ଆଦିବାସୀ ଜମି ହସ୍ତାନ୍ତର ଅଧ୍ୟାଦେଶକୁ ନେଇ ବଢ଼ିବାରେ ଲାଗିଛି ବିବାଦ
ଅର୍ଗସ ବ୍ୟୁରୋ : ଲଗାତାର ଦୁଇ ଦିନ ଧରି ବିଧାନସଭାରେ ବିରୋଧୀଙ୍କ ହଙ୍ଗାମା । ଆଦିବାସୀ ଜମି ହସ୍ତାନ୍ତର ଅଧ୍ୟାଦେଶ ପ୍ରତ୍ୟାହାର ପାଇଁ ବିରୋଧୀଙ୍କ ଜୋରଦାର ପ୍ରତିବାଦ । ମାତ୍ର ଜିଦରେ ଅଟଳ ସରକାର, ପ୍ରତ୍ୟାହାର ପାଇଁ ଦେଖାଉ ନାହାନ୍ତି ଆଗ୍ରହ । ଯେଉଁଥିପାଇଁ ଅଧ୍ୟାଦେଶ ପ୍ରତ୍ୟାହାର ସହ ଗୃହର ସ୍ଥିତି ବିଷୟରେ ରାଜ୍ୟପାଳଙ୍କ ପାଖରେ ଫେରାଦ ହୋଇଛି ବିଜେପି ।
ଅଧିକ ପଢନ୍ତୁ : ଆଦିବାସୀଙ୍କ ଜମି ହସ୍ତାନ୍ତର ନିଷ୍ପତ୍ତି ସ୍ଥଗିତ ପରେ ବ୍ୟାକଫୁଟରେ ବିଜେଡି ସରକାର
ବିଧାନସଭାରୁ ରାଜଭବନ ଅଭିମୁଖେ ପଦଯାତ୍ରାରେ ଯାଇ ରାଜ୍ୟପାଳଙ୍କୁ ଦାବି ପତ୍ର ଦେଇଛି ବିଜେପି ବିଧାୟକ ଦଳ । ପରେ ଅପରାହ୍ନ ଅଧିବେଶନରେ ରାଜସ୍ବ ମନ୍ତ୍ରୀଙ୍କ ଅପରିପକ୍ୱ ଅଧ୍ୟାଦେଶ ବିବୃତିକୁ ନେଇ ବର୍ଷିଛନ୍ତି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ଓ ବିରୋଧୀ ଦଳ ମୁଖ୍ୟ ସଚେତକ ମୋହନ ମାଝୀ । ଯାହାର ଜବାବ ରଖିଛି ବିଜେଡି ।
ସେପଟେ ଗୃହ ବାହାରେ ସାମ୍ବାଦିକ ସମ୍ମିଳନୀ କରି ରାଜ୍ୟବ୍ୟାପୀ ଆନ୍ଦୋଳନର ଚେତାବନୀ ଦେଇଛି କଂଗ୍ରେସ । ଅନ୍ୟପଟେ ରାଜ୍ୟ ସରକାରଙ୍କ ଏପରି ଅଧ୍ୟାଦେଶକୁ ନେଇ ଉଦବେଗ ପ୍ରକାଶ କରିଛନ୍ତି ଛତିଶଗଡ଼ ରାଜ୍ୟପାଳ । କହିଛନ୍ତି, ରାଜ୍ୟରେ ଆଦିବାସୀ ମାନେ ଅବହେଳିତ । ଆଦିବାସୀଙ୍କୁ ମାନବିକ ଅଧିକାରରୁ ବଞ୍ଚିତ କରା ନ ଯାଉ । ଆଧ୍ୟାଦେଶକୁ ନେଇ ବିବାଦ ବଢି ଚାଲିଥିବା ବେଳେ ଜିଦରେ ଅଟଳ ରହିବା ଏବଂ ତାକୁ ପ୍ରତ୍ୟାହାର ନ କରିବାକୁ ନେଇ ସରକାରଙ୍କ ଆଭିମୁଖ୍ୟ ଉପରେ ଉଠିଛି ପ୍ରଶ୍ନ ।
