Twin City Traffic / ଟ୍ଵିନ ସିଟିରେ ଟ୍ରାଫିକ୍ ସମସ୍ୟାର ଖୁବ ଶୀଘ୍ର ହେବ ସମାଧାନ

ଟ୍ବିନ୍ ସିଟିରେ ଟ୍ରାଫିକ୍ ସମସ୍ୟା ଲୋକଙ୍କୁ କରୁଛି କଲବଲ... ଖୁବ୍ ଶୀଘ୍ର ଦୂର ହେବ ଭିଡ ସମସ୍ୟା । ରାଜ୍ୟ ସରକାର ଗଠନ କଲେ ୫ଜଣିଆ ସ୍ଵତନ୍ତ୍ର କମିଟି । ଅଟକି ରହିବ ନାହିଁ ଆମ୍ବୁଲାନ୍ସ, କମିବ ଦୁର୍ଘଟଣା । 

ପ୍ରତି ଦିନ କଟକ ଭୁବନେଶ୍ବରରେ ବଢିଚାଲିଛି ଟ୍ରାଫିକ୍ ସମସ୍ୟା । ଟ୍ଵିନ୍ ସିଟିରେ ଭିଡ ହ୍ରାସ ନେଇ ରାଜ୍ୟ ସରକାର ଗଠନ କରିଛନ୍ତି ୫ଜଣିଆ ସ୍ବତନ୍ତ୍ର କମିଟି ।ଏହି କମିଟି ଭୁବନେଶ୍ବର ଓ କଟକ ମଧ୍ୟରେ କେଉଁ ଅଞ୍ଚଳରେ ଅଧିକ ଭିଡ ହେଉଛି ଏହାର କ୍ଷେତ୍ର ପରିଦର୍ଶନ କରି ଚିହ୍ନଟ କରିବା ପରେ ଏହି ସମସ୍ୟାର ସମାଧାନ କରିବେ ସରକାର....

ଦ୍ବୈତନଗରୀରେ ଅସମ୍ଭାଳ ଭିଡ କମାଇବାକୁ ଅଣ୍ଟା ଭିଡିଛନ୍ତି ରାଜ୍ୟ ସରକାର । କଟକ-ଭୁବନେଶ୍ଵରରେ ଟ୍ରାଫିକ୍ ଜାମ ସମସ୍ୟାର ସମାଧାନ ଲାଗି କମିଟି ଗଠନ ହୋଇଛି । ଏହି କମିଟି ନିୟମିତ ବ୍ୟବଧାନରେ ସହରର ଟ୍ରାଫକ୍ ବ୍ୟବସ୍ଥାର ସୁଧାରିବା ନେଇ କାର୍ଯ୍ୟ କରିବ ।

ଟ୍ରାଫିକ୍ ସମସ୍ୟା ଦେଖାଯିବାର କାରଣ କଣ ରହିଛି ଏହାର ସମାଧାନ କିପରି କରାଯିବ ସେ ନେଇ ରିପେୋର୍ଟ ପ୍ରଦାନ କରିବ ସ୍ଵତନ୍ତ୍ର କମିଟି । ରାଜଧାନୀରେ କେଉଁ ଅଂଚଳରେ ଅଧିକ ଟ୍ରାଫିକ୍ ସମସ୍ୟା ରହିଛି ସେଠାକୁ ଏହି କମିଟି ଯାଇ ନିରାକରଣ ପାଇଁ ବ୍ୟବସ୍ଥା କରିବ। ପାର୍କିଂ, ଅଣ ଓସାରିଆ ରାସ୍ତା, ଭେଣ୍ଡିଂ ଜୋନ୍ ପାଇଁ ଟ୍ରାଫିକ୍ ସମସ୍ୟା ଦେଖା ଦେଉଛି । ସେଥିପାଇଁ ଫ୍ଲାଏ ଓଭର, ଚଉଡା ରାସ୍ତା ନିର୍ମାଣ ହେବ। ଭିଡ କମାଇବାକୁ ୩୧ ପ୍ରକଳ୍ପ ପାଇଁ ଖର୍ଚ୍ଚ ହେବ ୨ହଜାର କୋଟି ।

ଏଥିସହ ପଢ଼ନ୍ତୁ: ପୁରୀରେ ସ୍ନାନ ଯାତ୍ରା ପାଇଁ ଶେଷ ପର୍ଯ୍ୟାୟରେ ପ୍ରସ୍ତୁତି... ଭକ୍ତଙ୍କ ସୁରକ୍ଷା ପାଇଁ ୭୯ ପ୍ଲାଟୁନ୍ ଫୋର୍ସ

କେବଳ ଟ୍ରାଫିକ୍ ସମସ୍ୟା ନୁହଁ ଟ୍ଵିନ୍ ସିଟିରେ ଦିନକୁ ଦିନ ବଢି ଚାଲିଛି ଦୁର୍ଘଟଣା । ପୂର୍ବ ବର୍ଷ ଅପେକ୍ଷା ଚଳିତ ବର୍ଷ ଅଧିକ ଦୁର୍ଘଟଣା ଘଟିଛି । ୨୦୨୫ମସିହାରେ ଖୋର୍ଦ୍ଧା ଏବଂ ଭୁବନେଶ୍ବରରେ ୪୩୭ଟି ଦୁର୍ଘଟଣା ଘଟିଥିବା ବେଳେ ୨୦୨୬ ମସିହା ଏପ୍ରିଲ ମାସ ସୁଦ୍ଧା ୪୭୮ଟି ଦୁର୍ଘଟଣା ଘଟିଛି । ସଡକ ସୁରକ୍ଷା ବିଶେଷଜ୍ଞ କହିଛନ୍ତି, ଯଦି ସରକାର ଟ୍ରାଫିକ୍ ସମସ୍ୟା ଦୂର କରିବେ ତା ହେଲେ ଦୁର୍ଘଟଣା କମି ପାରିବ ।

ପଳାଶୁଣି, ରସୁଲଗଡ, ପଟିଆ, ରବିଟକିଜ୍, ଏଜି ଭଳି ସ୍ଥାନରେ ସଂନ୍ଧ୍ୟା ସମୟରେ ଅଧିକ ଭିଡ ରହୁଛି । ଏପରିକି ଆମ୍ବୁଲାନ୍ସ ଅଟକି ରହୁଛି । ସରକାର କମିଟିର ରିପୋର୍ଟ ଆଧାରରେ ଆବଶ୍ୟକୀୟ ପଦକ୍ଷେପ ନେଲେ ଭିଡ ସମସ୍ୟା ଦୂର ହୋଇ ପାରିବ ।