Train Gold Theft / AC ବଗିରୁ ସୁନା ଚୋରି ପରେ ତରଳାଇ କରୁଥଲେ ବିକ୍ରି, ଚୋର ସହ ଜୁଏଲାରୀ ମାଲିକ ଗିରଫ

ଭୁବନେଶ୍ଵର: ଟ୍ରେନ୍ ଯାତ୍ରା ବେଳେ ସାବଧାନ ରୁହନ୍ତୁ, ସତର୍କ ରୁହନ୍ତୁ । ନହେଲେ କେତେବେଳେ ବି ଆପଣଙ୍କ ଠାରୁ ଚୋରି ହୋଇପାରେ ଅଳଙ୍କାର । ଟ୍ରେନ୍‌ର ଏସି କୋଚ୍‌ରୁ ସୁନା ଅଳଙ୍କାର ଚୋରି କରି ତାକୁ ତରଳାଇ ବିକ୍ରି କରୁଥିବା ଚୋର ସହ ଚୋରି ସୁନାକୁ କିଣୁଥିବା କ୍ରେତାଙ୍କୁ ଗିରଫ କରିଛି ଜିଆରପି ପୋଲିସ ।

ସୂଚନା ଅନୁସାରେ, ଲୁଟେରା ଜଣଙ୍କ ରାତିରେ ଏକ୍ସପ୍ରେସ୍ ଟ୍ରେନ୍‌ରେ ଏସି ବଗିରେ ପଶୁଥିଲେ । ସୁଯୋଗ ଦେଖି ଯାତ୍ରୀଙ୍କ ଠାରୁ ସୁନା ଅଳଙ୍କାର ଚୋରି କରି ଟ୍ରେନ୍‌ର ଧଳା ବେଡସିଟ୍ ମଧ୍ୟରେ ଲୁଚାଇ ଆଣୁଥିଲେ । ଆଉ ପରେ ସେହି ଚୋରି ସୁନା ଅଳଙ୍କାର ବ୍ରହ୍ମପୁର ନେଇ ସେଠାରେ ତରଳାଇ ବିକ୍ରି କରୁଥିଲେ ।

ଏଥିସହ ପଢ଼ନ୍ତୁ: ଓଡ଼ିଆ ଖାଦ୍ୟ ଖାଇ ଅସୁସ୍ଥ ଆମେରିକୀୟ ଫିଲ୍ମମେକର…ହସ୍ପିଟାଲ ବିଲ୍ ଦେଖି ଉଡ଼ିଗଲା ହୋସ୍ 

ଟ୍ରେନ୍‌ରେ ଲାଗିଥିବା ସିସିଟିଭି ଫୁଟେଜ୍ ଆଧାରରେ ଜିଆରପି ଓ ଆରପିଏଫ୍ ପୋଲିସ ତଦନ୍ତ କରି ୧୦ ଲକ୍ଷ ଟଙ୍କା ମୂଲ୍ୟର ତରଳ ସୁନା ଜବତ କରିଛନ୍ତି । ମାମଲାରେ ମୁଖ୍ୟ ଅଭିଯୁକ୍ତ ବୀରସେନ ତରାଇ ଏବଂ ସୁନା ଦୋକାନୀ ତାନାଜୀ ଦଶରଥ ୟେଭାଲେଙ୍କୁ ଗିରଫ କରି କୋର୍ଟ ଚାଲାଣ କରିଛି ଜିଆରପି ।

କେମିତି ହେଉଥିଲା ଲୁଟ୍ ?

ମୁଖ୍ୟ ଅଭିଯୁକ୍ତ ବୀରସେନ ତରାଇ ଏକ୍ସପ୍ରେସ୍ ଟ୍ରେନ୍‌ର ଏସି ବଗିରେ ରାତି ଅଧରେ ପଶୁଥିଲା । ହାତରେ ରହୁଥିଲା ଏସି ବଗିରେ ମିଳୁଥିବା ବେଡ୍ ରୋଲ୍ କିଟ୍ । ସେହି କିଟ୍ ଧରି ଏସି ବଗିରେ ପଶିବା ସହ ଯାତ୍ରୀଙ୍କ ଅଳଙ୍କାର ଲୁଟ୍ କରୁଥିଲା ।

ଟ୍ରେନ୍‌ରେ ଲାଗିଥିବା ସିସିଟିଭିରେ ସୁନା ଚୋରିର ପ୍ରମାଣ ମଳିବା ପରେ ଉଭ ଜିଆରପି ଓ ଆରପିଏଫ୍ ପୋଲିସ ତଦନ୍ତ ଆରମ୍ଭ କରିଥିଲେ । ସିସିଟିଭି ଆଧାରରେ ତଦନ୍ତ କରି ପୋଲିସ ଲୁଟେରା ଏବଂ ଲୁଟ୍ ସୁନା ଜବତ କରିବାରେ ସଫଳତା ମିଳିଛି ।

ତଦନ୍ତରୁ ଜଣାପଡ଼ିଛି, ଚୋରି ହୋଇଥିବା ପ୍ରାୟ ୧୦୯ ଗ୍ରାମ୍ ସୁନା ଅଳଙ୍କାର ବ୍ରହ୍ମପୁର ନିଆଯାଇ ସେଠାରେ ତରଳାଇ ଦେଇଥିଲେ । ଏହା ପରେ ତରଳିଥିବା ସୁନାକୁ ସୁନା ବ୍ୟବସାୟୀଙ୍କୁ ଦେଇ ନଗଦ ଟଙ୍କା ଆଣିଥିଲା ଲୁଟେରା ।

ଏଥିସହ ପଢ଼ନ୍ତୁ: ପାଠପଢାରେ ଲାଗିପଡନ୍ତୁ; ଶିକ୍ଷକ ଆଶାୟୀଙ୍କୁ ନିଯୁକ୍ତି ନେଇ ଆଶ୍ୱାସନା ଦେଲେ ସରକାର 

ନଗଦ ୮ ଲକ୍ଷ ଜବତ

ତରଳ ଓ ଚୋରି ସୁନା କିଣିଥିବା ଶ୍ରୀ ସିଦ୍ଧନାଥ ଜୁଏଲର୍ସର ମାଲିକ ତାନାଜୀ ଦଶରଥ ୟେଭାଲେଙ୍କୁ ଗିରଫ କରାଯାଇଛି । ଲୁଟ୍ ସୁନା ଚେନ ଏବଂ କାନଫୁଲ ସହ ନଗଦ ୮ ଲକ୍ଷ ୮୪ ହଜାର ଟଙ୍କା ଓ ମୋବାଇଲ୍ ଫୋନ୍ ଜବତ କରାଯାଇଛି ।