ଅର୍ଗସ ବ୍ୟୁରୋ: କନ୍ଧମାଳ ଜିଲ୍ଲା କ ନୂଆଗାଁ ବଜାର ଠାରେ ନବ ନିର୍ମିତ ଜଗନ୍ନାଥ ମନ୍ଦିରର ରତ୍ନ ମୁଦ୍ରଣ ଉତ୍ସବ କାର୍ଯ୍ୟକ୍ରମ ଉଦଯାପିତ ହୋଇ ଯାଇଛି। ସ୍ଥାନୀୟ ଜନସାଧାରଣ ଓ କ ନୂଆଗାଁ ଜଗନ୍ନାଥ ମନ୍ଦିର କମିଟି ମନ୍ଦିର ନିର୍ମାଣ କରିଛନ୍ତି। 2018 ମସିହା ମାର୍ଚ୍ଚ 17 ତାରିଖ ରେ ଗଜପତି ମହାରାଜ ଦିବ୍ୟ ସିଂ ଦେବ କ ନୂଆଗାଁ ଆସିଥିଲେ ଓ ଦିବ୍ୟଜୀବନ ସଂଘର ପାଠାଗାରର ଉଦଘାଟନ କରିଥିଲେ। ଉଦଘାଟନ ସମାରୋହ ଅନୁଷ୍ଠିତ ହେଉଥିବା ସମୟରେ ପ୍ରବଳ ଝଡ ତୋଫାନ ସହ ବର୍ଷା ହୋଇଥିଲା। ଅଧାରୁ ବନ୍ଦ ରହିଥିଲା କାର୍ଯ୍ୟକ୍ରମ। ଏ ପ୍ରବଳ ବର୍ଷା ଯୋଗୁଁ ଗଜପତି ମହାରାଜା ଦିବ୍ୟସିଂହ ଦେବ ଜଗନ୍ନାଥଙ୍କ ଚତୁର୍ଦ୍ଧା ମୂର୍ତ୍ତିକୁ କ ନୂଆଗାଁରେ ଛାଡ଼ି ଦେଇ ଚାଲି ଯାଇଥିଲେ। ସେ ଦିନ ଠାରୁ ଜଗନ୍ନାଥ ମନ୍ଦିର କିପରି ନିର୍ମାଣ କରାଯିବ ତାହାର ପରିକଳ୍ପନା କରାଯାଇଥିଲା।

ବହୁତ ଘାତ ପ୍ରତିଘାତ ମଧ୍ୟରେ କ ନୂଆଗାଁରେ ଜଗନ୍ନାଥ ମନ୍ଦିରର ରତ୍ନ ମୁଦ୍ରଣ କାର୍ଯ୍ୟକ୍ରମ ମହା ଆଡ଼ମ୍ବରରେ ପାଳିତ ହୋଇଛି ଓ ଅଞ୍ଚଳରେ ଏକ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଛି। ଗତ ଜାନୁୟାରୀ ମାସ 28 ତାରିଖରୁ ଆରମ୍ଭ ହୋଇ ଚଳିତ ମାସ 6 ତାରିଖ ପର୍ଯ୍ୟନ୍ତ ପୂର୍ଣ୍ଣାହୂତି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଉକ୍ତ କାର୍ଯ୍ୟକ୍ରମରେ ଦୁର୍ଗାମଣ୍ଡପ ପ୍ରତିଷ୍ଠା, ଗୁଣ୍ଡିଚା ମନ୍ଦିରର ପ୍ରତିଷ୍ଠା, ଜଗନ୍ନାଥ ମନ୍ଦିର ଓ ପାର୍ଶ୍ବ ଦେବାଦେବୀ ମନ୍ଦିରର ରତ୍ନ ମୁଦ୍ରଣ ଉତ୍ସବ, ଜଗନ୍ନାଥ ପଞ୍ଚ ରାତ୍ର ପାରାୟଣ ଓ ଜିଲ୍ଲା ବାହାରୁ 60 ଥାଳ କୀର୍ତ୍ତନ ମଣ୍ଡଳୀ ଦ୍ୱାରା 24 ପ୍ରହର ନାମ ଯଜ୍ଞ ମହା ଆଡ଼ମ୍ବରରେ ପାଳିତ ହୋଇଛି।

ଏ ରତ୍ନ ମୁଦ୍ରଣ ଉତ୍ସବରେ ହଜାର ହଜାର ଶ୍ରଦ୍ଧାଳୁ ଓ ଜଗନ୍ନାଥ ପ୍ରେମୀଙ୍କ ଭିଡ଼ ଲାଗିଥିଲା। ଜଗନ୍ନାଥ ମନ୍ଦିରର ରତ୍ନ ମୁଦ୍ରଣ ଉତ୍ସବକୁ ସରସ ସୁନ୍ଦର କରିବାରେ ଅଞ୍ଚଳବାସୀଙ୍କ ସାହାଯ୍ୟ ସହଯୋଗ ଓ ଶାନ୍ତି ଶୃଙ୍ଖଳା ସହିତ ଉଦଯାପିତ ହୋଇଥିବା ଯୋଗୁଁ କ ନୂଆଗାଁ ଜଗନ୍ନାଥ କମିଟି ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ।

ଅଧିକ ପଢ଼ନ୍ତୁ ଓଡ଼ିଶା ଖବର

Argus News | argus news | Odisha Latest News, Breaking News, Trending News, Live TV