24 ବର୍ଷର ବିଜେଡି ସରକାରରେ ସରୁନି ଜଳ ଦୁର୍ଦ୍ଦଶା

ଅର୍ଗସ ବ୍ୟୁରୋ: ଗ୍ରୀଷ୍ମ ପୂର୍ବରୁ ସାରା ରାଜ୍ୟରେ ଜଳ ଯନ୍ତ୍ରଣାର ଦୟନୀୟ ଚିତ୍ର, ରାଜ୍ୟ ସରକାରଙ୍କ ମିଛ ପ୍ରଚାରର ପୋଲ୍ ଖୋଲିଛି । ପାନୀୟ ଜଳ ଯୋଗାଣରକୁ ନେଇ ବିକାଶର ଗୋଲାପି ଛବି ଦେଖାଇ ପରେ ରାଜ୍ୟବାସୀଙ୍କୁ ଧୋକା ଦେଇଛନ୍ତି ବିଜେଡି ସରକାର।  ପୁରୀ, ଜଗତସିଂହପୁରଠାରୁ ଆରମ୍ଭକରି କେନ୍ଦ୍ରାପଡ଼ା, କେନ୍ଦୁଝର ଜିଲ୍ଲାରେ ଉତ୍କଟ ପାନୀୟ ଜଳ ସମସ୍ୟା ଲୋକଙ୍କ ଚିନ୍ତା ବଢ଼ାଇଛି । ଶୋଷ ମେଣ୍ଟାଇବାକୁ କେଉଁଠି ଚୁଆ, ପୋଖରୀର ଦୂଷିତ ଜଳ ଉପରେ ଲୋକେ ଭରସା କରୁଛନ୍ତି ତ କେଉଁଠି କୂଅ ଓ ନଳକୂପ ନିକଟରେ ପାଣି ପାଇଁ ଲମ୍ବା ଲାଇନ ଲଗାଉଛନ୍ତି ଲୋକେ । ଏବେବି ତାଳଦଣ୍ଡା କେନାଲ ଉପରେ ନିର୍ଭର କରୁଛନ୍ତି ଜଗତସିଂହପୁର ଜିଲ୍ଲା ମଲାସାହି ପଞ୍ଚାୟତର ମଧୁପୁର ଗାଁ ଲୋକେ। ଫେଲ୍ ମାରିଛି ବସୁଧା ଯୋଜନା । ଦୀର୍ଘ ୩୦ ବର୍ଷ ଧରି ଲୁଣି ପାଣି ପିଉଛନ୍ତି ଗ୍ରାମବାସୀ ।

ସେହିପରି ପୁରୀ ସଦର ବ୍ଲକ ପ୍ରତାପପୁରୁଷତ୍ତୋମପୁର ପଞ୍ଚାୟତର କୃଷ୍ଣାଞ୍ଜନପୁର ଗ୍ରାମବାସୀଙ୍କ ଏକମାତ୍ର ଭରସା ବନିଛି ଦୂଷିତ ପୋଖରୀ । ରାତି ପାହିଲେ 2 ଶହରୁ ଅଧିକ ପରିବାର ଲୋକଙ୍କୁ ଜଳ ଚିନ୍ତା ଘାରୁଛି । 

ସେହିପରି ଦୂଷିତ ଜଳ ବ୍ୟବହାର କରି କେନ୍ଦ୍ରାପଡ଼ା ଜିଲ୍ଲା ମହାକାଳପଡ଼ା ବ୍ଲକ କିଆରବାଙ୍କ ଗ୍ରାମରେ ଚର୍ମରୋଗ ବ୍ୟାପୁଛି । ଗାଁରେ ପାନୀୟ ଜଳ ସୁବିଧା ନଥିବାରୁ ଲୋକେ  340 ପରିବାର ଦୀର୍ଘ 50ବର୍ଷ ଧରି ପୋଖରୀ ପାଣି ପିଇବାକୁ ବାଧ୍ୟ ହେଉଛନ୍ତି । ଦୀର୍ଘବର୍ଷ ଧରି ପାଣି ସମସ୍ୟାର ସମାଧାନ ପାଇଁ ଗ୍ରାମବାସୀ ବିଧାୟକ ଅତନୁ ସବ୍ୟସାଚୀଙ୍କୁ ଦାବି ଜଣାଇଥିଲେ ବି କୌଣସି ସୁଫଳ ମିଳିପାରିନାହିଁ । 

ସରକାରୀ ତଥ୍ୟ ଅନୁସାରେ ରାଜ୍ୟର 25ଟି ଜିଲ୍ଲାରେ 3 ହଜାର 463ଟି ଗାଁରେ ନାହିଁ ପାନୀୟ ଜଳ ବ୍ୟବସ୍ଥା। ରାଜ୍ୟରେ 3 ହଜାର 338 ଗାଁରେ ଲୋକେ ଆଇରନ ଯୁକ୍ତ ପାଣି ପିଉଥିବାବେଳେ 69ଟି ଗାଁରେ ଫ୍ଲୋରାଇଡ୍ ଯୁକ୍ତ, 33ଟି ଗାଁରେ ଲବଣ ଯୁକ୍ତ ଓ 25ଟି ଗାଁରେ ନାଇଟ୍ରେଟ୍ ଯୁକ୍ତ ପାଣି ଲୋକଙ୍କ ଶୋଷ ମେଣ୍ଟାଉଛି। 2024 ସୁଦ୍ଧା ପ୍ରତି ଗାଁକୁ ପାନୀୟ ଜଳ ଯୋଗାଇ ଦେବାକୁ ଲକ୍ଷ୍ୟ ରଖିଥିଲେ ବି ରାଜ୍ୟ ସରକାରଙ୍କ ସବୁଧା ଯୋଜନା ଉପକୂଳରୁ ଉପାନ୍ତ ସବୁଠି ଫେଲ୍ ମାରିଛି। 

ଅଧିକ ପଢ଼ନ୍ତୁ ଓଡ଼ିଶା ଖବର