ଅର୍ଗସ ବ୍ୟୁରୋ : ଅତୀତ ଉତ୍କଳର ଗୌରବମୟ ସଂସ୍କୃତିର ବାର୍ତ୍ତା ବହନକରେ ପବିତ୍ର କାର୍ତ୍ତିକ ପୂର୍ଣ୍ଣିମାର ବୋଇତ ବନ୍ଦାଣ ଉତ୍ସବ । ସାତ ଭାଈ ଓ ତଅପୋଇ କିମ୍ବଦନ୍ତିର ଏହି ପରମ୍ପରା । ଆକାମାବୈରେ ଗୁଂଜରିତ ସେଦିନର ଉପକୂଳ ଅଞ୍ଚଳ ସମୂହର ସ୍ୱର୍ଣିମ ଅଧ୍ୟାର ସ୍ମୃତି ଆଜିବି ଗୁଂଜରିତ ଓଡ଼ିଆଙ୍କ ପ୍ରତି ରକ୍ତବିନ୍ଦୁରେ । ଆଉ ସେହି ପରମ୍ପରାକୁ ଉତ୍ସବ ଭାବେ ପାଳନ କରିବା ନିମିତ୍ତେ ପୁର ପଲ୍ଲୀରେ ବୋଇତ ବନ୍ଦାଣ ଉତ୍ସବ ପାଳନ କରାଯାଏ ।

ବୋଇତ ବନ୍ଦାଣ ଉତ୍ସବକୁ ନେଇ ସଜେଇ ହେଉଛି ବନ୍ଦର ନଗରୀ ପାରାଦୀପ । ପାରାଦୀପ ବୋଇତ ବନ୍ଦାଣ ଉତ୍ସବରେ ଚଳିତ ବର୍ଷ ମୁଖ୍ୟ ଅତିଥି ଭାବେ ଯୋଗ ଦେବେ ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ପାରାଦୀପ ବନ୍ଦର ପକ୍ଷରୁ ଆୟୋଜନ ହେବାକୁ ଥିବା ବୋଇତ ବନ୍ଦାଣ ଉତ୍ସବରେ ରାଷ୍ଟ୍ରପତି ଯୋଗେ ଦେବାକୁ ଓଡ଼ିଶା ଆସୁଥିବା ନେଇ ରାଷ୍ଟ୍ରପତି ଭବନ ପକ୍ଷରୁ ସ୍ପଷ୍ଟ କରାଯାଇଛି । ମହାମହିମ ଆସନ୍ତା ୨୭ ତାରିଖ ଦିନ ୧୦ ଟାରେ ପାରାଦୀପରେ ପହଞ୍ଚିବେ ବୋଲି ଜଣାପଡିଛି ।

ସେହି ଭଳି ପାରାଦୀପର ପରମ୍ପରାକୁ ବଜାୟ ରଖିବା ପାଇଁ ଚଳିତ ବର୍ଷ ମଧ୍ୟ ବିଜୁ ମଇଦାନରେ ମହା ଆଡମ୍ବରରେ ବାଲିଯାତ୍ରା ଅନୁଷ୍ଠିତ ହେବ । ଏକ ହଜାର ଷ୍ଟଲ୍ ପଡ଼ିବାର ବ୍ୟବସ୍ଥା ହୋଇଛି । ସମୁଦ୍ର ବେଲା ଭୂମିକୁ ସୁନ୍ଦର ଭାବରେ ସୁସଜିତ କରାଯାଇଛି ।

କିଭଳି ଭାବରେ ଶାନ୍ତି ଶୃଙ୍ଖଳା ସହିତ ବାଲିଯାତ୍ରା କରାଯିବ ପ୍ରଶାସନ ଓ ପୌର ପରିଷଦ ପକ୍ଷରୁ ମିଳିତ ଭାବେ ବୈଠକ ଶେଷ ହୋଇଥିବା ପୌର ପରିଷଦ ଅଧ୍ୟକ୍ଷ ବସନ୍ତ ବେହେରା ପ୍ରତିକ୍ରିୟାରେ କହିଛନ୍ତି । ଯେ ହେତୁ ଚଳିତ ବର୍ଷ ମହାମହିମଙ୍କ ଗସ୍ତ ରହିଛି ବାଲିଯାତ୍ରା ପଡ଼ିଆକୁ ସରସ ସୁନ୍ଦର କରିବା ସହ ଦୃଷ୍ଟି ଆକର୍ଷଣ କରାଯାଉଛି । ପ୍ରଥମ ଥର କରି ମହାମହିମ ପାରାଦୀପ ଆସିବା ନେଇ ସମସ୍ତେ ଖୁସି ବ୍ୟକ୍ତ କରିବା ସହିତ ମହା ଆଡମ୍ବରରେ ମହାମହିମଙ୍କୁ ସ୍ବାଗତ କରିବା ପାଇଁ ପ୍ରସ୍ତୁତ ହୋଇ ରହିଛି ବନ୍ଦର ନଗରୀ ।

Argus News | argus news | Odisha Latest News, Breaking News, Trending News, Live TV