Argus News - ପାଣ୍ଡିଆନଙ୍କ ପ୍ରୋମୋସନ ପାଇଁ ନବୀନ ସରକାର ଖର୍ଚ୍ଚ କରିଥିଲା ସାଢ଼େ 15 କୋଟି ଟଙ୍କା

ଅର୍ଗସ ବ୍ୟୁରୋ: ପ୍ରମୋସନ ପାଣି ଭଳି ଟଙ୍କା ଖର୍ଚ୍ଚ । ପାଣ୍ଡିଆନ ପ୍ରୀତିରେ ପଡ଼ିଥିଲା ପୂର୍ବ ବିଜେଡ଼ି ସରକାର । ଅଘୋଷିତ ସୁପର ସିଏମ ସାଜିଥିବା ଭି. କାର୍ତ୍ତିକେୟନ ପାଣ୍ଡିଆନଙ୍କ ଫଟୋ ଲଗାଇ ବିଜ୍ଞାପନ ପାଇଁ ରାଜ୍ୟ ରାଜକୋଷକୁ ସାହାଣମେଲା କରି ଦେଇଥିଲେ ନବୀନ । ବିଧାନସଭା ଉତ୍ତରରୁ ସାମ୍ନାକୁ ଆସିଲା ଆଖି ତରାଟି ହୋଇଗଲା ଭଳି ତଥ୍ୟ । ବିଧାନସଭାରେ ବିଜେପି ବିଧାୟକ ଲକ୍ଷ୍ମଣ ବାଗଙ୍କ ପ୍ରଶ୍ନରେ ଲିଖିତ ଉତ୍ତର ରଖିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ।  ନଜର ପକାନ୍ତୁ ଏହି ଦସ୍ତାବିଜ ଉପରେ । ସୂଚନା ଓ ଲୋକ ସମ୍ପର୍କ ବିଭାଗ ତରଫରୁ କେତେକ ବିଶେଷ କାର୍ଯ୍ୟକ୍ରମ ପାଇଁ କିଛି ଖବରକାଗଜରେ ବିଜ୍ଞାପନ ଦିଆଯାଇଥିଲା । ଯେଉଁଥିରେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ପୂର୍ବତନ 5T ସଚିବ ଓ ଅଧ୍ୟକ୍ଷଙ୍କ ଫଟୋ ଛପା ଯାଇଥିଲା । ଯେଉଁଥିପାଇଁ ତତ୍କାଳୀନ ବିଜେଡ଼ି ସରକାର 15 କୋଟି 26 ଲକ୍ଷ 91 ହାଜର 933 ଟଙ୍କା ଖର୍ଚ୍ଚ କରିଥିଲେ । ଏବେ ଦେଖନ୍ତୁ ଏହି ଅର୍ଥରୁ କେଉଁ ବିଜ୍ଞାପନ ପାଇଁ କେତେ ଖର୍ଚ୍ଚ ହୋଇଛି .... ପ୍ରଥମ ବିଶ୍ଵ ଭାଷା ସାହିତ୍ୟ ସମ୍ମିଳନୀର ବିଜ୍ଞାପନ ପାଇଁ 2 କୋଟି 7 ଲକ୍ଷ 81 ହାଜର ଟଙ୍କା, ନୂଆ ଓ ଛାତ୍ରବୃତ୍ତି ସ୍ମାର୍ଟ କାର୍ଡ ସ୍କିମ୍ ପାଇଁ 1 କୋଟି 22 ଲକ୍ଷ 92 ହାଜର ଟଙ୍କା, ମାଆ ସମଲେଇ ପ୍ରକଳ୍ପ ପାଇଁ 1 କୋଟି 57 ଲକ୍ଷ ଟଙ୍କା ଏବଂ ଶ୍ରୀ ମନ୍ଦିର ପରିକ୍ରମା ପ୍ରକଳ୍ପ ବିଜ୍ଞାପନ ପାଇଁ  ପାଇଁ 10 କୋଟି 39 ଲକ୍ଷ 16 ହାଜର ଟଙ୍କା ଖର୍ଚ୍ଚ ହୋଇଛି । ଯାହା ଏବେ ବିଧାନସଭା ଉତ୍ତରରୁ ସାମ୍ନାକୁ ଆସିଛି । ତେବେ ଏ ତ ଏବେ ଧରା ପଡ଼ିଥିବା ହିସାବ । ତେବେ ଭି.କେ. ପାଣ୍ଡିଆନ 5T ସଚିବ ଏବଂ ପରବର୍ତ୍ତୀ ସମୟରେ 5T ଅଧ୍ୟକ୍ଷ ଦାୟିତ୍ବରେ ଥିବା ବେଳେ ତାଙ୍କ ଫଟୋ ସବୁ ସରକାରୀ ବିଜ୍ଞାପନରେ ଲାଗୁଥିଲା । ହୋଡ଼ିଂ, ପୋଷ୍ଟର, ବ୍ୟାନର, ଡିଜିଟାଲ ମିଡିଆ, ସୋସିଆଲ ମିଡିଆରେ ବି ଦେଖିବାକୁ ମିଳୁଥିଲା ତାଙ୍କ ଫଟୋ । ଆଉ ଏଥିପାଇଁ ସରକାରୀ ପାଣ୍ଠିରୁ ବିଭିନ୍ନ ବିଭାଗ ଖର୍ଚ୍ଚ କରିଛନ୍ତି କୋଟି କୋଟି ଟଙ୍କା । ଯାହାର ତଥ୍ୟ ସାମ୍ନାକୁ ଆସିଲେ ପାଣ୍ଡିଆନ ପ୍ରଚାର ପାଇଁ ଖର୍ଚ୍ଚ ହୋଇଥିବା ଅର୍ଥର ପରିମାଣ ଆହୁରି ବହୁଗୁଣିତ ହୋଇପାରେ । 

ତେବେ କେବଳ ଏତିକି ନୁହେଁ, 2019 ଏପ୍ରିଲରୁ 2024 ଏପ୍ରିଲ ମାସ, 5 ବର୍ଷରେ ନିଜ ପ୍ରଚାର ଖର୍ଚ୍ଚ ପାଇଁ ପୂର୍ବତନ ବିଜେଡି ସରକାର ଖର୍ଚ୍ଚ କରିଥିଲେ ୪୫୨ କୋଟି ୯୬ ଲକ୍ଷ ୧ ହଜାର ୮୦୦ ଟଙ୍କା । ବିଧାନସଭାର ବିଜେପି ବିଧାୟକ ପ୍ରଶାନ୍ତ ଜଗଦେବଙ୍କ ପ୍ରଶ୍ନରେ ମୁଖ୍ୟମନ୍ତ୍ରୀଙ୍କ ଲିଖିତ ଉତ୍ତରରୁ ସାମ୍ନାକୁ ଆସିଛି ଏହି ତଥ୍ୟ । କିନ୍ତୁ 24 ବର୍ଷ ଧରି ପ୍ରଚାର ସର୍ବସ୍ବ ସରକାରର ବ୍ରାଣ୍ଡ ଆମ୍ବାସଡର ସାଜିଥିବା ନିଜ ଦୋଷ ମାନିବାକୁ ନାରାଜ । କେନ୍ଦ୍ର ଓ ଅନ୍ୟ ରାଜ୍ୟ ସରକାର ମାନେ ବି ବିଜ୍ଞାପନ ପାଇଁ ଖର୍ଚ୍ଚ କରୁଛନ୍ତି ବୋଲି କହିଛି ବିଜେଡ଼ି । ସେପଟେ ପାଣ୍ଡିଆନଙ୍କ ପାଇଁ ଓକିଲାତି ଆରମ୍ଭ କରିଛି ବିଜେଡି । ଅନ୍ୟପଟେ ବିଜେଡିରେ ପାଣ୍ଡିଆନ୍ ଙ୍କର ଏବେ ଯେ , ଦବଦବା ରହିଛି ତାହା ପୁଣିଥରେ ପ୍ରମାଣିତ ହୋଇଛି ।

ଏଠି ପ୍ରଶ୍ନ ଉଠୁଛି, କୋଟି କୋଟି ଟଙ୍କାର ବିଜ୍ଞାପନ ଦେଇ ଜଣେ ସଚିବଙ୍କ ପ୍ରଚାରରେ କାହିଁକି ମାତିଥିଲା ପୂର୍ବ ବିଜେଡ଼ି ସରକାର ? ସରକାରୀ ବିଜ୍ଞାପନରେ କାହିଁକି ଲାଗୁଥିଲା ଜଣେ ସଚିବଙ୍କ ଫଟୋ ? ବିଜେଡ଼ିର ସର୍ବେସର୍ବା କୁହାଯାଉଥିବା ଏବଂ ପୂର୍ବ ସରକାରକୁ ନିଜ କଣ୍ଟ୍ରୋଲରେ ରଖିଥିବା ପାଣ୍ଡିଆନଙ୍କ ପ୍ରମୋସନ ପାଇଁ ଟିକସ ଦାତାଙ୍କ ଅର୍ଥ ପାଣି ଭଳି ବୁହାଇବାକୁ କିଏ ଦେଇଥିଲା ଅଧିକାର ? 

ଅଧିକ ପଢ଼ନ୍ତୁ ଓଡିଶା ଖବର...