ବିଗିଡି ଗଲାଣି ବିଜେଡିର ରାଜ୍ୟସଭା ଗଣିତ । ଚିନ୍ତାରେ ବିଜେଡି ସୁପ୍ରିମୋ । ଗତକାଲି ରବୀନ୍ଦ୍ରଙ୍କ ଇସ୍ତଫା ପରେ ଆଜି ବିଧାନସଭା ଆସିଲେନି ସୁବାସିନୀ । ହେଇଯିବ କି କ୍ରସ ଭୋଟିଂ । ରାଜ୍ୟସଭା ଭୋଟକୁ ନେଇ ଏମିତି ଡର ଏବେ ବିଜେଡି ଶିବିରରେ ଛାଇ ଗଲାଣି । ଭୟ ଏମିତି ଘାରିଛି ଯେ ଦିନେ କାଳେ ବିଧାନସଭାରେ ଦେଖାଯାଉଥିବା ବିରୋଧୀ ଦଳ ନେତା ଏବେ ପ୍ରତିଦିନ ବିଧାନସଭା ଆସୁଛନ୍ତି ।

ଆଉ ନବୀନ ବିଧାନସଭା ଆସିବା କ୍ଷଣି ବିଜେଡି ବିଧାୟକଙ୍କୁ ଦେଖି ଆଲୋଚନା କରୁଛନ୍ତି । ସେପଟେ ସୁବାସିନୀଙ୍କ ଅନୁପସ୍ଥିତି ବିଜେଡି କ୍ୟାମ୍ପରେ ଛନକା ପୁରାଇଥିବା ବେଳେ ବିଜେଡି ବିଧାୟକଙ୍କୁ ଗୁପ୍ତ ସ୍ଥାନରେ ରଖିବା ପାଇଁ ଯୋଜନା ଚାଲିଛି । ସଂତୃପ୍ତ ଓ ଦତ୍ତ୍ୱେଶ୍ୱରଙ୍କୁ ଭୋଟ ଦେବା ପାଇଁ ନିର୍ମାଲ୍ୟ ଛୁଆଁଇ ପ୍ରତିଜ୍ଞା କରାଯାଇଛି ବୋଲି ମଧ୍ୟ ଚର୍ଚ୍ଚା ହେଉଛି । ଦଳର ବିଧାୟକ କହିଲେଣି ଭୋଟ ପୂର୍ବ ଦିନ ସମସ୍ତେ ଗୋଟିଏ ସ୍ଥାନରେ ରହିବାକୁ ନବୀନଙ୍କୁ ଦିଆଯାଇଛି ପ୍ରସ୍ତାବ ।

କ୍ରସ୍‌ ଭୋଟିଂ ଚର୍ଚ୍ଚା ଭିତରେ ବିଧାନସଭାରେ ବିଜେଡି ବିଧାୟକଙ୍କୁ ଭେଟିଛନ୍ତି ସଂତୃପ୍ତ ମିଶ୍ର । ଡାକ୍ତର ଦତ୍ତେଶ୍ବର ହୋତା ବି ବିଜେଡି ଓ କଂଗ୍ରେସ ବିଧାୟକଙ୍କୁ ଭେଟି ସମର୍ଥନ ଲୋଡିଛନ୍ତି ।

ଏପଟେ କ୍ରସ୍‌ ଭୋଟିଂକୁ ନେଇ ବାକଯୁଦ୍ଧ ବି ତୀବ୍ର ହୋଇଛି । ବିଜେପି ବିଧାୟକ ପଦ୍ମ ଲୋଚନ ପଣ୍ଡା କହିଛନ୍ତି ଖେଳ ଆରମ୍ଭ ହୋଇଛି । ତିନି ଆସନ ଯିବ ବିଜେପି ଖାତାକୁ । ସେହିପରି କଂଗ୍ରେସ ବିଧାୟକ ତାରାବାହିନୀ ପତି କହିଛନ୍ତି ବିଜେଡି କଥା ଜାଣିନି କଂଗ୍ରେସ ବିଧାୟକ ଏକ ଅଛନ୍ତି ।

ଏସବୁ ଭିତରେ ମାର୍ଚ୍ଚ ୧୬କୁ ଅପେକ୍ଷା । କାହାର ହେବ ହାର କାହାର ହେବ ଜିତ, କେଉଁ ବିଧାୟକ କାହାକୁ ଦେବେ ଭୋଟ । କିଏ କରିବ କ୍ରସ୍‌ ଭୋଟିଂ ତାହା ଉପରେ ରହିଛି ସମସ୍ତଙ୍କ ନଜର ।