ଅର୍ଗସ ବ୍ୟୁରୋ:  କେଉଁଠି କାନ୍ଥରୁ ରଙ୍ଗ ଛାଡିଗଲାଣି ତ କେଉଁଠି କାନ୍ଥରେ ଅଙ୍କା ଯାଇଥିବା ଚିତ୍ର ଲିଭିବାକୁ ବସିଲାଣି । କେବଳ ସେତିକି ନୁହେଁ କେଉଁଠି ସିଲିଂ ପଡିଗଲାଣି ତ କେଉଁଠି ଛାତରୁ ପ୍ଲାଷ୍ଟର ଖସି ଗଲାଣି । ନିମ୍ନମାନର ଉପକରଣ ଲଗାଇଥିବାରୁ ଅଚଳ ହୋଇ ପଡିଲାଣି ଅନେକ ସାମଗ୍ରୀ । ଏ ଦୃଶ୍ୟ ହେଉଛି ପୂର୍ବ ବିଜେଡି ସରକାର ସମୟରେ ସୁବର୍ଣ୍ଣପୁର ଜିଲ୍ଲାରେ ରୂପାନ୍ତରଣ ହୋଇଥିବା ସ୍କୁଲର । ନିମ୍ନମାନର କାମ କରି ମାଲେମାଲ ହେଲେ ଠିକାଦାର, ଯନ୍ତ୍ରୀଙ୍କ ଠାରୁ ନେଇ ନେତା ମନ୍ତ୍ରୀ ପର୍ଯ୍ୟନ୍ତ । ଆଉ ସ୍କୁଲର ଏ ଅବସ୍ଥା । ଯାହାର ତଦନ୍ତ କରି ଦୃଢ କାର୍ଯ୍ୟାନୁଷ୍ଠାନ ନେବାକୁ ଜିଲ୍ଲାବାସୀ କରିଛନ୍ତି ଦାବି ।

ସରକାରୀ ତଥ୍ୟ ଅନୁସାରେ- 5T ରୂପାନ୍ତରୀକରଣ ଯୋଜନାରେ ଜିଲ୍ଲାକୁ ପ୍ରଥମ ପର୍ଯ୍ୟାୟରେ ୧୧ଟି ସ୍କୁଲ ପାଇଁ ଆସିଥିଲା ୫ କୋଟି ୨୮ ଲକ୍ଷ ଟଙ୍କା । ସେହିପରି ଦ୍ବିତୀୟ ପର୍ଯ୍ୟାୟରେ ୪୧ ବିଦ୍ୟାଳୟ ପାଇଁ ୧୯ କୋଟି ୬୮ ଲକ୍ଷ, ତୃତୀୟ ପର୍ଯ୍ୟାୟରେ ୪୬ ବିଦ୍ୟାଳୟ ପାଇଁ ୨୦ କୋଟି ୭୦ ଲକ୍ଷ ଓ ଚତୁର୍ଥ ପର୍ଯ୍ୟାୟରେ ୧୦ କୋଟି ୮୦ ଲକ୍ଷ ଟଙ୍କା । ତା ସହିତ ଅନ୍ୟାନ୍ୟ ଯୋଜନରୁ ମଧ୍ୟ ବିଦ୍ୟାଳୟଗୁଡ଼ିକରେ ଖର୍ଚ୍ଚ କରିବାକୁ ନିର୍ଦ୍ଦେଶ ଦେଇଥିଲେ ପୂର୍ବ ବିଜେଡି ସରକାର । ହେଲେ ଆଶ୍ଚର୍ଯ୍ୟର କଥା ଜିଲ୍ଲାରେ ୫୬ କୋଟି ୪୬ ଲକ୍ଷ ଟଙ୍କା ଖର୍ଚ୍ଚ ହୋଇଥିବାବେଳେ, କୌଣସି ସ୍କୁଲର ଅବସ୍ଥା ଠିକ ନାହିଁ ।

5T ନାଁରେ ହରିଲୁଟ କରୁଥିଲେ ପୂର୍ବ ସରକାର । ଛାତ୍ରଛାତ୍ରୀଙ୍କ ଭବିଷ୍ୟତ ବଦଳରେ ନିଜ ପକେଟ ଗରମ କରିବାରେ ବ୍ୟସ୍ତ ଥିଲେ ସରକାରୀ ବାବୁମାନେ । ଏବେ ଏହାର ବିଧିବଦ୍ଧ ତଦନ୍ତ ହେବା ସହିତ ଦୁର୍ନୀତିଗ୍ରସ୍ତ ଅଧିକାରୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ଦାବି ଜୋର ଧରିଛି ।

ଅଧିକ ପଢ଼ନ୍ତୁ ଓଡିଶା ଖବର: