ମୟୂରଭଞ୍ଜ: ପଞ୍ଚାୟତ ଅଫିସରୁ ଚାଉଳ ଚୋରାଇ ନେଇ ଯାଉଥିବାବେଳେ ଯୋଗାଣ ସହାୟକଙ୍କୁ ଅଟକ ରଖିଲେ ଗ୍ରାମବାସୀ । ଏଭଳି ଅଭାବନୀୟ ଘଟଣା ଘଟିଛି ବାରିପଦା ସଦର ଥାନା ଅନ୍ତର୍ଗତ ବାଉଁଶବିଲା ପଞ୍ଚାୟତ ନିକଟରେ । ଅଟକ ଯୋଗାଣ ସହାୟକ ହେଲେ ଯଶୋବନ୍ତ ବାରିକ । ଘଟଣା ମୁତାବକ ଆଜି ସକାଳୁ ଅଫିସ ଗୋଦାମ ଖୋଲି ୬୦ କି:ଗ୍ରା ଚାଉଳ ମଟରସାଇକେଲ ଯୋଗେ ନେଇ ଯାଉଥିବାବେଳେ ଗ୍ରାମବାସୀମାନେ ଜାଣିପାରି ଯୋଗାଣ ସହାୟକଙ୍କୁ ଅଟକ ରଖି ପଚରାଉଚରା କରିଥିଲେ ।

ତେବେ ତାଙ୍କ ପାଖରୁ ସନ୍ତୋଷ ଜନକ ଉତ୍ତର ନମିଳିବାରୁ ଗ୍ରାମବାସୀ ତାଙ୍କୁ ଅଟକ ରଖି ସ୍ଥାନୀୟ ବିଡ଼ିଓ , ଜନପ୍ରତିନିଧି ଓ ପୁଲିସକୁ ଖବର ଦେଇଥିଲେ । ପୂର୍ବରୁ ମଧ୍ୟ ୪-୫ ଥର ଚାଉଳ ଚୋରି କରିଥିବା ନେଇ ଗ୍ରାମବାସୀ ଆଗରୁ ଜାଣିଥିଲେ । ପଞ୍ଚାୟତର ଅକ୍ଷମ, ଭୋକିଲା ହୀତାଧିକାରୀ ପ୍ରଦାନ କରିବା ନିୟମ ଥିବା ସତ୍ତ୍ୱେ ସେମାନେ ମାଗିଲେ ମଧ୍ୟ ତାଙ୍କୁ ଚାଉଳ ପ୍ରଦାନ କରୁନଥିବାବେଳେ କିପରି ନିଜେ ଏତେ ଚାଉଳ ଚାଲାଣ କରୁଥିଲେ ତାକୁ ନେଇ ଗ୍ରାମବାସୀ ଅଭିଯୋଗ କରିଛନ୍ତି ।

ତେବେ ଯୋଗାଣ ସହାୟକ ୩୦ କିଲୋ ଚାଉଳ ଜଣେ ହୀତାଧିକାରୀଙ୍କୁ ପ୍ରଦାନ କରିବାକୁ ଇସ୍ୟୁ କରିଥିବାବେଳେ ଅଧିକ ୩୦ କିଲୋ ଚାଉଳ ନେଉଥିବା ନେଇ ସନ୍ତୋଷ ଜନକ ଉତ୍ତର ଦେଇ ପାରିନଥିଲେ । ଘଟଣାସ୍ଥଳରେ ବାରିପଦା ସଦର ପୋଲିସ ପହଞ୍ଚି ଅଭିଯୁକ୍ତ ଯୋଗାଣ ସହାୟକଙ୍କୁ ଥାନା ଆଣି ତଦନ୍ତ ଜାରି ରଖିଛି । ତେବେ ଏଭଳି ଦୁର୍ନୀତିଖୋର ଯୋଗାଣ ସହାୟକଙ୍କୁ ପଞ୍ଚାୟତରୁ ବିଦା କରି ନୂତନ କର୍ମଚାରୀ ରଖିବା ଏବଂ ତଦନ୍ତ କରି ଦୋଷୀ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଗ୍ରାମବାସୀ ଦାବି କରିଛନ୍ତି ।

ଆହୁରି ପଢନ୍ତୁ ଓଡିଶା ଖବର...

Argus News | argus news | Odisha Latest News, Breaking News, Trending News, Live TV