Argus News - ରାତି ପାହିଲେ ଓଡ଼ିଶାରେ ଚତୁର୍ଥ ପର୍ଯ୍ୟାୟ ନିର୍ବାଚନ

ଅର୍ଗସ ବ୍ୟୁରୋ: ରାତି ପାହିଲେ ଓଡ଼ିଶାରେ ଚତୁର୍ଥ ପର୍ଯ୍ୟାୟ ନିର୍ବାଚନ । ଦେଶରେ ସପ୍ତମ ତଥା ରାଜ୍ୟର ଏହି ଚତୁର୍ଥ ପର୍ଯ୍ୟାୟ ନିର୍ବାଚନ ପାଇଁ ପ୍ରସ୍ତୁତ ୬ ଲୋକସଭା ଓ ଏହା ଅନ୍ତର୍ଗତ ୪୨ ବିଧାନସଭା ଆସନର ଭୋଟର । ଏଥିପାଇଁ ନିର୍ବାଚନ କମିଶନ ତଥା ଜିଲ୍ଲା ଓ ପୋଲିସ ପ୍ରଶାସନ ପକ୍ଷରୁ ସବୁ ବ୍ୟବସ୍ଥା ସରିଛି । ଏହି ପର୍ଯ୍ୟାୟରେ ମୋଟ୍ 66 ସାଂସଦ ଓ 394 ବିଧାୟକ ପ୍ରାର୍ଥୀଙ୍କର ହେବ ଭାଗ୍ୟ ପରୀକ୍ଷା । ଯେଉଁମାନଙ୍କ ମଧ୍ୟରେ ରହିଛନ୍ତି ପ୍ରତାପ ଷଡ଼ଙ୍ଗୀ, ବୈଜୟନ୍ତ ପଣ୍ଡା, ଶ୍ରୀକାନ୍ତ ଜେନା ଓ ବିଜେଡିର ଅନେକ ହେଭିୱେଟ୍।

ଦେଶରେ ସପ୍ତମ, ରାଜ୍ୟରେ ଚତୁର୍ଥ ପର୍ଯ୍ୟାୟ । ରାତି ପାହିଲେ ଭୋଟ୍ ଦେବେ ରାଜ୍ୟର ୬ ଲୋକସଭା ଓ ଏହା ଅନ୍ତର୍ଗତ ୪୨ ବିଧାନସଭା ଆସନର ଭୋଟର । ମୟୂରଭଞ୍ଜ, ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡ଼ା ଓ ଜଗତସିଂହପୁର  ଲୋକସଭା ଆସନ ଏବଂ ଏହା ଅଧିନରେ ଆସୁଥିବା ସମସ୍ତ ବିଧାନସଭା ଆସନରେ ମତଦାନ ଲାଗି ସରିଛି ସବୁ ପ୍ରକାର ପ୍ରସ୍ତୁତି । ମୋଟ୍ 99.61 ଲକ୍ଷ ଭୋଟର ଆସନ୍ତକାଲି ମତଦାନ କରିବାକୁ ଥିବା ବେଳେ ସେମାନଙ୍କ ମଧ୍ୟରେ ରହିଛନ୍ତି 50.88 ଲକ୍ଷ ଲକ୍ଷ ପୁରୁଷ ଓ 48.72 ଲକ୍ଷ ମହିଳା ଭୋଟର । ଏଥିପାଇଁ 10 ହଜାର ୮୮୨ ପୋଲିଂ ବୁଥର ବ୍ୟବସ୍ଥା କରାଯାଇଛି ଯେଉଁଠି 70 ହଜାରରୁ ଅଧିକ ପୋଲିଂ କର୍ମଚାରୀ ନିର୍ବାଚନ ପରିଚାଳନା କରିବେ । ସେହିପରି ସୁରକ୍ଷା ବ୍ୟବସ୍ଥା ମଧ୍ୟ ବେଶ କଡ଼ାକଡ଼ି କରାଯାଇଛି । ରାଜ୍ୟ ପୋଲିସ ସହ ୧୨୬ କମ୍ପାନୀ କେନ୍ଦ୍ରୀୟ ଫୋର୍ସ ମୁତୟନ କରାଯାଇଛି। 

ମତଦାନ ହେବାକୁ ଥିବା ୬ ଲୋକସଭା ଆସନ ମଧ୍ୟରୁ ଗତଥର ବିଜେପି ମୟୂରଭଞ୍ଜ ଓ ବାଲେଶ୍ବରରେ ବାଜି ମାରିଥିବା ବେଳେ ବିଜେଡିକୁ ମିଳିଥିଲା ୪ଟି ଆସନରେ ସଫଳତା । ସେହିପରି ୪୨ ବିଧାନସଭା କ୍ଷେତ୍ରରେ ବିଜେଡି ୩୩, ବିଜେପି ୯ଟି ଆସନ ହାତେଇବାରେ ସଫଳ ହୋଇଥିଲେ । ଏଥର 6ଟି ଲୋକସଭା ଆସନରେ 66 ସାଂସଦ ପ୍ରାର୍ଥୀ  ଓ ୪୨ ବିଧାନସଭା ଆସନରେ 394 ଜଣ ବିଧାୟକ ପ୍ରାର୍ଥୀ ଅଛନ୍ତି | ତେବେ ଏହି ପର୍ଯ୍ୟାୟ ସର୍ବାଧିକ ଫୋକସ ରହିଛି ବାଲେଶ୍ବର ଲୋକସଭା ଆସନ ଉପରେ । ରନିଂ ଏମପି ପ୍ରତାପ ଷଡ଼ଙ୍ଗୀ ଆସନରୁ ଲୋକସଭା ଲଢ଼ୁଛନ୍ତି । ସେହିପରି କଂଗ୍ରେସରୁ ଶ୍ରୀକାନ୍ତ ଜେନା ଓ ବିଜେପିରୁ ଯାଇ ଲେଖାଶ୍ରୀ ସାମନ୍ତସିଂହାର ବିଜେଡିରୁ ପ୍ରତିଦ୍ବନ୍ଦ୍ବତା କରୁଛନ୍ତି । ଏହାଛଡ଼ା କେନ୍ଦ୍ରାପଡ଼ାରୁ ବୈଜୟନ୍ତ ପଣ୍ଡା, ଜଗତସିଂହପୁର ଲୋକସଭା ଆସନରୁ ବିଭୂ ତରାଇ ମୈଦାନରେ ଅଛନ୍ତି । ମୟୂରଭଞ୍ଜ ଲୋକସଭା ଆସନରୁ ସୁଦାମ ମାର୍ଣ୍ଡି ମଧ୍ୟ ବିଜେଡି ପ୍ରାର୍ଥୀ ହୋଇଛନ୍ତି । ସେହିପରି ବିଧାନସଭା କଥା ଦେଖିଲେ ମନ୍ତ୍ରୀ ପ୍ରୀତି ରଞ୍ଜନ ଘଡ଼ାଇ, ଅଶ୍ବିନୀ ପାତ୍ର, ପ୍ରତାପ ଦେବ, ତୁଷାରକାନ୍ତି ବେହେରା ପ୍ରମୁଖ ନିର୍ବାଚନ ଲଢ଼ୁଛନ୍ତି । ବାଚସ୍ପତି ପ୍ରମିଳା ମଲ୍ଲିକଙ୍କ ସହ ରାଜ୍ୟ ବିଜେପି ସଭାପତି ମନମୋହନ ସାମଲ,  ପ୍ରଣବ ବଳବନ୍ତରାୟ, ପ୍ରଫୁଲ୍ଲ ସାମଲ, ନିରଞ୍ଜନ ପଟ୍ଟନାୟକଙ୍କ ପରି ହେଭିୱେଟ ନିର୍ବାଚନ ଲଢ଼ୁଛନ୍ତି ।  

ଆସନ୍ତାକାଲି ସନ୍ଧ୍ୟାରେ ନିର୍ବାଚନ ସରିବା ପରେ ସାଢ଼େ ୬ରେ ଆସିବ ବୁଥି ବାହୁଡ଼ା ମତ । ଗୋଟିଏ ପଟେ ଡବଲ୍ ଇଞ୍ଜିନ ସରକାରର ନାରା ଫୁଲଫିଲ୍ ପାଇଁ ବିଜେପି ପୂରା ଦମଖମ୍ ଲଗାଇଥିବା ବେଳେ ବିଜେଡି ଷଷ୍ଠ ଥର କ୍ଷମତା ଦଖଲ ପାଇଁ ଟଙ୍କାବଣ୍ଟା ଠାରୁ ଆରମ୍ଭ କରି ଧମକଚମକ ହିଂସାର ସାହାରା ନେଉଥିବା ଲଗାତାର ସାମ୍ନାକୁ ଆସୁଛି । ତେଣୁ ଏଭଳି ସ୍ଥିତିରେ ଆସନ୍ତାକାଲି ଏହି ସବୁ ଆସନରେ ମତଦାନ ବେଶ ଗୁରୁତ୍ବପୂର୍ଣ୍ଣ। 

ଅଧିକ ପଢ଼ନ୍ତୁ ଓଡ଼ିଶା ଖବର