ବିଜେଡି ସୁପ୍ରିମୋ ନବୀନ ପଟ୍ଟନାୟକ କାହା ମୁଣ୍ଡରେ ମାରିବେ ରାଜ୍ୟସଭା ଟିକା । ଶଙ୍ଖ ଦଳରୁ କିଏ ସଂସଦର ଉଚ୍ଚ ସଦନକୁ ଯିବ ତାକୁ ନେଇ ଆରମ୍ଭ ହୋଇଯାଇଛି ଚର୍ଚ୍ଚା । ଆଉ ୟାକୁ ନେଇ ଦଳ ଭିତରେ ବଢ଼ିବାରେ ଲାଗିଛି ଟେନସନ । ଏତିକି ବେଳେ ନବୀନଙ୍କୁ ତାଙ୍କର ପୁରୁଣା ପ୍ରତିଶ୍ରୁତି ମନେ ପକାଇ ଦେଇଛନ୍ତି ବରିଷ୍ଠ ନେତା ଭୂପିନ୍ଦର ସିଂ । ୟା ଭିତରେ ବିଜେଡିର ବଡ଼ ବଡ଼ ନେତା ନୂଆବର୍ଷ ପାଇଁ ଛପାଇଥିବା ଶୁଭେଚ୍ଛା ବ୍ୟାନରରୁ ନବୀନ ଓ ଶଙ୍ଖ ଚିହ୍ନ ଗାଏବ ହୋଇଯିବା ଦଳ ଭିତରର ଅସନ୍ତୋଷ ପଦାରେ ପକାଇଛି ।

ବିଜେଡିରେ ରାଜ୍ୟସଭା ଟେନସନ୍‌ । ରାଜ୍ୟସଭା କାର୍ଡ ଖେଳିଲେ ବରିଷ୍ଠ ବିଜେଡି ନେତା ଭୂପିନ୍ଦର ସିଂ । ନବୀନଙ୍କୁ ମନେ ପକାଇଦେଲେ ରାଜ୍ୟସଭା ପ୍ରତିଶ୍ରୁତି । ନିଜ ଆଡୁ ନବୀନ କହିଥିଲେ, ଭୂପିନ୍ଦର ଯିବେ ରାଜ୍ୟସଭା । ନୂଆବର୍ଷରୁ ନୂଆ ଅବତାରରେ ବିଜେଡି ନେତା । ବ୍ୟାନରରେ ରହୁନି ଦଳୀୟ ଚିହ୍ନ କି ନବୀନଙ୍କ ଫୋଟ ।

ନୂଆ ବର୍ଷ ବିଜେଡି ପାଇଁ ଆଣିଛି ନୂଆ ଟେନସନ । ଆଗକୁ ରାଜ୍ୟସଭା ନିର୍ବାଚନ ଥିବାବେଳେ ଏବେ ଠୁ ନବୀନଙ୍କୁ ପ୍ରତିଶ୍ରୁତି ମନେ ପକେଇ ଦେଲେଣି ନେତା । ବିଜେଡିରୁ କିଏ ଯିବ ରାଜ୍ୟସଭା । କାହାକୁ ବାଛିବେ ବିଜେଡି ସୁପ୍ରିମୋ । ୟାକୁ ନେଇ ବିଜେଡିର ପାୱାର କରିଡରରେ ଜୋରଦାର ଲବି ଆରମ୍ଭ ହୋଇଯାଇଛି । ଆଉ ଠିକ ଏହି ସମୟରେ ଦଳର ବରିଷ୍ଠ ନେତା ଭୂପିନ୍ଦର ସିଂ ଖେଳିଛନ୍ତି ରାଜ୍ୟସଭା କାର୍ଡ । ସେ କହିଛନ୍ତି ମୁଁ ବିଧାନସଭା ପାଇଁ ନୁହେଁ ଲୋକସଭା ପାଇଁ ଇଛୁକ ଥିଲି । କିନ୍ତୁ ମୋତେ ରାଜ୍ୟସଭା ପାଇଁ ନିଜ ଆଡୁ କହିଥିଲେ ନବୀନ ।

ଅନ୍ୟପଟେ ନୂଆ ବର୍ଷରୁ ନୂଆ ଅବତାରରେ ନଜର ଆସୁଛନ୍ତି ବିଜେଡି ନେତା । ପ୍ରଥମେ ଦେବାଶିଷ ସାମନ୍ତରାୟ, ରଣେନ୍ଦ୍ର ପ୍ରତାପ ସ୍ୱାଇଁ ପରେ ସନା ମହାକୁଡ ଆଉ ଏବେ ରବୀନ୍ଦ୍ର ଜେନା, ମୁକ୍ତିକାନ୍ତ ମଣ୍ଡଳ ଓ ସଂଯୁକ୍ତା ମଣ୍ଡଳ । ଏମାନଙ୍କ ବ୍ୟାନରରେ ନା ଅଛି ନବୀନଙ୍କ ଫୋଟ ନା ଅଛି ଦଳୀୟ ଚିହ୍ନ । ଯାହାକୁ ନେଇ ଏହି ନେତାମାନେ ବିଜେଡିରେ ଏକ ପ୍ରକାର ଅସନ୍ତୁଷ୍ଟ ଥିବା ଚର୍ଚ୍ଚା ହେଉଛି ।

ପୂର୍ବରୁ ପ୍ରସନ୍ନ ପାଟ୍ଟସାଣି କହିଥିଲେ ତାଙ୍କୁ ନବୀନ ରାଜ୍ୟସଭା ପଠାଇବେ କହି ଭଣ୍ଡାଇ ଦେଇଥିବାରୁ ସେ ଦଳ ଛାଡିଥିଲେ । ଆଉ ଏବେ ଭୂପିନ୍ଦରଙ୍କୁ ଦେଇଥିବା ପ୍ରତିଶ୍ରୁତି ନବୀନ ପାଳନ କରିବେ କି ନାହିଁ ତାହା ଉପରେ ନଜର ।