ରାଜ୍ୟସଭାରେ ଚତୁର୍ଥ ଆସନ କାହାର । ବିଜେପି ଆସନ ହାତେଇବା ପାଇଁ ଅଣ୍ଟା ଭିଡ଼ିଥିବାବେଳେ ବିଜେଡି ଓ କଂଗ୍ରେସ ବି କସରତ ଚଳାଇଛନ୍ତି । ୟା ଭିତରେ ଗତକାଲି କେନ୍ଦ୍ର ଗୃହ ମନ୍ତ୍ରୀ ତଥା ବିଜେପିର ଚାଣକ୍ୟ କୁହାଯାଉଥିବା ଅମିତ ଶାହଙ୍କ ରାଜ୍ୟ କାର୍ଯ୍ୟାଳୟରେ ବୈଠକ ଚର୍ଚ୍ଚା ବଢ଼ାଉଛି ।

ରୋଚକ ସ୍ଥିତିରେ ରାଜ୍ୟସଭା ନିର୍ବାଚନ । ଚତୃର୍ଥ ଆସନ ପାଇଁ ବିଜେପି ଓ ବିଜେଡି କଂଗ୍ରେସ ମେଣ୍ଟ ଭିତରେ ବଢୁଛି ଛକାପଞ୍ଝା । ଆଉ ଏହାରି ଭିତରେ କେନ୍ଦ୍ର ଗୃହ ମନ୍ତ୍ରୀ ତଥା ବିଜେପିର ଚାଣକ୍ୟ କୁହାଯାଉଥିବା ଅମିତ ଶାହଙ୍କ ରାଜ୍ୟ କାର୍ଯ୍ୟାଳୟରେ ବୈଠକ ବଢ଼ାଉଛି ଚର୍ଚ୍ଚା । ଗତକାଲି ଗୃହ ମନ୍ତ୍ରୀଙ୍କୁ ରାଜ୍ୟ କାର୍ଯ୍ୟାଳୟରେ ଭେଟିଥିଲେ ବିଜେପି ସମର୍ଥିତ ଚତୁର୍ଥ ରାଜ୍ୟସଭା ପ୍ରାର୍ଥୀ ଦିଲ୍ଲୀପ ରାୟ । ପରେ ବରିଷ୍ଠ ନେତାଙ୍କୁ ନେଇ ବସିଥିବା ବୈଠକରେ ଦିଲ୍ଲୀପ ରାୟଙ୍କୁ ଜିତାଇବାକୁ ସ୍ୱତନ୍ତ୍ର ରଣନୀତି ପ୍ରସ୍ତୁତ ହୋଇଥିବା ସୂଚନା ମିଳିଛି ।

ବିଜେପିର ସମର୍ଥନ ପାଇବା ପରେ ଦିଲ୍ଲୀପଙ୍କ ପାଖରେ ଅଛି ୨୨ ବିଧାୟକଙ୍କ ସମର୍ଥନ । ବିଜୟ ପାଇଁ ଦିଲ୍ଲୀପଙ୍କୁ ଦରକାର ଆଉ ୮ ବିଧାୟକଙ୍କ ସମର୍ଥନ । ବିଜେଡିର ଦୁଇ ନିଲମ୍ବିତ ବିଧାୟକ ଅରବିନ୍ଦ ମହାପାତ୍ର ଓ ସନା ମହାକୁଡ଼ଙ୍କ ସମର୍ଥନ ଦିଲ୍ଲୀପଙ୍କ ଆଡକୁ ରହିବା ସଂକେତ ମିଳିଛି । ଏହାରି ଭିତରେ ବିଜେଡି ବିଧାୟକ ସୌଭିକ ବିଶ୍ୱାଳଙ୍କ ସହ କଂଗ୍ରେସ ବିଧାୟିକ ସୋଫିଆ ଫିର୍ଦ୍ଦୋଷ ଦତ୍ତ୍ୱେଶ୍ୱରଙ୍କ ଅଙ୍କ ବିଗାଡି ପାରନ୍ତି । ତେବେ ବିଜେଡିରେ ଥିବା ବିଜୁ ପ୍ରେମୀ ବିଧାୟକ ଦିଲ୍ଲୀପଙ୍କ ଆଡକୁ ଢ଼ଳିବା ନେଇ ବିଜେପି ଇସାରା ଦେଇଥିବା ବେଳେ ସବୁ ବିଧାୟକ ଏକଜୁଟ ଥିବା କହିଛନ୍ତି ବିଜେଡି ଓ କଂଗ୍ରେସ ।

ଏହାରି ଭିତରେ ଦିଲ୍ଲୀ ଯାଇ ଏଆଇସିସି ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କୁ ଭେଟିଛନ୍ତି ପିସିସି ସଭାପତି ଓ ରାଜ୍ୟସଭା ପ୍ରାର୍ଥୀ ଦତ୍ତେଶ୍ୱର ହୋତା । ତେବେ ଛକାପଞ୍ଝା ରାଜନୀତି ଭିତରେ କିଏ ଚତୁର୍ଥ ଆସନରେ ବାଜି ମାରିବ ତାହା ଉପରେ ସମସ୍ତଙ୍କ ନଜର ରହିଛି ।