ସଭ୍ୟତାର ଆଧାର `ନଦୀ' ଏବେ ବିଷ ବଳୟରେ । ଯେଉଁ ନଦୀ ଦିନେ ଜୀବନ ବଞ୍ଚାଉଥିଲା ସେ ଏବେ ସାଜିଛି ଜୀବନ ପ୍ରତି ବିପଦ । ଏଥିପାଇଁ ସେ ଦାୟୀ ନୁହଁ ବରଂ ଆମେ ଦାୟୀ । ବିଧାନସଭାରେ ପରିବେଶ ମନ୍ତ୍ରୀଙ୍କ ଉତ୍ତର ନଦୀ ପାଣି ଉପରେ ନିର୍ଭର କରୁଥିବା ଲୋକଙ୍କ ଚିନ୍ତା ବଢାଇଛି ।

ସାବଧାନ.... ଆପଣ ବ୍ୟବହାର କରୁଥିବା ନଦୀର ପାଣି ବିଷମୟ । ନଦୀରେ ଗାଧୋଇଲେ ମାଡ଼ି ବସିବ ମାରାତ୍ମକ ରୋଗ । ଏକଥା ଆମେ କହୁନୁ ବରଂ ବିଧାନସଭାର ରିପୋର୍ଟ କହୁଛି । ବିଧାନସଭାରେ ବିଭାଗୀୟ ମନ୍ତ୍ରୀଙ୍କ ଏ ଉତ୍ତର ଲୋକଙ୍କ ଚିନ୍ତା ବଢାଇଛି । ଜାନୁଆରୀ ୨୦୨୫ରୁ ଡିସେମ୍ବର ୨୦୨୫ ମଧ୍ୟରେ ହୋଇଥିବା ନଦୀ ଜଳ ପରୀକ୍ଷଣ ରିପୋର୍ଟରୁ ଆସିଛି ସାଙ୍ଘାତିକ ତଥ୍ୟ । ରାଜ୍ୟର ୧୯ଟି ସ୍ଥାନରେ ନଦୀ ଜଳ ପ୍ରଦୂଷିତ ହୋଇଛି । ଏହି ସ୍ଥାନ ଗୁଡିକ ହେଉଛି କଟକରେ କାଠଯୋଡ଼ି ନଦୀ, ଭୁବନେଶ୍ବରରେ ଦୟା ନଦୀ, ଭୁବନେଶ୍ବରରେ ଗଙ୍ଗୁଆ ନାଳ, ଭିଙ୍ଗାରପୁରରେ କୁଶଭଦ୍ରା ନଦୀ, ଗୋପରେ ବ୍ରାହ୍ମଣୀ ନଦୀ, ରାଉରକେଲାରେ ଗୁରାଡି ନାଳ ଆଦି । ଏହି ସ୍ଥାନ ଗୁଡିକରେ ପ୍ରାୟତଃ Biochemical Oxygen Demand (BOD) ଏବଂ Total Coliform (TC)ର ମାତ୍ରା ନିର୍ଦ୍ଧାରିତମାନଠାରୁ ଉର୍ଦ୍ଧ୍ୱରେ ରହୁଥ‌ିବାର ପରିଲକ୍ଷିତ ହୋଇଛି । ବିଶେଷଜ୍ଞ କହିବା କଥା ଏହା ଆମ ପାଇଁ ସତର୍କ ଘଣ୍ଟି । ପ୍ରଶାସନକୁ ଏବେଠୁ ପଦକ୍ଷେପ ଗ୍ରହଣ କରିବାକୁ ପଡ଼ିବ ।

ରିପୋର୍ଟରେ ଉଲ୍ଲେଖ ରହିଛି- ସହରାଞ୍ଚଳରୁ ନିର୍ଗତ ବର୍ଜ୍ୟଜଳ ଯୋଗୁଁ ଏପରି ଘଟୁଛି । ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ଦ୍ବାରା ନଦୀ ଜଳର ପ୍ରଦୂଷଣ ସମ୍ପର୍କରେ କ୍ରମାଗତ ଭାବେ ସମ୍ପୃକ୍ତ ପୌରାଞ୍ଚଳ ଅଧିକାରୀମାନଙ୍କୁ ଅବଗତ କରାଇ ନଦୀଜଳର ପ୍ରଦୂଷଣ ନିରାକରଣ ନିମନ୍ତେ ବିହିତ ପଦକ୍ଷେପ ଗ୍ରହଣ କରିବାକୁ ପରାମର୍ଶ ଦିଆଯାଇଛି । ଏହା ସହିତ ସମ୍ପୃକ୍ତ ଜିଲ୍ଲା ଅଧିକାରୀ, ଜଙ୍ଗଲ ଓ ପରିବେଶ ବିଭାଗ, ରାଜ୍ୟ ଗୃହ ଓ ଉନ୍ନୟନ ବିଭାଗ, ରାଜ୍ୟ ଜନସ୍ବାସ୍ଥ୍ୟ ବିଭାଗ, ରାଜ୍ୟ ଜଳ ଯୋଗାଣ ଓ ପରିମଳ ପରିଷଦକୁ ମଧ୍ୟ ପଦକ୍ଷେପ ନେବାକୁ ଅନୁରୋଧ କରାଯାଇଛି । ଏ ରିପୋର୍ଟ ଏବେ ସ୍ଥାନୀୟ ଲୋକଙ୍କ ଚିନ୍ତା ବଢାଇଛି ।

ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ପକ୍ଷରୁ ନଦୀ ଜଳ ପ୍ରଦୂଷଣ ସମ୍ପର୍କରେ ସଂପୃକ୍ତ ପୌରାଞ୍ଚଳ ଅଧିକାରୀଙ୍କୁ ଲଗାତର ଅବଗତ କରାଯିବା ସହ ପ୍ରଦୂଷଣର ନିରାକଣ ପାଇଁ ପଦକ୍ଷପ ଗ୍ରହଣ କରିବା ପାଇଁ ପରାମର୍ଶ ଦିଆଯାଉଛି । ଏହା ସତ୍ତ୍ବେ ନଦୀ ଜଳ ପ୍ରଦୂଷଣ ମାତ୍ରା ହ୍ରାସ ନ ପାଇବା ଉଦବେଗର ବିଷୟ ପାଲଟିଛି । ଏଥିସହ ଏହି ନଦୀ ଉପରେ ନିର୍ଭର କରୁଥିବା ପ୍ରାଣୀଙ୍କ ପାଇଁ ବିପଦ ସାଜିଛି ।