକ୍ତ ସ୍ବାମୀଙ୍କୁ ଖୋଜୁଛି ପୋଲିସ

ଏଭଳି ଯୋଜନାର ମହତ୍ଵ ସମ୍ପର୍କରେ ରିପୋର୍ଟରେ କୁହାଯାଇଛି ଯେ ତାହା ମହିଳାମାନଙ୍କୁ ଆର୍ଥିକ ସୁରକ୍ଷା,ଅର୍ଥରାଶି ଉପରେ ନିୟନ୍ତ୍ରଣ,ଡିଜିଟାଲ ଅନ୍ତର୍ଭୁକ୍ତିକରଣ ଓ ଲଘୁ ଉଦ୍ୟୋଗ ଗଠନର ସମ୍ଭାବନାକୁ ବଢ଼ାଉଛି। ଫଳରେ ମହିଳାମାନଙ୍କ ସମଗ୍ର ସାମାଜିକ- ଆର୍ଥିକ ସ୍ଥିତିରେ ଉନ୍ନତି ହେଉଛି। ହିତାଧିକାରୀମାନେ ପାଉଥିବା ଟଙ୍କାକୁ ଘର ଚଳାଇବା କାର୍ଯ୍ୟ, ନିଜ ବ୍ୟବସାୟ ଆରମ୍ଭ କରିବା, ଋଣ ଶୁଝିବା ଓ ନିଜ ଦକ୍ଷତା ବଢ଼ାଇବାରେ ଖର୍ଚ୍ଚ କରୁଥିବା ରିପୋର୍ଟରେ କୁହାଯାଇଛି।

ଖୁବଶୀଘ୍ର ଆରମ୍ଭ ହେବ ନୂତନ ସୁଭଦ୍ରା ଆବେଦନ । ଖୋଲିବାକୁ ଯାଉଛି ସୁଭଦ୍ରା ପୋର୍ଟାଲ୍ । ନୂତନ ଆବେଦନ ଲାଗି ସୁଭଦ୍ରା ପୋର୍ଟାଲ ଗୋଟିଏ ମାସ ଖୋଲା ରହିବ । ଏହି ଅବଧିରେ ନୂଆ ଆବେଦନକାରୀ ସୁଭଦ୍ରା ଯୋଜନାରେ ଟଙ୍କା ପାଇବା ଲାଗି ଆବେଦନ କରିପାରିବେ ।
ରାଜ୍ୟ ସରକାରଙ୍କ ଅନୁମୋଦନ କ୍ରମେ, ଆସନ୍ତା ଏପ୍ରିଲ ପହିଲାରୁ ସୁଭଦ୍ରା ପୋର୍ଟାଲରେ ନୂଆ ଆବେଦନ ଗ୍ରହଣ କରାଯିବ । ଏପ୍ରିଲ ୩୦ ଏକ ମାସ ପର୍ଯ୍ୟନ୍ତ 'ସୁଭଦ୍ରା ପୋର୍ଟାଲ' ମାଧ୍ୟମରେ ନୂତନ ଆବେଦନ ଗ୍ରହଣ ହୋଇପାରିବ ।