୨୦୨୪ ନିର୍ବାଚନରେ ବିଜେଡି ପାଇଁ କାଳ ପାଲଟିଲେ ପାଣ୍ଡିଆନ । ଆଉ ଏବେ ଦଳ ଭିତରେ ଫାଟର ବଡ଼ କାରଣ ପାଲଟିଛନ୍ତି ତାଙ୍କ ପତ୍ନୀ ସୁଜାତା । ତାଙ୍କ ଏଣ୍ଟ୍ରି ଚର୍ଚ୍ଚା ଭିତରେ ଶଙ୍ଖ ଦଳର ନେତା ଏବେ ଭାଗ ଭାଗ । ନାଁ ନ ନେଇ ପାଣ୍ଡିଆନଙ୍କୁ ପିଟିବାକୁ ଧମକ ଦେଇଛନ୍ତି ସାଂସଦ ମୁନ୍ନା ଖାଁ । ସେପଟେ ପାଣ୍ଡିଆନ ଦମ୍ପତ୍ତିଙ୍କ ସପକ୍ଷରେ ବାହାରିଛନ୍ତି ଦଳର ବରିଷ୍ଠ ନେତା ପ୍ରଭାତ ବିଶ୍ବାଳ ଓ କିଛି ଯୁବ ନେତା ।

ନବୀନଙ୍କ ତଣ୍ଟିରେ ଲାଗିଛି ସୁଜାତା କଣ୍ଟା । ନା ଢ଼ୋକି ପାରୁଛନ୍ତି ନା କାଢ଼ି ପାରୁଛନ୍ତି । ପ୍ରତିଷ୍ଠା ଦିବସରେ ସୁଜାତାଙ୍କ ବିଜେଡି ଏଣ୍ଟ୍ରି ଚର୍ଚ୍ଚାକୁ ନବୀନ ଆଜି ଭୁଲ ପ୍ରମାଣିତ କରିଥିଲେ ବି ଦଳୀୟ କନ୍ଦଳକୁ ରୋକି ପାରି ନାହାନ୍ତି । ପ୍ରତିଷ୍ଠା ଦିବସରେ ଦଳୀୟ କନ୍ଦଳ ପ୍ରଶମିତ ହେବା ବଦଳରେ ଅଧିକ ଫୁଟି ପଦାକୁ ଆସିଛି । ସବୁରି ମୂଳରେ ରହିଛି ସେଇ ସୁଜାତାଙ୍କ ବିଜେଡି ଏଣ୍ଟ୍ରି ପ୍ରସଙ୍ଗ । ବିଜୁଙ୍କ ମାଡ଼ ଥିଓରୀ ରଖି ପ୍ରତିଷ୍ଠା ଦିବସର ସଭା ମଞ୍ଚକୁ ଦୋହଲାଇ ଦେଇଛନ୍ତି ଏକଦା ନବୀନଙ୍କ ଖାସମ ଖାସ କୁହାଯାଉଥିବା ଦଳର ରାଜ୍ୟସଭା ସାଂସଦ ମୁନ୍ନା ଖାଁ । ଦୋ ମୁଣ୍ଡିଆଙ୍କ ଦୁଇପଟେ ଚାଲାକି ଚଳିବନି କହି ମାରିଛନ୍ତି ବାଣ । ମୁନାଙ୍କୁ ଜବାବ ଦେଇଛନ୍ତି ପ୍ରତାପ ।

ପ୍ରତିଷ୍ଠା ଦିବସରେ ସୁଜାତାଙ୍କ ବିଜେଡି ଏଣ୍ଟ୍ରି ହୋଇ ନଥିଲେ ବି ପାଣ୍ଡିଆନଙ୍କ ଫର୍ମୁଲା ଆସିଯାଇଛି ସାମ୍ନାକୁ । ରାଜ୍ୟସଭା ନିର୍ବାଚନ ବେଳେ ବିଜେଡିରେ ସୁଜାତାଙ୍କ ଏଣ୍ଟ୍ରି କରାଇବା ନେଇ ଦାବି କରିଛନ୍ତି କିଛି ପ୍ରୋ-ପାଣ୍ଡିଆନ ନେତା । ଦଳର ବରିଷ୍ଠ ନେତା ପ୍ରଭାତ ବିଶ୍ୱାଳ କହିଛନ୍ତି ବିଜେଡି ଭାଗରେ ପଡ଼ୁଥିବା ରାଜ୍ୟସଭା ଆସନ ସୁଜାତାଙ୍କୁ ମିଳୁ । ସେହିପରି ଯୁବ ଓ ଛାତ୍ର ସଭାପତି ମଧ୍ୟ ମହିଳା ନେତୃତ୍ୱ କଥା ଉଠାଇ ସୁଜାତାଙ୍କ ହନୁମାନ ହୋଇ କାମ କରିବାକୁ ଆଗଭର ହୋଇଛନ୍ତି ।

ସୁଜାତାଙ୍କ ଏଣ୍ଟ୍ରି ନେଇ ଏବେ ବି ବିଜେଡି ବିବାଦ ଥମି ନଥିବା ବେଳେ ନବୀନ କିନ୍ତୁ କହିଛନ୍ତି ବିଜେଡି ଜଣେ କିମ୍ବା ଦୁଇ ଜଣ ନେତାଙ୍କ ଦଳ ନୁହେଁ, ଯାହା ଚର୍ଚ୍ଚା ହେଉଛି ତାହା ଗୁଜବ । ତେବେ ଦେଖିବାର କଥା ସୁଜାତାଙ୍କୁ ରାଜ୍ୟସଭା ଆସନ ଚର୍ଚ୍ଚାକୁ କେମିତି ଗ୍ରହଣ କରୁଛନ୍ତି ଆଣ୍ଟି ପାଣ୍ଡିଆନ ଗୋଷ୍ଠୀ । ବିବାଦ ଭିତରେ କେଉଁ ଆଡ଼କୁ ଗତି କରୁଛି ବିଜେଡିର ଆଭ୍ୟନ୍ତରୀଣ ରାଜନୀତି ତାହା ଦେଖିବାର ବିଷୟ ।