ବିଜେଡିରୁ ବଳି ପଡୁଥିବା ନେତାଙ୍କ ଭିତରେ ଆଗକୁ କିଏ ? ଏହି ତାଲିକାରେ ଏବେ ବବି ଦାସଙ୍କ ନାଁକୁ ନେଇ ଆରମ୍ଭ ହୋଇଛି ଚର୍ଚ୍ଚା । କୁହାଯାଉଛି, ପାଣ୍ଡିଆନଙ୍କ ସହ ଶତ୍ରୁତା ବବିଙ୍କୁ ଭାରି ପଡ଼ିପାରେ । ଦଳ ତାଙ୍କ ବିରୋଧରେ ନେଇପାରେ ଆକ୍ସନ । ବିଜୟ ମହାପାତ୍ରଙ୍କ ସହ ଫଟୋ ଦେଖାଇ ଆକ୍ସନ ନେବାକୁ କୋଟେରୀ ଗ୍ରୁପ୍ ପ୍ଲାନ୍ କରୁଥିବା ଚର୍ଚ୍ଚା ଜୋର ଧରିଛି ।

ବବି ଦାସଙ୍କ ଉପରେ ଆକ୍ସନ ନେଇପାରେ ବିଜେଡି । ପାଣ୍ଡିଆନଙ୍କ ସହ ଦୁଶମନୀ ପ୍ରଣବଙ୍କୁ ପଡ଼ିପାରେ ମହଙ୍ଗା । ଚର୍ଚ୍ଚା ସୁଜାତାଙ୍କ ରାଜ୍ୟସଭା ଯିବା ବାଟରେ କଣ୍ଟା ସାଜିଛନ୍ତି ବବି । ବିଜୟଙ୍କ ସହ ଫଟୋ ଦେଖାଇ ଆକ୍ସନ ନେବାକୁ କୋଟେରୀ ଗ୍ରୁପର ସଜବାଜ ।

ବସୁଛି ଘନ ଘନ ବୈଠକ । ନବୀନ ନିବାସରେ ଲାଗୁଛି ନେତାଙ୍କ ଭିଡ଼ । ଚର୍ଚ୍ଚା ଅରବିନ୍ଦ ଓ ସନାଙ୍କ ପରେ ବବିଙ୍କ ଉପରେ ହୋଇପାରେ ଆକ୍ସନ । କୁହାଯାଉଛି ସୁଜାତାଙ୍କ ରାଜ୍ୟସଭା ଯିବା ବାଟରେ କଣ୍ଟା ସାଜିଛନ୍ତି ବବି । ସେଥିପାଇଁ ପାଣ୍ଡିଆନଙ୍କ ଗୋଟି ଚାଳନାରେ ବବିଙ୍କ ଉପରେ ଆକ୍ସନ ନେବାକୁ ଚାଲିଛି ଯୋଜନା । ଏ ସବୁ ଭିତରେ ପ୍ରମିଳାଙ୍କ ବାସଭବନରେ ବସିଥିବା ଯାଜପୁର ନେତାଙ୍କ ବୈଠକ ଚର୍ଚ୍ଚାକୁ ଅଧିକ ଖୋରାକ ଯୋଗାଇଛି । ଯାଜପୁରର ଭୁଶୁଡୁ ଥିବା ସଂଗଠନ ପାଇଁ ବୈଠକ ବସିଥିବା ବେଳେ ଅଧାରୁ ଉଠି ଚାଲି ଯାଇଥିଲେ ବବି । କିଛି ସମୟ ପରେ ବୈଠକରୁ ବାହାରି ପରୋକ୍ଷରେ ବବିଙ୍କୁ କାଗଜ ବାଘ କହି ବର୍ଷିଥିଲେ ପ୍ରୀତିରଞ୍ଜନ ଘଡେ଼ଇ ।

ସେହିପରି ସୁଜାତା ଯାଜପୁର ସଂଗଠନରେ କିଛି ଟା କନ୍ଦଳ ରହିଥିବା ସ୍ୱୀକାର କରିବା ସହ ବବି-ବିଜୟଙ୍କ ଫଟୋକୁ ନେଇ ବି ରଖିଥିଲେ ପ୍ରତିକ୍ରିୟା । ଖାଲି ସେତିକି ନୁହେଁ ବୈଠକ ପରେ ପରେ ସଞ୍ଜୟ ଓ ପ୍ରତାପଙ୍କୁ ଧରି ନବୀନ ନିବାସରେ ପହଞ୍ଚି ଥିଲେ ପ୍ରମିଳା କିନ୍ତୁ ବବି ନଥିଲେ ସାଥିରେ । ଯାହା ସବୁ କିଛି ଚର୍ଚ୍ଚା ଆଲୋଚନାକୁ ଅଧିକ ଖୋରାକ ଯୋଗାଇଛି ।

ସେପଟେ ମିଡ୍‌ ଡେ' ଅପରେସନର ଅଭିଯୋଗ ଭିତରେ ପାଟକୁରାରେ ପୁଣି ଥରେ ଆଜି ଶକ୍ତି ପ୍ରଦର୍ଶନ କରିଛନ୍ତି ବିଜୟଙ୍କ ପୁଅ ତଥା ବିଜେଡିରୁ ନିଲମ୍ବିତ ବିଧାୟକ ଅରବିନ୍ଦ ମହାପାତ୍ର । ଅରବିନ୍ଦ ଓ ବିଜୟ ମହାପାତ୍ରଙ୍କ ସମର୍ଥକମାନେ ମଙ୍ଗଳବାର କଳାବୁଦା ଗ୍ରାମରେ ଏକଜୁଟ ହୋଇ ସାମ୍ବାଦିକ ସମ୍ବିଳନୀ କରିବା ସହ ପୁନର୍ବାର ବିଧାୟକଙ୍କ ଉପରେ ନିଲମ୍ବନ ହଟାଇବାକୁ ଦାବି କରିଛନ୍ତି । ଏହି ସାମ୍ବାଦିକ ସମ୍ବିଳନୀରେ ମାର୍ଶାଘାଇ ବ୍ଲକର ୮ଟି ପଂଚାୟତ ସମେତ ଗରଦପୁର ବ୍ଲକର ଶତାଧିକ ବିଜେଡି କର୍ମୀ ଓ ସରପଞ୍ଚ ସମିତିସଭ୍ୟ ସାମିଲ ହୋଇଥିଲେ ।

ଚର୍ଚ୍ଚା ସୁଜାତା ପାଣ୍ଡିଆନଙ୍କୁ ରାଜ୍ୟସଭା ପଠାଇବା ଜିଦରେ ବିଜେଡିକୁ ଭାଙ୍ଗି ଦେବେ କି ଭୈରବ ପାଣ୍ଡିଆନ ? ଅରବିନ୍ଦ ଓ ସନାଙ୍କ ଆକ୍ସନ ପରେ ବିଜୟ ଓ ବବି ଫଟୋ ବିଜେଡିର ଅନ୍ଦର ମହଲରୁ ଭାଇରାଲ କରାଯିବା ପଛରେ ରହିଛି କି ବବିଙ୍କ ଉପରେ ଆକ୍ସନ ଥିଓରୀ ?