Pandian Leadership Controversy / 'ଆମେ ପାଣ୍ଡିଆନଙ୍କୁ କେବେ ବି ନେତା ମାନି ନାହୁଁ'

ବିଦ୍ରୋହୀଙ୍କ ମେଳି ପରେ ବିଜେଡିରେ ମୂଷା ଖୋଜା । ଅମାର, ମୂଷା ଓ ସାପ ଥିଓରୀ କହି ଚେତାବନୀ ଦେଲେ ସମ୍ବିତ ରାଉତରାୟ । ବିଜେଡି କହିଲେ ନବୀନ ନ୍ୟାରେଟିଭ ଆଉ ଚଳିବନି । ଅମାର ଭିତର ମୂଷା ବୋଲି କାହାକୁ କହିଲେ ସମ୍ବିତ ? ସେପଟେ ପାଣ୍ଡିଆନକୁ ନେତା ମାନିବାକୁ ନାରାଜ ବିଦ୍ରୋହୀ ଗୋଷ୍ଠୀ ।

ଆଉ ଦିନ କେଇଟା ପରେ ବିଜେଡିର ପ୍ରତିଷ୍ଠା ଦିବସ । ହେଲେ ଥମିବାର ନାଁ ଧରୁନି ଦଳୀୟ କନ୍ଦଳ । ଗତ ଦୁଇ ଦିନ ତଳେ ବନ୍ଧୁ ମିଳନ ନାଁରେ ଝୁମୁକା ଡ୍ୟାମରେ ଖୋଲାଖୋଲି ଶକ୍ତି ପ୍ରଦର୍ଶନ କରିଥିଲେ ୫୦ରୁ ଉର୍ଦ୍ଧ୍ଵ ବିଦ୍ରୋହୀ ନେତା । ଯାହା ପରେ ଦଳ ଭିତରେ ପାଣ୍ଡିଆନ ବିରୋଧୀ ନିଆଁ ଧିରେ ଧିରେ ତେଜିବାରେ ଲାଗିଲାଣି ।

ଶୁକ୍ରବାର ଭୋଜିରେ ମିଶିଥିବା ପାରାଦୀପର ପୂର୍ବତନ ବିଧାୟକ ସମ୍ବିତ ରାଉତରାୟ କହିଛନ୍ତି, ଆମେ ପାଣ୍ଡିଆନଙ୍କୁ କେବେ ବି ନେତା ମାନି ନାହୁଁ । ନେତା ହେଉଛନ୍ତି ନବୀନ ପଟ୍ଟନାୟକ । ପାଣ୍ଡିଆନ କେବଳ ଜଣେ ଭଲ ମ୍ୟାନେଜର । ଦଳକୁ କେହି ହାଇଜ୍ୟାକ୍‌ କରିପାରିବେ ନାହିଁ । ଆମେ ସୈନିକ ହୋଇ ଲଢିବୁ ।

ସେପଟେ ପ୍ରତିଷ୍ଠା ଦିବସରେ ନବୀନ ସୁଜାତାଙ୍କୁ ଦଳର ଭାର ଦେବା ନେଇ ହେଉଥିବା ଚର୍ଚ୍ଚାକୁ ଖଣ୍ଡନ କରିଛନ୍ତି ସମ୍ବିତ । ଖାଲି ଏତିକି ନୁହେଁ, ସମ୍ବିତ ରାଉତରାୟ ଅମାର, ମୂଷା ଓ ସାପ ଥିଓରୀ ମାଧ୍ୟମରେ ସମସ୍ତଙ୍କୁ ଚେତାବନୀ ବି ଦେଇଛନ୍ତି । ବିଜେଡି କହିଲେ କେବଳ ଯେ ନବୀନଙ୍କୁ ବୁଝାଏ, ସେ ନ୍ୟାରେଟିଭ ଆଉ ଚଳିବନି ବୋଲି ପରୋକ୍ଷରେ ଶୁଣାଇ ଦେଇଛନ୍ତି ସମ୍ବିତ ।

ସେପଟେ ଦଳ କହିଛି, ମତାନ୍ତର, ମନାନ୍ତର ରହିବା ସ୍ଵାଭାବିକ । ଭୋଜି ଭାତ ଚାଲିବ । କାହାକୁ ଡାକିବେ ନ ଡାକିବେ ସେମାନଙ୍କ ନିଷ୍ପତ୍ତି । କେହି ମେଳି କରୁନାହାନ୍ତି, ଦଳ ଏକ ଅଛି ।

ସୂଚନା ଅନୁସାରେ, ୨୪ ନିର୍ବାଚନରେ ବିଜେଡି ହାତରୁ ଶାସନ କ୍ଷମତା ଖସିଲା ପରେ ଦଳରେ ବିସ୍ଫୋରଣର ରୂପ ନେଲାଣି ଗୋଷ୍ଠୀ କନ୍ଦଳ । ଆଉ ଏବେ ନିକଟରେ ନୂଆପଡା ପରାଜୟ ଯୋଗୁଁ ପୁଣି ନବୀନଙ୍କ କଟା ଘାଆରେ ଚୂନ ଲାଗିଛି । ଅନ୍ୟପଟେ ପ୍ରତିଷ୍ଠା ଦିବସ ପାଖଉ ଥିବା ବେଳେ ମେଳି ବାନ୍ଧିବା ସହ ଦଳ ଭିତରେ ନେତାଙ୍କ ଲଗାମ ଛଡା ବୟାନବାଜି ନେତୃତ୍ଵ ଉପରେ ପ୍ରଶ୍ନ ଚିହ୍ନ ଛିଡାକରୁଛି । ବିଦ୍ରୋହର ବହ୍ନି ବିଜେଡିକୁ କେଉଁ ସ୍ଥିତିକୁ ନେଉଛି ତାହା ଉପରେ ରହିଛି ନଜର ।