ଶଙ୍ଖ ଭବନ ଘେରାଉ କଲେ ବିଜେଡି କର୍ମୀ । କ୍ଷମତାରୁ ଯିବା ପରେ ଯେ ଏପରି ଦିନ ବିଜେଡି ଦେଖିବ ଏହା ମୁଖିଆ ନବୀନ କେବେ ବି ଭାବି ନଥିବେ । କେତେ ବଡ଼ ବଡ଼ ନେତାଙ୍କୁ ଗୋଟିଏ ଫରମାନରେ ଦଳ ବାହାର ରାସ୍ତା ଦେଖାଇ ଦେଇଛନ୍ତି କିନ୍ତୁ କେହି ପଦଟିଏ ବି ମୁହଁ ଖୋଲିବାକୁ ସାହସ ଜୁଟାଇ ପାରିନାହାନ୍ତି । କିନ୍ତୁ ଅରବିନ୍ଦ ମହାପାତ୍ରଙ୍କୁ ଦଳରୁ ନିଲମ୍ବନ ବିଜେଡି ଓ ନବୀନଙ୍କ ପାଇଁ ବଢାଇବାରେ ଲାଗିଛି ଟେନସନ୍ । ନବୀନଙ୍କ ରିଆକ୍ସନ ପରେ ଅରବିନ୍ଦଙ୍କ ସମର୍ଥକଙ୍କ ଆକ୍ସନ ଦେଖାଇଛନ୍ତି । ଆଉ ଶଙ୍ଖ ଭବନ ଆଗରେ ଶହ ଶହ ସମର୍ଥକ କରିଛନ୍ତି ଶକ୍ତି ପ୍ରଦର୍ଶନ ।

ଅଧିକ ପଢ଼ନ୍ତୁ: ପାଣ୍ଡିଆନଙ୍କ ସହ ଶତ୍ରୁତା ପଡ଼ିପାରେ ମହଙ୍ଗା, ବବି ଦାସଙ୍କ ଉପରେ ଆକ୍ସନ ନେଇପାରେ ବିଜେଡି !

ଆଜି ଅପରାହ୍ନରେ ହଠାତ୍ ନବୀନ ନିବାସ ପାଖରେ ସୁରକ୍ଷା ବଢାଇ ଦିଆଯାଇଥିଲା । ସେପଟେ ଫରେଷ୍ଟ ପାର୍କ ପାଖରେ ଲୋକଙ୍କର ଭିଡ ବଢୁଥିଲା । ଦେଖୁ ଦେଖୁ ହଜାରରୁ ଅଧିକ ଲୋକ ଶଙ୍ଖ ଭବନ ଆଡକୁ ମାଡି ଆସିଥିଲେ । ଜଣାପଡ଼ିଥିଲା ଏମାନେ ହେଉଛନ୍ତି ପାଟକୁରା ବିଧାୟକ ଅରବିନ୍ଦ ମହାପାତ୍ରଙ୍କ ସମର୍ଥକ । ସେମାନଙ୍କର ଯୋଜନା ଥିଲା ନବୀନ ନିବାସ ଯାଇ ବିଜେଡି ସଭାପତିଙ୍କୁ ଭେଟି ଅରବିନ୍ଦଙ୍କ ଉପରୁ ନିଲମ୍ବନ ପ୍ରତ୍ୟାହାର ପାଇଁ ଦାବି କରିବା । କିନ୍ତୁ ସୁରକ୍ଷା ବ୍ୟବସ୍ଥାକୁ ଦେଖି ଶଙ୍ଖ ଭବନ ଘେରାଉ ପାଇଁ ହୋଇଥିଲା ଯୋଜନା । ଶୋଭାଯାତ୍ରାକାରୀଙ୍କ ମୁହଁରେ ଥିଲା ଗୋଟିଏ କଥା ଅରବିନ୍ଦଙ୍କ ବିରୋଧରେ ହୋଇଛି ଚକ୍ରାନ୍ତ ।

ଶଙ୍ଖ ଭବନ ନିକଟରେ ପହଞ୍ଚି ଘେରାଉ କରିଥିଲେ ଅରବିନ୍ଦଙ୍କ ହଜାରରୁ ଅଧିକ ସମର୍ଥକ । ଆଉ ଅରବିନ୍ଦଙ୍କ ବିରୋଧରେ ଆକ୍ସନ ପଛରେ ଅତନୁ ସବ୍ୟସାଚ୍ଚୀଙ୍କ ଚକ୍ରନ୍ତ ଥିବା ସିଧା ସିଧା କହିଥିଲେ ପାଟକୁରା ବିଜେଡି ନେତା । ଶଙ୍ଖ ଭବନ ଭିତରେ ଥିବା ଦେବୀ ମିଶ୍ର ଓ ପ୍ରତାପ ଜେନାଙ୍କୁ ଭେଟି ନିଜ ଦାବି ଜଣାଇଥିଲେ ସେମାନେ । ଆଉ ଖୋଲାଖୋଲି ଚେତାବନୀ ଦେଇଥିଲେ ଦଳର ମୁଖିଆଙ୍କୁ ।

ଅଧିକ ପଢ଼ନ୍ତୁ: ନବୀନଙ୍କ ଓଡ଼ିଆ ଭାଷଣ ନେଇ ସମାଲୋଚନା, ସୋସିଆଲ ମିଡିଆରେ ପୋଷ୍ଟ ହେଲା ବିଜେଡି ସୁପ୍ରିମୋଙ୍କ ସ୍କ୍ରିପ୍ଟ

ଏହା ହିଁ ବୟାନ କରୁଛି କ୍ଷମତା ଯିବା ପରେ ଆଉ ନବୀନଙ୍କ ପ୍ରତି ନାହିଁ ଦଳର ନେତା ଓ କର୍ମୀଙ୍କ ଡର । ଅରବିନ୍ଦଙ୍କ ସମର୍ଥକ ଖୋଲାଖୋଲି ଚେତାବନୀ ଦେଇଛନ୍ତି ନିଲମ୍ବନ ପୁନର୍ବିଚାର ନ ହେଲେ ଓଡ଼ିଶାରୁ ନିଶ୍ଚିହ୍ନ ହୋଇଯିବ ବିଜେଡି ।