Baby Girl Birth / ପ୍ଲାଟଫର୍ମରେ ଶିଶୁକନ୍ୟାକୁ ଜନ୍ମ ଦେଲେ ମହିଳା… ଭୁବନେଶ୍ୱର ଷ୍ଟେସନରେ ଦେବଦୂତ ସାଜିଲେ ଆରପିଏଫ

ଟ୍ରେନ୍‌ରେ ଆସିଲା ପ୍ରସବ ବେଦନା, ପ୍ଲାଟଫର୍ମରେ ଜନ୍ମ ନେଲା ଶିଶୁକନ୍ୟା । ସାହାଯ୍ୟର ହାତ ବଢାଇଲେ ଆରପିଏଫ । ଭୁବନେଶ୍ୱର ରେଳ ଷ୍ଟେସନରେ ଘଟିଛି ଏପରି ଅଭାବନୀୟ ଘଟଣା । ବାଙ୍ଗିରିପୋଷି-ପୁରୀ ଏକ୍ସପ୍ରେସ୍‌ରେ ଯାତ୍ରା କରୁଥିବା ଜଣେ ମହିଳାଙ୍କ ହଠାତ୍ ପ୍ରସବ ବେଦନା ଆସିଥିଲା ।
 
ବାଙ୍ଗିରିପୋଷି-ପୁରୀ ଏକ୍ସପ୍ରେସ୍‌ ଟ୍ରେନ୍‌ଟି ଭୁବନେଶ୍ୱର ଷ୍ଟେସନର ୪ ନମ୍ବର ପ୍ଲାଟଫର୍ମରେ ପହଞ୍ଚିବା ପରେ ମହିଳାଙ୍କ ଅବସ୍ଥା ଦେଖି ସହାୟତାର ହାତ ବଢ଼ାଇଥିଲେ RPF ଅଧିକାରୀ ଓ ‘ମେରି ସହେଲୀ’ ଟିମ୍ । ତୁରନ୍ତ ପ୍ଲାଟଫର୍ମରେ ମହିଳାଙ୍କ ଚାରିପଟେ କପଡ଼ା ଦେଇ ଆବରଣ କରାଯାଇ ଗୋପନୀୟତା ରକ୍ଷା କରା ଯାଇଥିଲା । 

ଏଥିସହ ପଢ଼ନ୍ତୁ: ଶୁଭଶ୍ରୀ ନିଖୋଜ ଘଟଣା : ଗଡୁଛି ଦିନ ବଢୁଛି ସସ୍ପେନ୍ସ 

ମେଡିକାଲ୍ ନେବାକୁ ସମୟ ନଥିବାରୁ RPFର ମହିଳା ଅଧିକାରୀ ଓ ଅନ୍ୟ କର୍ମଚାରୀ ପ୍ରସବ ପାଇଁ ସହାୟତା କରିଥିଲେ । ଶେଷରେ  RPF ମହିଳା ଅଧିକାରୀ ଓ କର୍ମଚାରୀଙ୍କ ସହାୟତାରେ ପ୍ଲାଟଫର୍ମ ଉପରେ ହିଁ ଏକ ଶିଶୁକନ୍ୟାକୁ ଜନ୍ମ ଦେଇଛନ୍ତି ମହିଳା ଜଣଙ୍କ ।

ପରେ RPF ପକ୍ଷରୁ ଗାଡ଼ି ବ୍ୟବସ୍ଥା କରାଯାଇ ମା’ ଓ ନବଜାତ ଶିଶୁଙ୍କୁ ଭୁବନେଶ୍ୱର କ୍ୟାପିଟାଲ ହସ୍ପିଟାଲ୍‌ରେ ଭର୍ତ୍ତି କରାଯାଇଛି । ବର୍ତ୍ତମାନ ମା’ ଓ ନବଜାତ ଶିଶୁ ଉଭୟଙ୍କ ସ୍ଵାସ୍ଥ୍ୟାବସ୍ଥା ସ୍ଥିର ଥିବା ଜଣାପଡ଼ିଛି । ଭୁବନେଶ୍ଵର ରେଲୱେ ଷ୍ଟେସନର ଏହି ଘଟଣାର ଚର୍ଚ୍ଚା ଏବେ ସବୁଠି ହେଉଛି ।

ମହିଳା ଆରପିଏଫ୍ ଅଧିକାରୀଙ୍କ ଉଦ୍ୟମ ଯୋଗୁଁ ପ୍ରସବ ବେଦନା ପାଉଥିବା ମହିଳା ସୁରକ୍ଷିତ ଭାବେ ପ୍ରସବ କରିଛନ୍ତି । ଯାହାକୁ ନେଇ ସମସ୍ତେ ମହିଳା ଆରପିଏଫ୍ କର୍ମଚାରୀମାନଙ୍କୁ ଧନ୍ୟବାଦ ଜଣାଇଛନ୍ତି । ଅନେକ ସମୟରେ ଆରିପିଏଫ୍ ଟ୍ରେନ୍‌ ଯାତ୍ରା ସମୟରେ ଯାତ୍ରୀଙ୍କ ଜୀବନ ବଞ୍ଚାଉଥିବା ବେଳେ ଏବେ ଷ୍ଟେସନରେ ନୂଆ ଜୀବନକୁ ଦୁନିଆକୁ ଆଣିବା ପାଇଁ ବଡ଼ ପ୍ରୟାସ କରି ସଫଳତା ପାଇଛନ୍ତି ।