Argus News - BNS ୧୬୩ ପରେ ସୁନ୍ଦରଗଡ଼ରେ ବନ୍ଦ ହେଲା ଇଣ୍ଟରନେଟ୍

ସୁନ୍ଦରଗଡ଼: ଗୋଷ୍ଠୀ ସଂଘର୍ଷ, ଢେଲାମାଡ଼ ପରେ ବନ୍ଦ ହେଲା ଇଣ୍ଟରନେଟ । ସୁନ୍ଦରଗଡ଼ ସହରରେ ଇଣ୍ଟରନେଟ୍ ସେବାକୁ ବନ୍ଦ କରି ଦିଆଯାଇଛି । ଗୋମାଂସ ବିକ୍ରିକୁ ନେଇ ଉତ୍ତେଜନା ଓ ଗୋଷ୍ଠୀ ସଂଘର୍ଷ ପରେ ସୁନ୍ଦରଗଡ଼ ଇଣ୍ଟରନେଟ୍ ସେବାକୁ ବନ୍ଦ କରି ଦେଇଛି ଜିଲ୍ଲା ପ୍ରଶାସନ ।

ସୁନ୍ଦରଗଡ଼ ସହରରେ ୨୪ ଘଣ୍ଟା ପାଇଁ ଇଣ୍ଟରନେଟ୍ ସେବାକୁ ବନ୍ଦ କରାଯାଇଛି । ଇଣ୍ଟରନେଟ୍ ସେବା ଗୁରୁବାର ସନ୍ଧ୍ୟା ୬ଟାରୁ ଶୁକ୍ରବାର ସନ୍ଧ୍ୟା ୬ଟା ପର୍ଯ୍ୟନ୍ତ ବନ୍ଦ ପ୍ରଶାସନ ବନ୍ଦ କରିଛି । ଏଥିସହ ସହରରେ ୧୦ ପ୍ଲାଟୁନ୍ ପୋଲିସ ଫୋର୍ସ ମୁତୟନ କରାଯାଇଛି ।

ଏଥିସହ ପଢ଼ନ୍ତୁ: ମାର୍କେଟ ପାଲଟିଲା ରଣକ୍ଷେତ୍ର; ଗୋମାଂସ ବିକ୍ରିକୁ ନେଇ ଭଙ୍ଗାରୁଜା ଓ ପୋଡ଼ାଜଳା

ଗୁରୁବାର ଗୋମାଂସ ବିକ୍ରିକୁ ନେଇ ସୁନ୍ଦରଗଡ଼ରେ ଉତ୍ତେଜନା ପ୍ରକାଶ ପାଇଥିଲା । ରିଜେଣ୍ଟ ମାର୍କେଟ୍ ପାଲଟିଥିଲା ରଣକ୍ଷେତ୍ର । ୨ ଗୋଷ୍ଠୀ ମଧ୍ୟରେ ସଂଘର୍ଷ ହୋଇଥିବା ବେଳେ ଢେଲା ପଥର ମାଡ଼ ହୋଇଛି । ଏକାଧିକ କାର୍ ଭଙ୍ଗାରୁଜା ସହ ଦୋକାନରେ ନିଆଁ ଲଗାଇ ଦେଇଛନ୍ତି ।

ଉଭୟ ପକ୍ଷରୁ ଢେଲାମାଡ଼ ହୋଇଥିବା ବେଳେ ଏଥିରେ ମୋଟ ୧୨ ଜଣ ଆହତ ହୋଇଛନ୍ତି । ଆହତଙ୍କ ମଧ୍ୟରେ ୪ ପୋଲିସ କର୍ମଚାରୀ ମଧ୍ୟ ଅଛନ୍ତି । ଉତ୍ତେଜନା ରିଜେଣ୍ଟ ମାର୍କେଟରୁ ଡେଲି ମାର୍କେଟକୁ ବ୍ୟାପିଛି । ଉତ୍ତେଜନା ଲାଗି ରହିଥିବା ବେଳେ ସହରରେ ପୋଲିସ ୧୬୩ ଧାରା ଲାଗୁ କରିଛି ।

ସୁନ୍ଦରଗଡ଼ ସହରରେ ଥିବା ସମସ୍ତ ଦୋକାନ ବଜାର ବନ୍ଦ କରିବାକୁ ପୋଲିସ ମାଇକ୍‌ରେ ପ୍ରଚାର କରୁଛି । ଡେଲି ମାର୍କେଟର ଥିବା କୁକୁଡ଼ା ଓ ମଟନ ଦୋକାନ ଭଙ୍ଗାରୁଜା ସହ ରାସ୍ତା କଡ଼ରେ ଥିବା ଏକାଧିକ କାର ଭାଙ୍ଗିବା ସହ ଏକ ପିକଅପ୍‌କୁ ଜାଳି ଦେଇଛନ୍ତି ।

ସହରରେ ୧୬୩ ଧାରା ଜାରି କରାଯିବା ୧୦ ପ୍ଲାଟୁନ୍‌ରୁ ଅଧିକ ପୋଲିସ ମୁତୟନ କରାଯାଇଛି । ପଶ୍ଚିମାଞ୍ଚଳ ଡିଆଇଜି ବ୍ରିଜେଶ କୁମାର ରାୟ ପହଞ୍ଚି ସ୍ଥିତି ଉପରେ ନଜର ରଖିଛନ୍ତି । ଡିଆଇଜି କହିଛନ୍ତି, "ଉତ୍ତେଜନା ପରେ ପୋଲିସ ପଦକ୍ଷେପ ନେଇଛି । ସ୍ଥିତି ନିୟନ୍ତ୍ରଣକୁ ଆସୁଛି ।"

ଏଥିସହ ପଢ଼ନ୍ତୁ: ବିଶ୍ଵକପ୍‌ ପୂର୍ବରୁ ବାଂଲାଦେଶ କ୍ରିକେଟ୍‌ରେ ଝଡ଼; ଖେଳିବାକୁ ମନା କରିଦେଲେ ସବୁ ଖେଳାଳି

ସୁନ୍ଦରଗଡ଼ ଏସପିଙ୍କ ସମେତ ଅନ୍ୟ ପୋଲିସ ଅଧିକାରୀ ପହଞ୍ଚି ସ୍ଥିତିକୁ ନିୟନ୍ତ୍ରଣ କରିବାକୁ ପ୍ରୟାସ କରୁଛନ୍ତି । ସୁନ୍ଦରଗଡ଼ ଉପଜିଲ୍ଲାପାଳ ଓ ଅତିରିକ୍ତ ଜିଲ୍ଲାପଳଙ୍କ ଉପସ୍ଥିତିରେ ଉଭୟ ପକ୍ଷ ସହ ଆଲୋଚନା ହୋଇଛି ।

ତେବେ ଗୋମାଂସ କିଏ, କେଉଁଠୁ ଆଣି ବିକ୍ରି କରୁଥିଲା ? ସତରେ ତାହା ଗୋମାଂସ ନା ଉତ୍ତେଜନା ସୃଷ୍ଟି ପାଇଁ ଏଭଳି କେହି କରିଛି ? ତାହା ସ୍ପଷ୍ଟ ହୋଇ ନଥିବା ବେଳେ ସ୍ଥିତିକୁ ନିୟନ୍ତ୍ରଣକୁ ଆଣି ସହରରେ ଶାନ୍ତି ବଜାୟ ରଖିବାକୁ ପୋଲିସ ପଦକ୍ଷେପ ନେଉଛି । ତଥାପି ୨ ଗୋଷ୍ଠୀର ଢେଲାପଥର ମାଡ଼ରେ ଏକାଧିକ ଲୋକ ଆହତ ହୋଇଥିବା ବେଳେ ଅନେକ ଗାଡ଼ି ଭଙ୍ଗାରୁଜା ହୋଇଛି ।