ଅର୍ଗସ ବ୍ୟୁରୋ: କେବେ ହଁ କେବେ ନାଁ, କାହା ମୁହଁରେ ପଜିଟିଭ୍ ଆଉ କାହା ମୁହଁରେ ନିଗେଟିଭ୍। ଏମିତି 5 ଦିନ ବିତିଲାଣି। କିନ୍ତୁ ଛିଡୁନି ଅଙ୍କ। ଦୂର ହେଉନି ଦ୍ବନ୍ଦ୍ବ। ବିଜେଡି-ବିଜେପି ମେଣ୍ଟକୁ ନେଇ ଏବେ ବି ଲାଗି ରହିଛି ସସପେନ୍ସ । ଦ୍ଵନ୍ଦ୍ବରେ ଉଭୟ ଦଳର ନେତା ଓ କର୍ମୀ। ବିଜେପିର ରାଜ୍ୟ ସଭାପତି, ନିର୍ବାଚନ ପ୍ରାଭାରୀଙ୍କ ପରେ ଆଜି ମେଣ୍ଟ ଚର୍ଚ୍ଚାକୁ ଖଣ୍ଡନ କରିଛନ୍ତି ନିର୍ବାଚନ ସହ ପ୍ରଭାରୀ ଲତା ଉସେନ୍ଦି। ସିଧାସଳଖ ମେଣ୍ଟ ଆଲୋଚନାକୁ ଖଣ୍ଡନ କରିଛନ୍ତି । କହିଛନ୍ତି ଦିଲ୍ଲୀ ବୈଠକରେ କେବଳ ନିର୍ବାଚନ ଲଢ଼ିବା ନେଇ ହୋଇଥିଲା ଆଲୋଚନା । ଅନ୍ୟପଟେ ଶନିବାର ସଂଧ୍ୟାରେ ବିଜେଡ଼ି ସୁପ୍ରିମୋ ନବୀନ ପାଣ୍ଡିଆନଙ୍କର ଏହି ଇନଷ୍ଟା ରିଲ୍ସ ବଢ଼ାଇ ଦେଇଛି ମେଣ୍ଟ ଦ୍ବନ୍ଦ୍ବ।

ରାଜନୀତିରେ ମିଛ ଆଉ ଗୁଜବ ଖରାପ ବୋଲି କହିଲେ ବିଜେଡି ସୁପ୍ରିମୋ। ନବୀନ ଓ ପାଣ୍ଡିଆନଙ୍କ ଏ ଭିଡିଓ ବାର୍ତ୍ତା ଏମିତି ସମୟରେ ଆସିଛି ଯେତେବେଳେ ଜୋରଦାର ଚାଲିଛି ମେଣ୍ଟ ଚର୍ଚ୍ଚା। କୁହାଯାଉଛି ମେଣ୍ଟ ଆଡ଼କୁ ଇଙ୍ଗିତ କରି ଗୁଜବ ଓ ମିଛ କଥା କହିଛନ୍ତି ମୁଖ୍ୟମନ୍ତ୍ରୀ । କିନ୍ତୁ ମୁଖ୍ୟମନ୍ତ୍ରୀ ସ୍ପଷ୍ଟ କଲେନାହିଁ କିଏ କହୁଛି ମିଛ ଆଉ କିଏ କରୁଛି ଗୁଜବ ପ୍ରଚାର। ପ୍ରଶ୍ନ ହେଲା ମେଣ୍ଟ ନେଇ ନିଜ ଦଳର ନେତା ଓ କର୍ମୀଙ୍କ ଭିତରେ ଦ୍ଵନ୍ଦ୍ବ ଲାଗି ରହିଥିବା ବେଳେ କାହିଁକି ସ୍ପଷ୍ଟ କରୁ ନାହାନ୍ତି ନବୀନ । ମେଣ୍ଟ ନେଇ ବିଜେଡି-ବିଜେପି ଭିତରେ ଆଲୋଚନା ଚାଲିଛି ନା ନାହିଁ କାହିଁକି ଦ୍ବନ୍ଦ୍ବ ଦୂର କରୁନାହାନ୍ତି । ବିଜେପି ନେତୃତ୍ବ ଏକାକୀ ଲଢ଼ିବେ ବୋଲି ଦୃଢ଼ୋକ୍ତି କରୁଥିବାବେଳେ ନବୀନ ସେମିତି କିଛି କହିନାହାନ୍ତି। ପ୍ରଶ୍ନ ହେଲା ବିଜେଡି ପାଖରେ ରହିଛି କି କିଛି ବାଧ୍ୟ ବାଧ୍ୟକତା । ଆଉ ଏ ନେଇ ବିଜେଡି ନେତା କହୁଛନ୍ତି ସୁପ୍ରିମୋଙ୍କ ନିଷ୍ପତ୍ତି ଚୂଡ଼ାନ୍ତ।

ପ୍ରକୃତରେ ମେଣ୍ଟ ପାଇଁ କସରତ ଚାଲିଛି ନା ଏହା ଗୁଜବ। ତାକୁ ନେଇ ଏବେ ବି ସସପେନ୍ସ। କେଉଁଠି ରହିଛି ଅସୁବିଧା। ତୁଟୁନି କେଉଁ ଗଣିତ । ଛିଣ୍ଡୁନି କି ଆସନ ଭାଗ ବଣ୍ଟା। ନା ଶୀର୍ଷ ନେତୃତ୍ବଙ୍କ ସହମତିରେ ସହମତ ହେଇପାରୁ ନାହାଁନ୍ତି ଗ୍ରାଉଣ୍ଡ ନେତୃତ୍ୱ । ୟା ଭିତରେ ପୁଣି ଥରେ ଗଣମାଧ୍ୟମକୁ ସାମ୍ନା କରିଛନ୍ତି ବିଜେପି ରାଜ୍ୟ ସଭାପତି ମନମୋହନ ସାମଲ। କହିଛନ୍ତି କୌଣସି ବୈଠକ ସ୍ଥିର ହୋଇନାହିଁ। ଦିଲ୍ଲୀରୁ ଡାକରା ଆସିଲେ ଯିବ ବିଜେପି ଟିମ୍। କଣ ଆଲୋଚନା ହେବ ନିଷ୍ପତ୍ତି ନେବେ ଶୀର୍ଷ ନେତୃତ୍ବ। । ମୁଖ୍ୟମନ୍ତ୍ରୀଙ୍କ 'ଗୁଜବ ଓ ମିଛ' ମନ୍ତବ୍ୟ ଉପରେ କୌଣସି ମନ୍ତବ୍ୟ ଦେବାକୁ ମନା କରିଦେଇଛନ୍ତି ମନମୋହନ। କହିଛନ୍ତି ଜନତା ହିଁ ବିଚାରପତି, ସେମାନେ ହିଁ ନେବେ ନିଷ୍ପତ୍ତି।

୫ ଦିନ ହେଲା ୨ ଦଳର ନେତା ଓ କର୍ମୀଙ୍କୁ ନିଦ ନାହିଁ। କେହି କିଛି ବି କହି ପାରୁ ନାହାଁନ୍ତି। ଏହା ଭିତରେ ୧୪ ତାରିଖରେ ଏନଡିଏ ବୈଠକ ଉପରେ ନଜର ରହିଛି। ଚର୍ଚ୍ଚା ହେଉଛି ତା ପୂର୍ବରୁ ଆସିପାରେ ସ୍ପଷ୍ଟ ଚିତ୍ର।

ଅଧିକ ପଢ଼ନ୍ତୁ ଓଡିଶା ଖବର:

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV