ବିସ୍ଫୋରଣ ମୁହାଁ ବିଜେଡି । ୱାକଫ୍ ବିଲ୍ ପ୍ରସଙ୍ଗରେ ରାଜ୍ୟସଭାରେ ବିଜେଡି ସାଂସଦଙ୍କ ଭୋଟ୍ ଦେବା ପରେ ଏବେ ଦଳ ବାରୁଦ ଗଦାରେ ବସିଲା ଭଳି ମନେ ହେଉଛି । ୱାକଫ୍ ବିଲକୁ ନେଇ ବିଜେଡି ଫାଳ ଫାଳ ହୋଇଥିଲା ଆଉ ବିଜେଡି ରାଜ୍ୟସଭା ସାଂସଦଙ୍କ ମଧ୍ୟରେ ମତଭେଦ ଜଳଜଳ ହୋଇ ଦିଶିଥିଲା । ବିଶେଷ କରି ବିବେକାନୁମୋଦିତ କଥା କହି ଡକ୍ଟର ସସ୍ମିତ ପାତ୍ର ବିଲ୍ ସପକ୍ଷରେ ଭୋଟ୍ ଦେବା ପରେ ଏବେ ତାଙ୍କ ବିରୋଧରେ ତୀବ୍ର ହୋଇଛି ଅସନ୍ତୋଷ ।

ୱାକଫ୍‌କୁ ନେଇ ସସ୍ମିତଙ୍କୁ ବଦ୍ରିଙ୍କ ଟାର୍ଗେଟ

ପୂର୍ବରୁ ଗତକାଲି ଭଦ୍ରକର ବରିଷ୍ଠ ବିଜେଡି ନେତା ସସ୍ମିତଙ୍କ ଉପରେ ଆକ୍ସନ ଡିମାଣ୍ଡ କରି ବିଜେଡି ସୁପ୍ରିମୋଙ୍କୁ ଚିଠି ଲେଖିଥିବା ବେଳେ ଆଜି ଆଉ ଜଣେ ଭେଟରାନ ପ୍ରତାପ ଜେନା ନବୀନଙ୍କୁ ଚିଠି ଲେଖିଛନ୍ତି । ବିଶେଷ କରି ସସ୍ମିତ ବିଲକୁ ନେଇ ଯାହା ଟ୍ବିଟ୍ କରିଥିଲେ ତାହା ଦଳର ଆଭିମୁଖ୍ୟ ବିରୋଧୀ ବୋଲି ଚିଠିରେ ଲେଖିଛନ୍ତି ପ୍ରତାପ । ଏହା ପଛରେ ଗଭୀର ଷଡ଼ଯନ୍ତ୍ରର ଗନ୍ଧ ବାରିବା ସହ ଷଡ଼ଯନ୍ତ୍ର ପଛରେ କିଏ, ତାକୁ ଅନୁଧ୍ୟାନ କରିବାର ଆବଶ୍ୟକତା ରହିଛି ।

ଏଥିସହ ରାଜ୍ୟସଭାରେ ଦଳୀୟ ନେତାଙ୍କୁ କାରଣ ଦର୍ଶାଅ ନୋଟିସ ଜାରି କରି ସ୍ପଷ୍ଟୀକରଣ ମଗାଯାଉ ବୋଲି ନବୀନଙ୍କୁ ପ୍ରତାପ ଅନୁରୋଧ କରିଛନ୍ତି । ଦୋଷ ତ୍ରୁଟି ତର୍ଜମା କରି ସସ୍ମିତଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ଦାବି କଲେ ମଧ୍ୟ କରିଛନ୍ତି ପ୍ରତାପ ଜେନା ।

ତେବେ ବିଜେଡି ଭିତରେ ଏହି ଗୃହଯୁଦ୍ଧ ପୂର୍ବ ଆଶଙ୍କାକୁ ସତ କରିବା ଭଳି ମନେ ହେଉଛି । କ୍ଷମତାରୁ ଆରମ୍ଭ ହୋଇଥିବା ଦଳ କ୍ଷମତା ଯିବା ପରେପରେ ହିଁ ସଫା ହୋଇଯିବାର ଯେଉଁ ଆଶଙ୍କା କରାଯାଉଥିଲା, ତାହା ଆପାତତଃ ସତ ହେବା ଭଳି ମନେ ହେଉଛି ।

Argus News | argus news | Odisha Latest News, Breaking News, Trending News, Live TV