Odisha Next DGP / ଓଡ଼ିଶା ପୋଲିସ ଡିଜି ନିଯୁକ୍ତିରେ 'ସୁପ୍ରିମ' ବ୍ରେକ୍; ୧୮ ତାରିଖ ଶୁଣାଣି ଯାଏଁ ଝୁଲିଲା ନିଯୁକ୍ତି ପ୍ରକ୍ରିୟା

ଓଡ଼ିଶା ପୋଲିସ ଡିଜି ନିଯୁକ୍ତିରେ ଲାଗିଛି 'ସୁପ୍ରିମ' ବ୍ରେକ୍ । କାରଣ ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ନିଯୁକ୍ତି ପ୍ରକ୍ରିୟା ସ୍ଥଗିତ ରଖିବା ପାଇଁ UPSCକୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ । ଆଗାମୀ ୧୮ ତାରିଖରେ ଏ ସମ୍ପର୍କିତ ଜନସ୍ଵାର୍ଥ ମାମଲାର ଶୁଣାଣି କରିବେ ସର୍ବୋଚ୍ଚ ନ୍ୟାୟାଳୟ । ସେ ପର୍ଯ୍ୟନ୍ତ ନିଯୁକ୍ତି ପ୍ରକ୍ରିୟା ବନ୍ଦ ରଖିବାକୁ କୋର୍ଟଙ୍କ ନିର୍ଦ୍ଦେଶ ରହିଛି । କିଏ ହେବେ ଓଡ଼ିଶାର ପରବର୍ତ୍ତୀ ଡିଜିପି ସେନେଇ ଆଜି ଦିଲ୍ଲୀରେ UPSC ବୈଠକରେ ଚୂଡ଼ାନ୍ତ ହେବାର ଥିଲା । କିନ୍ତୁ କୋର୍ଟ ଏହି ବୈଠକକୁ ଘୁଞ୍ଚାଇ ଦେବା ପାଇଁ ନିର୍ଦ୍ଦେଶ ଦେଇଛନ୍ତି ।

ଓଡ଼ିଶା ପୋଲିସ ଡିଜି ନିଯୁକ୍ତିରେ ପ୍ରକାଶ ସିଂ ମାମଲା ସମ୍ପର୍କିତ ସୁପ୍ରିମକୋର୍ଟଙ୍କ ପୂର୍ବ ନିର୍ଦ୍ଦେଶର ଉଲ୍ଲଂଘନ ହୋଇଥିବା କୋର୍ଟଙ୍କୁ ଜଣାଇଥିଲେ ବରିଷ୍ଠ ଆଇନଜୀବୀ ପି. ଚିଦାମ୍ବରମ । କିଛି ଜୁନିଅର ଅଫିସରଙ୍କୁ ପଦୋନ୍ନତି ଦେଇ ନୂଆ ପ୍ୟାନେଲରେ ସାମିଲ କରାଯାଇଥିବା ସେ ଅଭିଯୋଗ ବାଢ଼ିଥିଲେ । ତେବେ ଆଡଭୋକେଟ୍ ଜେନେରାଲ ପୀତାମ୍ବର ଆଚାର୍ଯ୍ୟ ଏଭଳି କୌଣସି ନିୟମ ଉଲ୍ଲଂଘନ ହୋଇନଥିବା ଦର୍ଶାଇ ଯୁକ୍ତି ଉପସ୍ଥାପନ କରିଥିଲେ ।

ସୁପ୍ରିମକୋର୍ଟ ମଧ୍ୟ ଉପଲବ୍ଧି କରିଥିଲେ ଯେ, PILର କୌଣସି ବୈଧତା ନାହିଁ । ପ୍ରଧାନ ବିଚାରପତି ଜଷ୍ଟିସ ସୂର୍ଯ୍ୟ କାନ୍ତ ମଧ୍ୟ କୌଣସି ଅଧିକାରୀ ଏଭଳି ଅଭିଯୋଗ ନେଇ କୋର୍ଟଙ୍କ ପାଖକୁ ଆସିନଥିବାରୁ PILର ବୈଧତା ଉପରେ ସନ୍ଦେହ ପ୍ରକଟ କରିଥିଲେ । ହେଲେ ଆମିକସ କ୍ୟୁରୀ ରାଜୁ ରାମଚନ୍ଦ୍ରନ ତାଙ୍କ ପ୍ରତିକ୍ରିୟାରେ, ପ୍ରକାଶ ସିଂ ନିର୍ଦ୍ଦେଶାବଳୀର ଉଲ୍ଲଂଘନ ହୋଇଥିବା ଅନୁଭବ କରୁଥିବା ମତ ରଖିଥିଲେ । ତେଣୁ ଆମିକସ କ୍ୟୁରୀଙ୍କ ମତାମତ ଆଧାରରେ କୋର୍ଟ ଆଜିର UPSC ବୈଠକକୁ ସ୍ଥଗିତ ରଖିବା ସହ ଆଗାମୀ ୧୮ ତାରିଖରେ ପରବର୍ତ୍ତୀ ଶୁଣାଣି ପାଇଁ ତାରିଖ ଧାର୍ଯ୍ୟ କରିଛନ୍ତି । ଅର୍ଥାତ ୧୮ ତାରିଖ ଶୁଣାଣି ନସରିବା ଯାଏଁ ଝୁଲି ରହିବ ଓଡ଼ିଶା ପୋଲିସ ଡିଜି ନିଯୁକ୍ତି ପ୍ରକ୍ରିୟା ।

ପଢନ୍ତୁ ଏହି ଖବର: ଚଳିଲାନି Loan, EMI ବାହାନା; ଛାଡ଼ପତ୍ର ପରେ ସ୍ତ୍ରୀଙ୍କୁ ୯୦ ଲକ୍ଷ ଦେବେ ସ୍ଵାମୀ

ସେପଟେ ଅଗଷ୍ଟ ୭ ତାରିଖରେ ୩ ଜଣ ଡିଜିପି ପାହ୍ୟା ଅଧିକାରୀଙ୍କ ନାଁ ଥିବା ତାଲିକା UPSCକୁ ଦେଇଥିଲା ରାଜ୍ୟ ସରକାରଙ୍କ ଗୃହ ବିଭାଗ । ଅଭିଯୋଗ ଅନୁସାରେ ପରବର୍ତ୍ତୀ ସମୟରେ ଏକ ସାନି ତାଲିକା ଦିଆଯାଇଥିବାବେଳେ ଏଥିରେ ୧୧ ଜଣଙ୍କ ନାଁ ସୁପାରିଶ କରାଯାଇଥିଲା । ଏହାରି ଭିତରେ ଦୁଇଜଣ ADG ପାହ୍ୟା ଅଧିକାରୀ ସଞ୍ଜୀବ ପଣ୍ଡା ଓ ଯଶୱନ୍ତ ଜେଠୱାଙ୍କୁ DG ପାହ୍ୟାକୁ ପଦୋନ୍ନତି ମଧ୍ୟ ଦିଆଯାଇଥିଲା । ଯାହା ପରେ ଏହି ପୂରା ମାମଲା କାଠଗଡ଼ାରେ ଛିଡ଼ା ହୋଇଛି । ଅନ୍ୟପଟେ ଆଗାମୀ ୧୬ ତାରିଖରେ ବର୍ତ୍ତମାନର ଡିଜିପି ୱାଇ.ବି ଖୁରାନିଆଙ୍କ କାର୍ଯ୍ୟକାଳ ଶେଷ ହେଉଛି ।