ଭୁବନେଶ୍ୱର: ଏଥର ବିଧାନସଭାରେ ବଜେଟ୍ ଉପସ୍ଥାପନା କରିବେ ମୁଖ୍ୟମନ୍ତ୍ରୀ ମୋହନ ମାଝୀ । ଏହା ପୂର୍ବରୁ ଅର୍ଥ ବିଭାଗ ନିଜ ପାଖରେ ରଖିଥିବା ମୁଖ୍ୟମନ୍ତ୍ରୀ, ଅର୍ଥ ବିଭାଗର ପ୍ରମୁଖ ସଚିବ ଓ ଅନ୍ୟାନ୍ୟ ବରିଷ୍ଠ ଅଧିକାରୀଙ୍କ ସହ ଆଲୋଚନା କରିବେ । ମୁଖ୍ୟମନ୍ତ୍ରୀଙ୍କ ଅସ୍ଥାୟୀ କାର୍ଯ୍ୟାଳୟରେ ଏହି ବୈଠକ ହେବ । ଆସନ୍ତା ୧୦୦ ଦିନ ଭିତରେ ଧାନ କୁଇଣ୍ଟାଲ ୩୧୦୦ ଟଙ୍କା କରିବା ଏବଂ ସୁଭଦ୍ରା ଯୋଜନାରେ ମହିଳାମାନଙ୍କୁ ୫୦ ହଜାରର ଭାଉଚର ଦେବା ପାଇଁ ପ୍ରଥମ କ୍ୟାବିନେଟ ବୈଠକରେ ନିଷ୍ପତ୍ତି ହୋଇଛି । 

ତେଣୁ ମୁଖ୍ୟମନ୍ତ୍ରୀ ପୂର୍ଣ୍ଣାଙ୍ଗ ବଜେଟ୍ ଉପସ୍ଥାପନ ବେଳେ ଏହି ଦୁଇଟି ବଡ଼ ଯୋଜନା ପାଇଁ ବଜେଟରେ ବ୍ୟୟବରାଦ କରିପାରନ୍ତି । ଏହା ବ୍ୟତୀତ ରାଜ୍ୟରେ ଆଉ କିଛି ନୂଆ ଯୋଜନା ଲାଗୁ ନେଇ ମଧ୍ୟ ଆଜି ବୈଠକରେ ଆଲୋଚନା ହୋଇପାରେ । ସାଧାରଣ ନିର୍ବାଚନ ପାଇଁ ପୂର୍ବ ସରକାର କାମଚଳା ବଜେଟ୍ ଉପସ୍ଥାପନା କରିଥିଲେ । ଏପ୍ରିଲରୁ ଜୁଲାଇ ଯାଏଁ ଚାରି ମାସ ପାଇଁ ହିଁ ଏହି ବଜେଟ୍ ଉପସ୍ଥାପନ ହୋଇଥିଲା । 

ଏବେ ନୂଆ ସରକାର ବନିବା ପରେ ମୁଖ୍ୟମନ୍ତ୍ରୀ ନୂଆ ବଜେଟ୍ ଉପସ୍ଥାପନା ପାଇଁ ଅର୍ଥ ବିଭାଗର ବରିଷ୍ଠ ଅଧିକାରୀଙ୍କ ସହ ଆଲୋଚନା କରିବେ । ଛୁଟି ଦିନରେ ବି ନୋ ରେଷ୍ଟ । ଘନ ଘନ ସମୀକ୍ଷା ଚଳାଇଛନ୍ତି ମୋହନ ସରକାରଙ୍କ ବିଭିନ୍ନ ବିଭାଗର ମନ୍ତ୍ରୀ ।

ଏହାସହ ମୁଖ୍ୟମନ୍ତ୍ରୀଙ୍କ ଅଧୀନରେ ଥିବା ଗୃହ, ଅର୍ଥ, ଜଳ ସମ୍ପଦ, ସୂଚନା ଓ ଲୋକ ସଂପର୍କ, ସାଧାରଣ ପ୍ରଶାସନ, ଯୋଜନା ଓ ସଂଯୋଜନା ବିଭାଗର ସମୀକ୍ଷା କରିବେ ମୁଖ୍ୟମନ୍ତ୍ରୀ । 

ଆହୁରି ପଢନ୍ତୁ ଓଡିଶା ଖବର...