ରାଜ୍ୟସଭା ରେସକୁ ନେଇ ବିଜେଡି ଭିତରେ ଟଣା ଓଟରା । କିଏ ଯିବ ରାଜ୍ୟସଭା, ଆଉ କାହାକୁ ବାଛିବେ ଦଳର ସୁପ୍ରିମୋ ତାକୁ ନେଇ ଜୋର ଧରିଛି ଚର୍ଚ୍ଚା । ରେସରେ ଦେବୀ ମିଶ୍ର, ବବି ଦାସ, ସଂତୃପ୍ତ, ସୁଜାତା, ଲେନିନଙ୍କ ଭଳି ନେତା ରହିଥିବା ବେଳେ ଲବି ମଧ୍ୟ ଆରମ୍ଭ ହେଲାଣି । ଏ ଭିତରେ ବରିଷ୍ଠ ବିଜେଡି ନେତା ଅଶୋକ ପଣ୍ଡା ପୁରୁଖା ନେତାଙ୍କୁ ପ୍ରାର୍ଥୀ କରାଯାଉ ବୋଲି କହି ଗୁଗଲି ମାରିଛନ୍ତି ।

ସୁଜିତ କୁମାର, ମମତା ମହନ୍ତ, ନିରଞ୍ଜନ ବିଶି ଓ ମୁନ୍ନା ଖାନ । ବିଜେପିର ୨ ରାଜ୍ୟସଭା ସାଂସଦଙ୍କ କାର୍ଯ୍ୟକାଳ ଶେଷ ହେଉଥିବା ବେଳେ ବିଜେଡିର ବି ଦୁଇ ରାଜ୍ୟସଭା ସାଂସଦଙ୍କ କାର୍ଯ୍ୟକାଳ ଶେଷ ହେଉଛି । ମାତ୍ର ସଂଖ୍ୟା ଦୃଷ୍ଟିରୁ ବିଜେପି ଖାତକୁ ଯାଉଛି ୨ଟି ଆସନ, ଆଉ ବିଜେଡି ଖାତାକୁ ଯାଉଛି ଗୋଟିଏ ଆସନ । ଚତୁର୍ଥ ଆସନକୁ ନେଇ ରାଜ୍ୟ ରାଜନୀତି ସରଗରମ ରହିଛି । ଏହା ଭିତରେ କିନ୍ତୁ ବିଜେଡି ଖାତାକୁ ଯାଉଥିବା ଗୋଟିଏ ଆସନ ପାଇଁ ଦଳ ଭିତରେ ବଢିବାରେ ଲାଗିଛି କଳି । ଆସନ ଗୋଟିଏକୁ ଏକାଧିକ ଆଶାୟୀ ଅଛନ୍ତି ରେସରେ । ଦେବୀ ମିଶ୍ର, ପ୍ରଣବ ପ୍ରକାଶ ଦାସ, ସଂତୃପ୍ତ ମିଶ୍ର, ସୁଜାତା କାର୍ତ୍ତିକେୟାନ ପାଣ୍ଡିଆନ ଓ ଲେନିନି ମହାନ୍ତିଙ୍କ ନାଁକୁ ନେଇ ବିଜେଡି ଅନ୍ଦର ମହଲରେ ଜୋରଦାର ଚର୍ଚ୍ଚା । ତେବେ ଏ ସବୁ ଭିତରେ ଗୁଗୁଲି ଛାଡି ସୁପ୍ରିମୋଙ୍କ ଟେନସନ ବଢାଇଛନ୍ତି ଅଶୋକ ପଣ୍ଡା । ସାଙ୍ଗଠନିକ ଦକ୍ଷତା, ଅଭିଜ୍ଞତା, ଦଳ ପ୍ରତି ଆନୁଗତ୍ୟ ଓ ଅବଦାନ ଥିବା ନେତାଙ୍କୁ ରାଜ୍ୟସଭା ପ୍ରାର୍ଥୀ ପାଇଁ ବିଚାର କଲେ ଭଲ ହେବ ବୋଲି କହିଛନ୍ତି ଅଶୋକ ।

ସେପଟେ ଅଣଦେଖା ଅଭିଯୋଗ ଆଣି ରାଜ୍ୟସଭା ନିଆଁରେ ଅଧିକ ଘିଅ ଢ଼ାଳିଛନ୍ତି ଦଳର ସାଂସଦ ଦେବାଶିଷ ସାମନ୍ତରାୟ । କହିଛନ୍ତି କିଛି ନେତାଙ୍କୁ ବର୍ତ୍ତମାନ ଅଣଦେଖା କରାଯାଉଛି । ସେମାନଙ୍କୁ ସାଙ୍ଗରେ ନେଇ କାମ କଲେ ଦଳ ଆଗକୁ ବଢିବ ଏବଂ ପଞ୍ଚାୟତ ନିର୍ବାଚନରେ ଭଲ କରିବ । ସମସ୍ତଙ୍କୁ ଏକାଠି ନେଇ କାମ ନ କଲେ ଦଳ ପାଇଁ କ୍ଷତି ହେବ । ଆହୁରି କଳିକେଶଙ୍କୁ ବିଜେଡି ନେତୃତ୍ୱ ଦେବା ସମର୍ଥନରେ ବି ବାହାରିଛନ୍ତି ଦେବାଶିଷ ।
ଏପ୍ରିଲରେ ଓଡ଼ିଶାରୁ ୪ ଆସନ ଖାଲି ହେବାକୁ ଯାଉଥିବାରୁ ଫେବ୍ରୁଆରୀ ଶେଷ ଆଡ଼କୁ ବିଜ୍ଞପ୍ତି ପ୍ରକାଶ ପାଇବା ସହ ମାର୍ଚ୍ଚରେ ନିର୍ବାଚନ ହେବାର ରହିଛି । ତେବେ ଦେଖିବାର କଥା ଏବେଠୁ ବିଜେଡି ଭିତରେ ଆରମ୍ଭ ହୋଇଥିବା କଳି ଆଗକୁ କେଉଁ ରୂପ ଧାରଣ କରୁଛି । ନା ଅସନ୍ତୁଷ୍ଟ ନେତାଙ୍କୁ ମ୍ୟାନେଜ କରିବାରେ ସଫଳ ହେଉଛନ୍ତି ବିଜେଡି ସୁପ୍ରିମୋ ।

ଏଥିସହ ପଢ଼ନ୍ତୁ: 'ଯିଏ ଦଳରେ ରହି ଲୋକଙ୍କୁ ହଇରାଣ କରେ ମୁଁ ତାକୁ ବାହାର କରିଦିଏ'