ଅର୍ଗସ ବ୍ୟୁରୋ: ନିର୍ବାଚନ ଆସିଲା ଶାସକ ଦଳର କେନ୍ଦ୍ର ଅବହେଳା ପ୍ରସଙ୍ଗ ଫେରିଲା । ବିଜେଡିର ନିର୍ବାଚନୀ ବ୍ଲୁ-ପ୍ରିଣ୍ଟରେ ପୁଣି ଥରେ ସାମିଲ ହେଲା କେନ୍ଦ୍ର ଅବହେଳା ପ୍ରସଙ୍ଗ । ନେତାଙ୍କୁ ଆହ୍ବାନ ଦେଲେ ନବୀନ । ନିର୍ବାଚନ ମଇଦାନରେ କୁହ କେନ୍ଦ୍ର ଅବହେଳା ପ୍ରସଙ୍ଗ । ଶଙ୍ଖ ଭବନରେ ବସିଥିବା ବିଜେଡି ରାଜ୍ୟ କାର୍ଯ୍ୟାକାରିଣୀ ବୈଠକରେ ସ୍ବତନ୍ତ୍ର ରାଜ୍ୟ ପାହ୍ୟା,ମହାନଦୀ, ପୋଲାଭରମ,କୋଇଲା ରୟାଲିଟି ଓ ସେସ୍, ରେଳ, ଜାତୀୟ ରାଜପଥ, କେନ୍ଦୁ ପତ୍ରରେ ଜିଏସଟି ଛାଡ ଭଳି ପ୍ରସଙ୍ଗକୁ ନିର୍ବାଚନୀ ମୁଦ୍ଦା କରିବା ଲାଗି ନେତାଙ୍କୁ ଆହ୍ବାନ ଦେଇଛନ୍ତି ନବୀନ । ତେବେ ନବୀନଙ୍କ ଏପରି ଆହ୍ବାନ ପରେ କଡା ଜବାବ ରଖିଛନ୍ତି ବିରୋଧୀ ।

ପୂର୍ବରୁ ୟୁପିଏ ଓ ଏନଡିଏ ସମୟର ଅନୁଦାନର ତୁଳନାତ୍ମକ ହିସାବ ଦେଇ ବିଭିନ୍ନ ସମୟରେ ବିଜେଡିକୁ ମୁହଁତୋଡ ଜବାବ ଦେଇ ଆସିଛନ୍ତି କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ହିସାବ ଅନୁଯାୟୀ କଂଗ୍ରେସର 9 ବର୍ଷର ଶାସନ କାଳରେ ଓଡିଶାକୁ 2 ଲକ୍ଷ 63 ହଜାର କୋଟି ଟଙ୍କାର ଅନୁଦାନ ମିଳିଥିବା ବେଳେ ମୋଦୀଙ୍କ ଶାସନର 9 ବର୍ଷରେ 18 ଲକ୍ଷ 83 ହଜାର କୋଟିର ଆର୍ଥିକ ଅନୁଦାନ ମିଳିଛି । ଏଥିରେ ଓଡିଶାକୁ ଆର୍ଥିକ ଭାବେ ଶସକ୍ତ କରିବା ପାଇଁ ମୋଦି ସରକାର ସମୟରେ 10 ଲକ୍ଷ 69 ହଜାର କୋଟି ଟଙ୍କା ମିଳିଥିବା ବେଳେ କଂଗ୍ରେସ ସମୟରେ ମିଳିଥିଲା ମାତ୍ର 2 ଲକ୍ଷ 43 ହଜାର କୋଟି । ରେଳକ୍ଷେତ୍ରରେ 2009ରୁ 14 ମଧ୍ୟରେ ମାତ୍ର 838 କୋଟି ଟଙ୍କା ମିଳିଥିବା ବେଳେ ମୋଦୀଙ୍କ ଶାସନ କାଳରେ ତାହା ହଜାରେ ଗୁଣା ବଢି କେବଳ ଗୋଟେ ବର୍ଷରେ ମିଳିଛି 10 ହଜାର କୋଟିରୁ ଅଧିକ ଟଙ୍କା । ୟୁପିଏ ସମୟରେ ବର୍ଷକୁ 267 କିଲୋମିଟରର ନୂଆ ରେଳ ଲାଇନ ହେଉଥିବା ବେଳେ ମୋଦିଙ୍କ ସମୟରେ ତାହା 1583 କିଲୋମିଟରରେ ପହଞ୍ଚିଛି ।

କେନ୍ଦ୍ର ଅବହେଳା ପ୍ରସଙ୍ଗ ବ୍ୟତିତ ଜାନୁଆରୀ 23ରୁ ମାର୍ଚ୍ଚ 5 ପାର୍ଯ୍ୟନ୍ତ ତୃଣମୂଳ ସ୍ତରରେ ନବୀନ ସରକାରର ସଫଳତା ପହଞ୍ଚାଇବା ସହ ବିରୋଧୀଙ୍କ ଅପପ୍ରଚାରକୁ ସୋସିଆଲ ମିଡିଆରେ ଜୋରଦାର କାଉଣ୍ଟର କରିବାକୁ କାର୍ଯ୍ୟାକାରିଣୀ ବୈଠକରେ ନେତାଙ୍କୁ ଆହ୍ବାନ ଦେଇଛନ୍ତି ନବୀନ ।

ଆହୁରି ପଢନ୍ତୁ ରାଜନୀତି ଖବର...

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV