ଅର୍ଗସ ବ୍ୟୁରୋ: ନିଜ ଦଳର ନେତା ନବ ଦାସଙ୍କ ହତ୍ୟାର ରହସ୍ୟ ଯେଉଁ ସରକାର ଏ ପର୍ଯ୍ୟନ୍ତ ଉନ୍ମୋଚନ କରିପାରିନି, ସେ ଦଳର ନେତା ପ୍ରଣବ ପ୍ରକାଶ ଦାଶ ଅନ୍ୟକୁ ଆଙ୍ଗୁଳି ନିର୍ଦ୍ଦେଶ କରୁଛନ୍ତି । ମମିତା ମେହେର, ପରୀ, କୁନ୍ଦୁଲି, ବେବିନା, ଇତିଶ୍ରୀ, ପିହୁ ଭଳି ଘଟଣାକୁ ଚପାଇବା ପାଇଁ ବିଜେଡି ସରକାର କଣ ଚେଷ୍ଟା କରିଛନ୍ତି, ତାହା ସମସ୍ତଙ୍କୁ ଜଣା । ବିଜେଡି ନେତା ନିଜେ ନିଜକୁ ପ୍ରଶ୍ନ ପଚାରି ହୃଦୟରୁ ଆସୁଥିବା ଉତ୍ତରକୁ ସମୀକ୍ଷା କରନ୍ତୁ ବୋଲି ‘ଏକ୍ସ’ରେ କହିଛନ୍ତି ବିଜେପି ବିଧାୟକ ଲଳିତେନ୍ଦୁ ବିଦ୍ୟାଧର ମହାପାତ୍ର । 

ବିଜେଡି ନେତା ପ୍ରଣବ ପ୍ରକାଶ ଦାସଙ୍କର ପାଠ କମ ବସ୍ତାନି ବେଶୀ । ଏ କଥାକୁ ଆମେ ଥରେ ନୁହେଁ ବହୁତ ଥର କହିସାରିଛୁ । ତାଙ୍କ ପିତା ସ୍ୱର୍ଗତ ଅଶୋକ ଦାସଙ୍କ ସ୍ୱଭାବରୁ ସେ କେମିତି ଦୁରେଇଗଲେ ? ସ୍ୱର୍ଗତ ଅଶୋକ ଦାସ ବି ଉପରେ ରହି ଭାବୁଥିବେ, ସେ ଯେଉଁ ପିଲାକୁ ଜନ୍ମ ଦେଇଥିଲେ, ସେ ଆଜି କେଉଁ ଭଳି କାମରେ ନିୟୋଜିତ ଅଛି । ସେ କେତେବେଳେ କ୍ରୀତଦାସର ଭୂମିକାର ଦାୟିତ୍ୱରେ ରହୁଛନ୍ତି ତ କେତେବେଳେ ଟ୍ରାଫିକ କାର୍ଯ୍ୟରେ ନିୟୋଜିତ ହେଉଛନ୍ତି । 

ନିଜର ଗୁମାସ୍ତାଙ୍କୁ ଖୁସି କରିବା ପାଇଁ ପ୍ରଣବ ପ୍ରକାଶ ଦାସ ଯେଉଁ ପାଠ ପଢାଉଛନ୍ତି, ତାହା ଦୁର୍ଭାଗ୍ୟଜନକ । ଅନ୍ତତଃ ତାଙ୍କ ଭଳି ନେତାଙ୍କ ଠାରୁ ଅବା କ’ଣ ଆଶା କରାଯାଇପାରେ  ? ପରୀ ଘଟଣା ଉପରେ ପ୍ରଣବ ପ୍ରକାଶ ଦାସ  ଯାହା କହିଛନ୍ତି, ସେ କଥା ନିଜକୁ ପଚାରିଲେ ଭଲ ହେବ । ଓଡ଼ିଶାକୁ ଆଜି ତଳ ସ୍ତରକୁ କିଏ ନେଇଛି  ? ଇଲେକ୍ଟେଡ୍ ମନ୍ତ୍ରୀମାନେ ନୋମିନେଟେଡ୍ ଲୋକ ପାଇଁ ପାଲ ପକାଉଛନ୍ତି ନା ନାହିଁ  ? ଓଡ଼ିଶାରୁ ଏଭଳି ହୀନ ରାଜନୈତିକ ପରମ୍ପରା ଶ୍ରୀ ଦାସଙ୍କ ଭଳି ନେତାମାନେ ଆରମ୍ଭ କରିଛନ୍ତି । ଓଡ଼ିଶାରେ ଯାହା ଚାଲିଛି, ଚକା ଆଖି ସବୁ ଦେଖୁଛି ବୋଲି ଶ୍ରୀ ମହାପାତ୍ର ଟ୍ୱିଟ୍ କରିଛନ୍ତି। 

ଅଧିକ ପଢ଼ନ୍ତୁ ରାଜନୀତି ଖବର