Argus News - ସୁନ୍ଦରପଦା ବୋମା ବିସ୍ଫୋରଣ ଘଟଣାରେ ଚାଞ୍ଚଲ୍ୟ, ଘଟଣାସ୍ଥଳରୁ ଜବତ ହେଲା RDX

ଭୁବନେଶ୍ବର ସୁନ୍ଦରପଦା ବୋମା ବିସ୍ଫୋରଣ ଘଟଣାରେ ଚାଞ୍ଚଲ୍ୟ । ଘଟଣାସ୍ଥଳରୁ ଜବତ ହୋଇଛି RDX । ଯାହାକୁ ରାଜ୍ୟ ଫରେନସିକ ଲ୍ୟାବକୁ ପଠାଇଛି ପୋଲିସ । କୁହାଯାଉଛି ବୋମାରେ ବ୍ୟବହାର ହେଉଥିଲା ମାରାତ୍ମକ ରସାୟନିକ । ଏଠି ପ୍ରଶ୍ନ ଉଠୁଛି, ଓଡ଼ିଶାକୁ ଅଶାନ୍ତ କରିବାକୁ ହୋଇଥିଲା କି ବଡ଼ ଷଡ଼ଯନ୍ତ୍ର ? କେଉଁଠି କରାଯାଇଥାନ୍ତା ବିସ୍ଫୋରଣ ? କେବେଠାରୁ ବୋମା ତିଆରି ଚାଲିଥିଲା ?

ହେକ୍ସାହାଇଡ୍ରୋ ଟ୍ରାଇନାଇଟ୍ରୋ ଟ୍ରାୟାଯାଇନ- ଅତ୍ୟନ୍ତ ଶକ୍ତିଶାଳୀ ସାମରିକ ନାଇଟ୍ରାମାଇନ୍ ବିସ୍ଫୋରକ । ଯାହାକୁ ବଡ଼ ବଡ଼ ବିସ୍ଫୋରଣ ସମୟରେ ବ୍ୟବହାର କରାଯାଏ । ଆଉ ଏହି ମାରାତ୍ମକ ରସାୟନିକ ମିଳିଛି ସୁନ୍ଦରପଦା ଆଜାଦ ନଗର ବୋମା ବିସ୍ଫୋରଣ ସ୍ଥଳରୁ । ଏହାକୁ ରାଜ୍ୟ ଫରେନସିକ ଲ୍ୟାବକୁ ପଠାଯାଇଛି । ଫରେନସିକ ରିପୋର୍ଟ ଆସିବା ପରେ ବୋମା ବିସ୍ଫୋରଣର ଗୁମର ଖୋଲିବା ବୋଲି ପୋଲିସ ଆଶା ରଖିଛି ।

ସେପଟେ ଦୁଇଦିନ ଧରି ଆହତମାନଙ୍କ ବୟାନ ରେକର୍ଡ କରିବା ସହ ଘର ମାଲିକଙ୍କୁ ପଚରା ଉଚରା କରିଛି NIA । ପ୍ରଶ୍ନ ଉଠୁଛି ଓଡ଼ିଶାକୁ ଅଶାନ୍ତ କରିବାକୁ ହୋଇଥିଲା କି ବଡ଼ ଷଡ଼ଯନ୍ତ୍ର ? କେଉଁଠି କରାଯାଇଥାନ୍ତା ବିସ୍ଫୋରଣ ? RDX ରାସାୟନିକ କେଉଁଠୁ ଆଣିଥିଲେ ଅଭିଯୁକ୍ତ ? କାହାକୁ ଏଭଳି ବୋମା ତିଆରି କରିକି ଦିଆଯାଇଥାନ୍ତା ?

କେବେଠାରୁ ବୋମା ତିଆରି ଚାଲିଥିଲା ?

ଗତ ୨୭ ତାରିଖରେ କୁଖ୍ୟାତ ଅପରାଧୀ ସାହାନବାଜ ମଲ୍ଲିକ ଓରଫ ମଫି ସୁନ୍ଦରପଦା ଆଜାଦନଗରରେ ଭଡ଼ା ଘର ଛାତ ଉପରେ ବୋମା ଭିଡୁଥିବା ବେଳେ ବିସ୍ଫୋରଣ ହୋଇଥିଲା । ବିସ୍ଫୋରଣ ଏତେ ଭୟଙ୍କର ହୋଇଥିଲା ଯେ, ସ୍ଥାନୀୟ ଅଞ୍ଚଳ ଥରହର ହୋଇଥିଲା । ପୋଲିସ ଓ ସାଇଣ୍ଟଫିକ ଟିମ୍ ଘଟଣାସ୍ଥଳରୁ ନମୁନା ସଂଗ୍ରହ କରିଥିଲେ । ନମୁନାରୁ ଯାହା ମିଳିଥିଲା ତାହା କମିଶନରେଟ୍‌ ପୋଲିସକୁ ଚକିତ କରିଥିଲା । ବୋମା ବିସ୍ଫୋରଣ ଘଟଣାରେ NIA ଜୋରଦାର ତଦନ୍ତ କରୁଥିବା ବେଳେ, ଖୁବ୍‌ଶୀଘ୍ର ସମସ୍ତ ତଥ୍ୟ ସାମ୍ନାକୁ ଆସିବା ବୋଲି ଆଶା କରାଯାଉଛି ।