ଅର୍ଗସ ବ୍ୟୁରୋ : ମାଛକୁଣ୍ଡ ଓଡ଼ିଶାର ଅଭିଚ୍ଛେଦ୍ୟ ଅଙ୍ଗ । ଓଡ଼ିଶା ଓ ଆନ୍ଧ୍ର ପ୍ରଦେଶ ସୀମା ନିର୍ଦ୍ଦାରଣ କରିଥାଏ ମାଛକୁଣ୍ଡ ନଦୀ । କିନ୍ତୁ ଦୁର୍ଭାଗ୍ୟର ବିଷୟ ଓଡ଼ିଶା ରାଜସ୍ବ ମାନଚିତ୍ରରେ ନାହିଁ ମାଛକୁଣ୍ଡ । ଖାଲି ସେତିକି ନୁହେଁ ଓଡ଼ିଶା ମାଧ୍ୟମିକ ଶିକ୍ଷା ପରିଷଦ ଦ୍ବାରା ପ୍ରକାଶିତ ଦଶମ ଶ୍ରେଣୀ ବହିରେ ମାଛକୁଣ୍ଡ ଜଳ ବିଦ୍ୟୁତ ପ୍ରକଳ୍ପ ଆନ୍ଧ୍ରର ବୋଲି ଉଲ୍ଲେଖ ରହିଛି । ଏହାକୁ ନେଉ ଉଦବେଗ ପ୍ରକାଶ କରିଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସମ୍ବାଦପତ୍ରରେ ପ୍ରକାଶିତ ମାଛକୁଣ୍ଡ ଓଡ଼ିଆ ମାନଚିତ୍ରରେ ନାହିଁ ଶୀର୍ଷକ ଖବରକୁ ସୋସିଆଲ ମିଡିଆ ଏକ୍ସରେ ପୋଷ୍ଟ କରି ଉଦବେଗ ପ୍ରକାଶ କରିଛନ୍ତି କେନ୍ଦ୍ରମନ୍ତ୍ରୀ । 

ସେ ଲେଖିଛନ୍ତି, ଓଡ଼ିଶାକୁ ଭାଷା ଭିତ୍ତିକ ରାଜ୍ୟ ଗଠନ ପାଇଁ ଯେଉଁ ପରିକଳ୍ପନା ହୋଇଥିଲା ତାର ଅଂଶ ବିଶେଷ ଥିଲା ମାଛକୁଣ୍ଡ ନଦୀ । ପ୍ରତ୍ୟେକ ଓଡ଼ିଆ ଜାଣିଛନ୍ତି ମାଛକୁଣ୍ଡ ଆମର। ତାହାଲେ ମାଛକୁଣ୍ଡ ଓଡ଼ିଶା ରାଜସ୍ବ ମାନଚିତ୍ରରୁ ଗାଏବ ହେଲା କିପରି ? ଗତବର୍ଷ ମାଛକୁଣ୍ଡ ଜଳ ବିଦ୍ୟୁତ ପ୍ରକଳ୍ପ ବା ଜଲାପୁଟ ଡ୍ୟାମରେ ଲାଗିଥିବା ଓଡିଆ ଫଳକ କୁ ଉପାଡି ଫିଙ୍ଗିଦେଇଥିଲେ ଆନ୍ଧ୍ର ସରକାର । କିନ୍ତୁ ଓଡ଼ିଶା ସରକାରଙ୍କ ପକ୍ଷରୁ କୌଣସି ପ୍ରତିକ୍ରିୟା ଆସିଲା ନାହିଁ । ଏ ଖବର ସାମ୍ନାକୁ ଆସିବା ପରେ ବିଜେପି ନେତା ଗୌତମ ସାମନ୍ତରାୟ ଜଳାପୁଟ ଡ୍ୟାମ ଯାଇ ପୁଣି ଓଡ଼ିଆ ଫଳକ ଲଗାଇଥିଲେ । 

ଅବଶ୍ୟ ଇଏ ପ୍ରଥମ ଘଟଣା ନୁହେଁ ୨୪ ବର୍ଷ ଧରି ଓଡ଼ିଶାରେ ଆଞ୍ଚଳିକ ଦଳ ଶାସନ କାଳରେ ବାରମ୍ବାର ଅପମାନିତ ହୋଇଛି ଭାଷା, ସଂସ୍କୃତି ଓ ସୀମା । ପୂର୍ବରୁ ଦେଓମାଳି ପର୍ବତକୁ ନେଇ ବିଧାନସଭାରେ ପର୍ଯ୍ୟଟନ ମନ୍ତ୍ରୀ ଅଶ୍ବୀନ ପାତ୍ରଙ୍କ ଉତ୍ତର ବିବାଦ ସୃଷ୍ଟି କରିଥିଲା । ସେ କହିଥିଲେ ଓଡିଶା ରେଭିନ୍ୟୁ ଖାତାରେ ନାହିଁ ଦେଓମାଳିର ନାଁ, ବନ ବିଭାଗ ମାନଚିତ୍ରରେ ନାହିଁ ଦେଓମାଳିର ନାଁ । ପରେ ଆରଟିଆଇରେ ତଥ୍ୟରେ ଦେଓମାଳୀ ଓଡ଼ିଶାର ବୋଲି ଖୁଲାସା ହୋଇଥିଲା । 

ଅଧିକ ପଢନ୍ତୁ : ସରକାରର ଗୁମର ଖୋଲିଦେଲେ ଧର୍ମେନ୍ଦ୍ର : ରାଜସ୍ଵ ମାନଚିତ୍ରରେ ମାଛକୁଣ୍ଡର ନା ନାହିଁ କାହିଁକି ?

ଯେଉଁ ଓଡ଼ିଆ ଭାଷାଭାଷୀ ଅଞ୍ଚଳ ଓଡ଼ିଶାରୁ କଟିଯାଇଛି ସେଠାରେ ଓଡ଼ିଆ ଭାଷା ଓ ସଂସ୍କୃତିକର ସୁରକ୍ଷା ପାଇଁ ପ୍ରତିଶ୍ରୁତି ଦେଇଥିଲେ ବି ତାକୁ ପାଳନ କଲାନାହିଁ ବିଜେଡି ସରକାର । ଝାଡ଼ଖଣ୍ଡରେ ୨୭ ଜିଲ୍ଲାରୁ ୧୪ ଜିଲ୍ଲାରେ ଓଡ଼ିଆ ଭାଷାଭାଷି ଲୋକଙ୍କ ସଂଖ୍ୟା ଅଧିକ । କିନ୍ତୁ ସେସବୁ ଅଂଚଳରେ ଥିବା ଓଡ଼ିଆ ସ୍କୁଲରେ ପିଲାଙ୍କୁ ଓଡ଼ିଆ ପରିବର୍ତ୍ତେ ହିନ୍ଦି ଭାଷାରେ ମିଳୁଛି ପାଠ୍ୟ ପୁସ୍ତକ । ଝାଡ଼ଖଣ୍ଡରେ ସଂଖ୍ୟାଲଘୁ ଓଡିଆ ଛାତ୍ରଛାତ୍ରୀଙ୍କୁ ଓଡିଆ ପଢାରେ ବ୍ୟାଘାତ ନେଇ ଉଦ୍‌ବେଗ ପ୍ରକାଶ କରିବା ସହ ଓଡ଼ିଆ ଭାଷାର ସୁରକ୍ଷା ନେଇ ଝାଡଖଣ୍ଡର ତତକାଳୀନ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କୁ ଚିଠି ଲେଖିଥିଲେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସେତେବେଳେ ଯତ୍ନବାନ ନହେଲେ ଓଡ଼ିଆ ଭାଷା ସଙ୍କଟକୁ ଚାଲିଯାଇପାରେ ବୋଲି ରାଜ୍ୟ ସରକାରଙ୍କୁ ସତର୍କ କରାଇଥିଲେ ଭାଷାବିତ୍ ।