ଅର୍ଗସ ବ୍ୟୁରୋ: ଚାଷୀଙ୍କୁ ରାଜ୍ୟ ସରକାରଙ୍କ ଧୋକା । ବିଭିନ୍ନ ସ୍ଥାନରୁ ଆସୁଛି ଚାଷୀ ଅସନ୍ତୋଷର ଚିତ୍ର । ବାଲେଶ୍ବରରେ ସଭା ମଞ୍ଚରେ କ୍ଷୋଭ ଝାଡି କୃଷି ଅଧିକାରୀଙ୍କୁ ଧୋଇଲେ ଔପଦା ଅଞ୍ଚଳର ଜଣେ ଚାଷୀ । ଚାଷ ଜମିରେ ଏ.ଏଲ.ଆଈ ପଏଣ୍ଟରେ ବିଦ୍ୟୁତ୍ ସଂଯୋଗ ନଥାଇ ବି ୭୭ ହଜାର ଟଙ୍କାର ବିଲ୍ ଆସୁଥିବା ଅଭିଯୋଗ ଆଣିଛନ୍ତି ଚାଷୀ ଜଣଙ୍କ । ଏନେଇ ପ୍ରଶାସନଠୁ ଆରମ୍ଭ କରି ରାଜ୍ୟ ସରକାର ଓ ଟାଟା ପାୱାରକୁ ଜଣାଇଥିଲେ ସୁଦ୍ଧା ସମାଧାନ ହେଉନାହିଁ । ଯାହାକୁ ନେଇ ପାଣି ପଞ୍ଚାୟତ ସପ୍ତାହ କାର୍ଯ୍ୟକ୍ରମରେ ଜିଲ୍ଲା କୃଷି ଅଧିକାରୀ, ଜିଲ୍ଲା ଉଠା ଜଳସଚେନ ସହକାରୀ ଯନ୍ତ୍ରୀ, ଜିଲ୍ଲା ଉଦ୍ୟାନ ବିଭାଗ ଅଧିକାରୀଙ୍କ ଆଗରେ ଅସନ୍ତୋଷ ଝାଡିଛନ୍ତି ।

ଆଗାମୀ ଦିନରେ ଭୋଟ୍ ବର୍ଜନ କରିବାକୁ ଖୋଲାଖୋଲି ଚେତାବନୀ ଦେଇଛନ୍ତି ଚାଷୀ ଜଣଙ୍କ । ସେପଟେ କଳାହାଣ୍ଡି ଜିଲ୍ଲା ଧର୍ମଗଡ ଅଂଚଳରୁ ବି ଆସିଛି ଚାଷୀ ଅସନ୍ତୋଷର ଚିତ୍ର । ଅଞ୍ଚଳରେ ଜଳସେଚନ ସମସ୍ୟା ଲାଗି ଅଧିକ୍ଷଣ ଯନ୍ତ୍ରୀଙ୍କୁ ଘେରି ହଟହଟା କଲେ ଚାଷୀ । ଧର୍ମଗଡ ଉପଖଣ୍ଡର ଗୋଳାମୁଣ୍ଡା, ଟିପିଗୁଡାର ଚାଷ ଜମିକୁ ଜଳସେଚନର ବ୍ୟବସ୍ଥା ପାଇଁ ରାଜ୍ୟ ସରକାର 20 ବର୍ଷ ତଳେ କେନାଲ ନିର୍ମାଣ କରିଥିଲେ । ହେଲେ ଏହି କେନାଲ ନିର୍ମାଣ ସରିଥିଲେ ସୁଦ୍ଧା ଅଂଚଳର ଚାଷୀ ପାଣି ପାଇବାରୁ ବଂଚିତ ରହିଛନ୍ତି । ଯାହାକୁ ନେଇ ଅଂଚଳର ଶତାଧିକ ଚାଷୀ ଏକତ୍ରିତ ହୋଇ ଅଧିକ୍ଷଣ ଯନ୍ତ୍ରୀଙ୍କୁ ଘେରିଥିଲେ । ତେବେ ଜଳେସଚନ ଓ ଚାଷୀଙ୍କ ସମସ୍ୟା ନେଇ ରାଜ୍ୟ ତମାମ ଚାଷୀଙ୍କ ଉଦବେଗ ସାମ୍ନାକୁ ଆସୁଛି । କେବଳ ପ୍ରଚାରରେ ସୀମିତ ରହିଛି ରାଜ୍ୟ ସରକାରଙ୍କ ଯୋଜନା । ଜଳସେଚନ ତଥ୍ୟ କହୁଛି, ପ୍ରତିଶ୍ରୁତି ହୋଇନି ପୂରଣ । ଏବେବି ଚାଷୀ ବର୍ଷା ଉପରେ ନିର୍ଭର । 24 ବର୍ଷର ସ୍ଥିର ସରକାର ଚାଷୀଙ୍କୁ ଚାଷ ଜମିକୁ ଜଳସେଚନ ଯୋଗାଇବାରେ ଫେଲ୍ । କିଛି ଦିନ ତଳେ ଯାଜପୁରରେ ଜଳସେଚନ ସମସ୍ୟା ନେଇ ଚିନ୍ତା ପ୍ରକଟ କରିଥିଲେ ମହାମହିମ ରାଜ୍ୟପାଳ ।

ଅଧିକ ପଢ଼ନ୍ତୁ ଓଡିଶା ଖବର:

Argus News | argus news | Odisha Latest News, Breaking News, Trending News, Live TV