Odisha DGP / ବିନୟତୋଷ ମିଶ୍ର ହେଲେ ଅନ୍ତରୀଣ ପୋଲିସ DG

ଭୁବନେଶ୍ଵର: ବିନୟତୋଷ ମିଶ୍ର ହେଲେ ଅନ୍ତରୀଣ DGP । ୧୯୯୩ ବ୍ୟାଚ୍‌ର IPS ଅଫିସର ହେଉଛନ୍ତି ବିନୟତୋଷ ମିଶ୍ର । ଅଗଷ୍ଟ ୧୬ରେ ସରୁଛି ଡିଜି ୱାଇବି ଖୁରାନିଆଙ୍କ କାର୍ଯ୍ୟକାଳ । ବର୍ତ୍ତମାନ କ୍ରାଇମ୍‌ବ୍ରାଞ୍ଚ DG ଅଛନ୍ତି ବିନୟତୋଷ ମିଶ୍ର ।

ବର୍ତ୍ତମାନର ପୋଲିସ ଡିଜି ୱାଇବି ଖୁରାନିଆଙ୍କ କାର୍ଯ୍ୟକାଳ ଅଗଷ୍ଟ ୧୬ ତାରିଖରେ ସରୁଛି । ଏବେ କ୍ରାଇମବ୍ରାଞ୍ଚ ଡିଜି ଥିବା ବିନୟତୋଷ ମିଶ୍ର ଅତିରିକ୍ତ ଭାବେ ପୋଲିସ ଡିଜି ଦାୟିତ୍ଵ ତୁଲାଇବେ । ଏନେଇ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଅନୁମତି ଦେଇଛନ୍ତି । ପରବର୍ତ୍ତୀ ନିର୍ଦ୍ଦେଶନାମା ପର୍ଯ୍ୟନ୍ତ ଏହି ନିର୍ଦ୍ଦେଶନାମା ବଳବତ୍ତର ରହିବ ।

ଗୁରୁବାର ଓଡ଼ିଶା ପୋଲିସ ଡିଜି ନିଯୁକ୍ତି ପ୍ରକ୍ରିୟାକୁ ସ୍ଥଗିତ ରଖିବା ପାଇଁ ନିର୍ଦ୍ଦେଶ ଦେଇଥିଲେ ସୁପ୍ରିମକୋର୍ଟ । କାରଣ ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ନିଯୁକ୍ତି ପ୍ରକ୍ରିୟା ସ୍ଥଗିତ ରଖିବା ପାଇଁ UPSCକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି । ଆଗାମୀ ୧୮ ତାରିଖରେ ଏ ସମ୍ପର୍କିତ ଜନସ୍ଵାର୍ଥ ମାମଲାର ଶୁଣାଣି କରିବେ ସର୍ବୋଚ୍ଚ ନ୍ୟାୟାଳୟ ।

ଏହାରି ଭିତରେ ବିନୟତୋଷ ମିଶ୍ରଙ୍କୁ ଅନ୍ତରୀଣ ପୋଲିସ DG ଭାବେ ନିଯୁକ୍ତି ମିଳିଛି । ଓଡ଼ିଶା ପୋଲିସ ଡିଜି ନିଯୁକ୍ତିରେ ପ୍ରକାଶ ସିଂ ମାମଲା ସମ୍ପର୍କିତ ସୁପ୍ରିମକୋର୍ଟଙ୍କ ପୂର୍ବ ନିର୍ଦ୍ଦେଶର ଉଲ୍ଲଂଘନ ହୋଇଥିବା କୋର୍ଟଙ୍କୁ ଜଣାଇଥିଲେ ବରିଷ୍ଠ ଆଇନଜୀବୀ ପି. ଚିଦାମ୍ବରମ । କିଛି ଜୁନିଅର ଅଫିସରଙ୍କୁ ପଦୋନ୍ନତି ଦେଇ ନୂଆ ପ୍ୟାନେଲରେ ସାମିଲ କରାଯାଇଥିବା ସେ ଅଭିଯୋଗ ବାଢ଼ିଥିଲେ । ତେବେ ଆଡଭୋକେଟ୍ ଜେନେରାଲ ପୀତାମ୍ବର ଆଚାର୍ଯ୍ୟ ଏଭଳି କୌଣସି ନିୟମ ଉଲ୍ଲଂଘନ ହୋଇନଥିବା ଦର୍ଶାଇ ଯୁକ୍ତି ଉପସ୍ଥାପନ କରିଥିଲେ ।

ଏଥିସହ ପଢ଼ନ୍ତୁ: ଓଡ଼ିଶା ପୋଲିସ ଡିଜି ନିଯୁକ୍ତିରେ 'ସୁପ୍ରିମ' ବ୍ରେକ୍; ୧୮ ତାରିଖ ଶୁଣାଣି ଯାଏଁ ଝୁଲିଲା ନିଯୁକ୍ତି ପ୍ରକ୍ରିୟା 

ସୁପ୍ରିମକୋର୍ଟ ମଧ୍ୟ ଉପଲବ୍ଧି କରିଥିଲେ ଯେ, PILର କୌଣସି ବୈଧତା ନାହିଁ । ପ୍ରଧାନ ବିଚାରପତି ଜଷ୍ଟିସ ସୂର୍ଯ୍ୟ କାନ୍ତ ମଧ୍ୟ କୌଣସି ଅଧିକାରୀ ଏଭଳି ଅଭିଯୋଗ ନେଇ କୋର୍ଟଙ୍କ ପାଖକୁ ଆସିନଥିବାରୁ PILର ବୈଧତା ଉପରେ ସନ୍ଦେହ ପ୍ରକଟ କରିଥିଲେ । ହେଲେ ଆମିକସ କ୍ୟୁରୀ ରାଜୁ ରାମଚନ୍ଦ୍ରନ ତାଙ୍କ ପ୍ରତିକ୍ରିୟାରେ, ପ୍ରକାଶ ସିଂ ନିର୍ଦ୍ଦେଶାବଳୀର ଉଲ୍ଲଂଘନ ହୋଇଥିବା ଅନୁଭବ କରୁଥିବା ମତ ରଖିଥିଲେ ।

ତେଣୁ ଆମିକସ କ୍ୟୁରୀଙ୍କ ମତାମତ ଆଧାରରେ କୋର୍ଟ ଗୁରୁବାରର UPSC ବୈଠକକୁ ସ୍ଥଗିତ ରଖିବା ସହ ଆଗାମୀ ୧୮ ତାରିଖରେ ପରବର୍ତ୍ତୀ ଶୁଣାଣି ପାଇଁ ତାରିଖ ଧାର୍ଯ୍ୟ କରିଛନ୍ତି । ପୂର୍ବରୁ ଅଗଷ୍ଟ ୭ ତାରିଖରେ ୩ ଜଣ ଡିଜିପି ପାହ୍ୟା ଅଧିକାରୀଙ୍କ ନାଁ ଥିବା ତାଲିକା UPSCକୁ ଦେଇଥିଲା ରାଜ୍ୟ ସରକାରଙ୍କ ଗୃହ ବିଭାଗ ।

ଅଭିଯୋଗ ଅନୁସାରେ ପରବର୍ତ୍ତୀ ସମୟରେ ଏକ ସାନି ତାଲିକା ଦିଆଯାଇଥିବାବେଳେ ଏଥିରେ ୧୧ ଜଣଙ୍କ ନାଁ ସୁପାରିସ୍ କରାଯାଇଥିଲା । ଏହାରି ଭିତରେ ଦୁଇଜଣ ADG ପାହ୍ୟା ଅଧିକାରୀ ସଞ୍ଜୀବ ପଣ୍ଡା ଓ ଯଶୱନ୍ତ ଜେଠୱାଙ୍କୁ DG ପାହ୍ୟାକୁ ପଦୋନ୍ନତି ମଧ୍ୟ ଦିଆଯାଇଥିଲା । ଯାହା ପରେ ଏହି ପୂରା ମାମଲା କାଠଗଡ଼ାରେ ଛିଡ଼ା ହୋଇଛି ।