ଭୁବନେଶ୍ଵର: ଖୋଲିବ ସୁଭଦ୍ରା ପୋର୍ଟାଲ, କରି ହେବ ନୂଆ ଆବେଦନ । ଆସନ୍ତାକାଲି ନଭେମ୍ବର ୧ରୁ ନୂତନ ଆବେଦନ ଲାଗି ପୋର୍ଟାଲ ଖୋଲିବ । ନୂଆ ଆବେଦନକାରୀ ମାର୍ଚ୍ଚ ୮ ଅନ୍ତର୍ଜାତୀୟ ମହିଳା ଦିବସରେ ପାଇବେ ପ୍ରଥମ କିସ୍ତି । ଭୁବନେଶ୍ଵରରେ ଏକତା ପଦଯାତ୍ରା ଅବସରରେ ଏହି ସୂଚନା ଦେଇଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ।

ଉପମୁଖ୍ୟମନ୍ତ୍ରୀ କହିଛନ୍ତି, "ନଭେମ୍ବର ୧ରୁ ସୁଭଦ୍ରା ପୋର୍ଟାଲ ସମସ୍ତଙ୍କ ପାଇଁ ଖୋଲିବ । ଯେଉଁ ମାନଙ୍କୁ ୨୧ ବର୍ଷ ହୋଇଛି, ସେମାନେ ସୁଭଦ୍ରା ପୋର୍ଟାଲ୍‌ରେ ନୂଆ ଆବେଦନ କରିପାରିବେ । ୨୦୨୫ ମାର୍ଚ୍ଚ ୩୧ ସୁଦ୍ଧା ୨୧ ବର୍ଷ ବୟସ ହୋଇଥିବା ଯୁବତୀ ଓ ମହିଳାମାନେ ସୁଭଦ୍ରା ପାଇଁ ଆବେଦନ କରିପାରିବେ ।"

ଏଥିସହ ପଢ଼ନ୍ତୁ: ପିଲାଏ ପଢ଼ିବେ AI ପାଠ, ୨୦୨୬-୨୭ ଶିକ୍ଷା ବର୍ଷରୁ ଆରମ୍ଭ ହେବ କମ୍ପ୍ୟୁଟେସନାଲ୍ ଥିଙ୍କିଂ ପାଠ୍ୟକ୍ରମ

ଏହା ପୂର୍ବରୁ ରାକ୍ଷୀ ପୂର୍ଣ୍ଣିମାରେ ମହିଳାଙ୍କ ଆକାଉଣ୍ଟକୁ ସୁଭଦ୍ରା ଟଙ୍କା ଆସିଥିଲା । ଅଗଷ୍ଟ ୯ ତାରିଖ, ରାକ୍ଷୀ ପୂର୍ଣ୍ଣିମା ଅବସରରେ ସୁଭଦ୍ରାର ତୃତୀୟ କିସ୍ତି ଟଙ୍କା ପ୍ରଦାନ କରିଥିଲେ ସରକାର । ତା' ପୂର୍ବରୁ ଏପ୍ରିଲ ୨୪ରେ ମିଳିଥିଲା ସୁଭଦ୍ରା ଯୋଜନାର ଷଷ୍ଠ ପର୍ଯ୍ୟାୟ ଟଙ୍କା ।

ସୁଭଦ୍ରାର ତୃତୀୟ କିସ୍ତି ଅନେକଙ୍କୁ ମିଳି ନଥିଲା । ତୃତୀୟ ପର୍ଯ୍ୟାୟ କିସ୍ତିରୁ ବଞ୍ଚି ହୋଇଥିଲେ ୨ ଲକ୍ଷ ୮୫ ହଜାର ହିତାଧିକାରୀ । ବଞ୍ଚିତ ହିତାଧିକାରୀଙ୍କୁ ସାମିଲ୍ ପାଇଁ ଡୋର୍ ଟୁ ଡୋର୍ ସର୍ଭେ ନେଇ ପୂର୍ବରୁ ସୂଚନା ଦେଇଥିଲେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ।

ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା କହିଥିଲେ, ଜୀବିତଙ୍କୁ ମୃତ ଦର୍ଶା ଯାଇଥିବାରୁ ସ୍ଵାସ୍ଥ୍ୟ ବିଭାଗର ରିପୋର୍ଟର ତଥ୍ୟ ଆଧାରରେ ମୃତକୁ ବିଭାଗ ମାନିବ । ରାସନ କାର୍ଡରେ ମୃତ ଦର୍ଶା ଯାଇଥିଲେ ବି ସ୍ଵାସ୍ଥ୍ୟ ବିଭାଗ ତଥ୍ୟକୁ ଧରାଯିବ । ସେହି ଆଧାରରେ ମିଳିବ ସୁଭଦ୍ରା କିସ୍ତି । ଏଥିପାଇଁ ଡୋର୍ ଟୁ ଡୋର୍ ସର୍ଭେ ହେବ । ୧୫ ଦିନ ଭିତରେ ଫିଲ୍ଡ ଭିଜିଟ୍ କରି ତଦନ୍ତ ରିପୋର୍ଟ ଦେବେ ଅଧିକାରୀ ।

ଏଥିସହ ପଢ଼ନ୍ତୁ: ୧୫ ଦିନ ଭିତରେ ଫିଲ୍ଡ ଭିଜିଟ୍ କରି ତଦନ୍ତ ରିପୋର୍ଟ ଦେବେ ଅଧିକାରୀ, ଖୋଲିବ ଅଭିଯୋଗ ପୋର୍ଟାଲ୍

ସୁଭଦ୍ରାରୁ ୧୫ ହଜାର ୯୮୪ ହିତାଧିକାରୀଙ୍କୁ ମୃତ ଦର୍ଶାଇ ବାଦ୍ ଦିଆ ଯାଇଥିବା ବେଳେ ସେଥିରୁ ୧୮୦୫ ଜଣ ଜୀବିତ ଅଛନ୍ତି । ସେମାନଙ୍କୁ ପୁଣି ଥରେ ସାମିଲ୍ କରାଯିବ । ଅନ୍ୟପଟେ ୩୬ ହଜାର ୭୦୨ ହିତାଧିକାରୀ ଗାଡ଼ି କିଣିଥିବା ଯୋଗୁଁ ବାଦ୍ ପଡ଼ିଛନ୍ତି । ୨୧ ହଜାର ୩୫ ହିତାଧିକାରୀ ଆୟ କର ଦେବାରୁ ବାଦ୍ ପଡ଼ିଥିବା ବେଳେ ୧ ଲକ୍ଷ ୩୩ ହଜାର ୬୯୧ ଜଣ ଧାନ ବିକ୍ରି ପଞ୍ଜୀକରଣ ଏବଂ କୃଷକ ଭାବେ ପଞ୍ଜୀକରଣ କରି ବାଦ୍ ପଡ଼ିଛନ୍ତି ।