ଅର୍ଗସ ବ୍ୟୁରୋ: ପୋଲ  ଉପରେ ଚାଲିଛି ୪ ଫୁଟର ପାଣି । ପାଣିରେ ପଡିଛି ସୁଅ । ଅତି ବିପଦସଙ୍କୁଳ ଅବସ୍ଥାରେ ଲୋକେ ପୋଲ ଉପରେ ପାର ହେଉଥିବା ବେଳେ ଘଟିଲା ଅଘଟଣ । ଏକ ବାଇକରେ ଆସି ୩ ଜଣ ଯୁବକ ଉଛୁଳା ନଦୀ ପାଣି ସୁଅରେ ପୋଲ ଉପରେ ପାର ହେଉଥିବା ବେଳେ ପୋଲ ମଝିରେ ପାଣି ସୁଅରେ ଫସିଲେ ୩ ଯୁବକ । ଅଳ୍ପକେ ବର୍ତ୍ତିଗଲା ଜୀବନ । ପୋଲ ଉପରୁ ଭାସିବା ପୂର୍ବରୁ ବଞ୍ଚାଇ ଆଣିଲେ ସ୍ଥାନୀୟ ଯୁବକ । ଏଭଳି ଘଟଣା ଘଟିଛି ଉଦଳା ବ୍ଲକ କଇଁସାରୀ ଠାରେ ଥିବା ଜାମୁଘାଟ ପୋଲରେ। 

ଉପରମୁଣ୍ଡରେ ଲଗାଣ ବର୍ଷା ଜାରି ରହିବା କାରଣରୁ ନଦୀର ଜଳସ୍ତର ବୃଦ୍ଧି ପାଇଛି । ଦେଓ ନଦୀ ଫୁଲିଥିବା ବେଳେ ଜାମୁଘାଟ ପୋଲ ଉପରେ ଦେଓ ନଦୀର ୪ ଫୁଟ ଉଚ୍ଚର ପାଣି ପ୍ରବାହିତ ହୋଇଛି । ଯାହାକି ଜାମୂଘାଟ ପୋଲ ବୁଡିବା ସହିତ ଉଦଳା-ବାଲେଶ୍ୱର ଯୋଗାଯୋଗ ବାଧାପ୍ରାପ୍ତ ହୋଇଛି । ହେଲେ ଲୋକେ ଉକ୍ତ ପୋଲ ଉପରେ ୪ ଫୁଟ ପାଣିରେ ପଶି ନଦୀ ପାର ହେଉଥିଲେ । ୩ ଜଣ ଯୁବକ ଏକ ବାଇକରେ ଆସି ପାଣିରେ ପଶି ପୋଲ ପାର ହେବାକୁ ଚେଷ୍ଟା କରିଥିଲେ। ୩ ଯୁବକ ନଦୀ ସୁଅରେ ଟଳମଳ ହେବା ସହିତ ଧୀରେ ଧୀରେ ସୁଅ ମୁହଁକୁ ଚାଲିଯାଇଥିଲେ । ସେଠାରେ ୩ ଜଣ ପରସ୍ପରକୁ ଧରି ରଖି ଛିଡା ହୋଇଥିଲେ । ନଦୀର ଜଳସ୍ତର ବୃଦ୍ଧି ପାଉଥିବା ବେଳେ ସ୍ଥାନୀୟ ଯୁବକମାନେ ଯାଇ ନଦୀ ସୁଅରେ ପଶି ୩ ଜଣ ଯୁବକଙ୍କୁ ଉଦ୍ଧାର କରି କୂଳକୁ ଆଣିଥିଲେ। 

ଅଧିକ ପଢ଼ନ୍ତୁ ଓଡ଼ିଶା ଖବର