ଅର୍ଗସ ବ୍ୟୁରୋ : ପ୍ରକୃତିର ବିରଳ ବରଦାନ ଅଲିଭ ରିଡ଼ଲେ । ଏମାନେ କେବଳ ପ୍ରକୃତିର ସୌନ୍ଦର୍ଯ୍ୟ ବୃଦ୍ଧି କରିନଥାନ୍ତି ବରଂ ଉପକୂଳର ଇକୋସିସ୍ଟମର ସନ୍ତୁଳନ ବଜାୟ ରଖିଥାନ୍ତି । ପ୍ରତ୍ୟେକ ବର୍ଷ ନଭେମ୍ବର ଠାରୁ ମେ ମାସ ପର୍ଯ୍ୟନ୍ତ ପୁରୀ ବେଳାଭୂମିରେ ଦେଖାଯାଆନ୍ତି ଏହି ବିରଳ ପ୍ରଜାତି । ଗଣ ଅଣ୍ଡାଦାନ ପାଇଁ ସର୍ବକୃଷ୍ଟ ସ୍ଥାନ ଭାବି ପୁରୀ ଜିଲ୍ଲାର ବାଲୁଖଣ୍ଡ ଠାରୁ ସାତପଡ଼ା ପର୍ଯ୍ୟନ୍ତ ବେଳାଭୂମିକୁ ଚାଲି ଆସିଥାନ୍ତି । ପୁରୀ ଜିଲ୍ଲାର ମୁଖ୍ୟତଃ କୋଣାର୍କ, ବାଲୁଖଣ୍ଡ, ଅସ୍ତରଙ୍ଗ ଓ ବ୍ରହ୍ମଗିରି ବନାଞ୍ଚଳରେ ଏମାନେ ଦେଖିବାକୁ ମିଳିଥାନ୍ତି । ହେଲେ ୨୦୨୧ରୁ ୨୦୨୩ ବର୍ଷର ଏହି ସମୟରେ କାଁଭାଁ ଦେଖିବାକୁ ମିଳୁଛି ଏମାନଙ୍କ ବସା ଓ ଅଣ୍ଡାଦାନ । 

 

୨୦୨୧-୨୨ରେ ବାଲୁଖଣ୍ଡ ବନାଞ୍ଚଳରେ ଦେଖିବାକୁ ମିଳିଥିଲା ମାତ୍ର ୧୦୮ ଟି ବସା ଓ ବ୍ରହ୍ମଗିରିରେ ଦେଖିବାକୁ ମିଳିଥିଲା ମାତ୍ର ୬୫ଟି ବସା । ଯାହା ଗତ ୭ ବର୍ଷ ଭିତରେ ସର୍ବନିମ୍ନ । ସୂଚନା ଅନୁଯାୟୀ ୨୦୧୬-୧୭ ର କଥା ବିଚାରକୁ ନେଲେ ୩୦୪୩ ଟି ବସାରୁ ୧ଲକ୍ଷରୁ ଉର୍ଦ୍ଧ୍ଵ ଅଣ୍ଡା ସଂଗ୍ରହ କରାଯାଇଥିଲା । ଯାହା ପରବର୍ତ୍ତୀ ବର୍ଷ ମାନଙ୍କରେ କ୍ରମାଗତ ହ୍ରାସ ପାଇବାରେ ଲାଗିଛି । ଅତ୍ୟଧିକ କିରୋସିନ, ଡିଜେଲ ଚାଳିତ ଡଙ୍ଗା ହିଁ ଏମାନଙ୍କ ପାଇଁ ବଡ ପ୍ରତିବନ୍ଧକ ସାଜିବା ସହ କୂଳକୁ ଆସି ଅଣ୍ଡାଦାନ କରିବା ପୂର୍ବରୁ ହିଁ ଏମାନଙ୍କ ମୃତ୍ୟୁ ହେଉଛି ବୋଲି ଚିନ୍ତା ପ୍ରକଟ କରିଛନ୍ତି ପ୍ରକୃତିପ୍ରେମୀ ।

ଶୀତର ଆଗମନରେ ପ୍ରଜନନ ପାଇଁ ଯୋଜନ ଯୋଜନ ଦୂରରୁ ଉପକୂଳକୁ ଚାଲି ଆସିଥାନ୍ତି । ଏମାନଙ୍କ ସୁରକ୍ଷା ପାଇଁ ପ୍ରତ୍ୟେକ ବର୍ଷ ନଭେମ୍ବର ୧ରୁ ମେ ୧ ତାରିଖ ଉପକୂଳର ୨୦ କିମି ପର୍ଯ୍ୟନ୍ତ ମାଛଧରିବା ପାଇଁ ଡଙ୍ଗା ବା ବଡ଼ ଟ୍ରଲର ଚଳାଚଳ ନିଷିଦ୍ଧ ରହିଥାଏ । ହେଲେ ବିଗତ କିଛିବର୍ଷ ହେବ ବେଳାଭୂମି ପାଇଁ ସାଜିଛି ଅସୁରକ୍ଷିତ । ରାଜ୍ୟ ସରକାରଙ୍କ କଇଁଛ ସୁରକ୍ଷା କେବଳ ପ୍ରଚାର ସର୍ବସ୍ୱ ହୋଇ ରହିଛି ବୋଲି କହିଛନ୍ତି ଆଇନଜୀବି । ଗୋଟିଏ ପଟରେ ବେଳାଭୂମି ଜବରଦଖଲ ଅନ୍ୟପଟରେ ଡଙ୍ଗା ଚଳାଚଳ ଯୋଗୁଁ  ପ୍ରଦୂଶିତ ଉପକୂଳ ଏବେ କଇଁଛ ଆଗମନ ସଂଖ୍ୟା ହ୍ରାସ ପାଉଛି । ଏଭଳି ସ୍ଥିତି ରହିଲେ ଆଗାମୀ ଦିନରେ ପୁରୀ ବେଳାଭୂମିକୁ କଇଁଛ ଆସିବା ବନ୍ଦ ହେଇଯିବାର ଆଶଙ୍କା ରହିଛି । ତେଣୁ ଏହି ବିରଳ ପ୍ରଜାତିର ସୁରକ୍ଷା ପାଇଁ କେବେ ଚେତିବେ ସରକାର ତାକୁ ନେଇ ଏବେ ବଡ ପ୍ରଶ୍ନ ।