ସାମ୍ବାଦିକ ସମ୍ମିଳନୀ କରି ଏକ ନିର୍ଦ୍ଦିଷ୍ଟ ଚ୍ୟାନେଲର ସମ୍ପାଦକଙ୍କ ମିଥ୍ୟା ପ୍ରଚାରର ଗୁମର ଖୋଲିଛି ବିଜେପି । ରାଜ୍ୟ ସାଧାରଣ ସମ୍ପାଦକ ବିରଞ୍ଚି ନାରାୟଣ ତ୍ରିପାଠୀ ପ୍ରେସମିଟ କରି ଉକ୍ତ ଚ୍ୟାନେଲର ସମ୍ପାଦକଙ୍କ ଗୁମର ଖୋଲିଛନ୍ତି । ସେ କହିଛନ୍ତି, ସ୍କୁଲ ପାଠ୍ୟ ପୁସ୍ତକରେ ତ୍ରୁଟି ପ୍ରସଙ୍ଗରେ କ୍ରାଇମବ୍ରାଞ୍ଚ ତଦନ୍ତ ଚାଲିଛି ଏବଂ ସରକାର ତ୍ରୁଟି ପାଇଁ ଦୋଷୀଙ୍କ ବିରୋଧରେ କଠୋର ଆଭିମୁଖ୍ୟ ଗ୍ରହଣ କରୁଛନ୍ତି ।

କିନ୍ତୁ ଏତିକି ବେଳେ ଏକ ନିର୍ଦ୍ଦିଷ୍ଟ ଚ୍ୟାନେଲର ସମ୍ପାଦକ ସୁଧାଂଶୁ ରାଉତ ଏକ କାର୍ଯ୍ୟକ୍ରମରେ ଯୋଗ ଦେଇ ଗଣଶିକ୍ଷା ମନ୍ତ୍ରୀ ନିତ୍ୟାନନ୍ଦ ଗଣ୍ଡଙ୍କୁ ବଦନାମ କରିବାକୁ ମିଥ୍ୟା ଆରୋପ ଆଣିଛନ୍ତି । ତାଙ୍କ ଚ୍ୟାନେଲର ଉମରକୋଟର ସାମ୍ବାଦିକଙ୍କ ସହ ମନ୍ତ୍ରୀ ଫୋନରେ କଥା ହେବା ସହ, ଏସବୁ ଘଟଣାକୁ ଚାପି ଦେବାପାଇଁ ୫ ଲକ୍ଷ ଟଙ୍କା ଅଫର କରିଥିଲେ ବୋଲି ମିଥ୍ୟା ଅଭିଯୋଗ ଆଣିଛନ୍ତି । ସ୍ବାଭାବିକ ଭାବେ ଲୋକେ ଏକଥା ଶୁଣିବା ପରେ ଆହତ ହୋଇଛନ୍ତି ।

ଅଧିକ ପଢ଼ନ୍ତୁ: ପୂର୍ବତନ ପ୍ରେମିକଙ୍କ ବ୍ଳାକମେଲ୍‌ ପାଇଁ ନର୍ସ ହାରିଦେଲେ ଜୀବନ, ଥାନାରେ ୨ ଅଟକ

କିନ୍ତୁ ବଡ଼କଥା ହେଉଛି ଉମରକୋଟର ସେହି ସାମ୍ବାଦିକ ସୋସିଆଲ ମିଡିଆ ପ୍ଲାଟଫର୍ମ ଫେସବୁକ ଲାଇଭ୍‌ରେ ଆସି ସମସ୍ତ ଅଭିଯୋଗକୁ ଖଣ୍ଡନ କରିଛନ୍ତି । ଏହାକୁ ସମ୍ପୂର୍ଣ୍ଣ ମିଥ୍ୟା ବୋଲି କହିଛନ୍ତି ସଂପୃକ୍ତ ସାମ୍ବାଦିକ ଜଣକ । ତେଣୁ ରାଜ୍ୟ ବିଜେପି ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ସେହି ନିର୍ଦ୍ଦିଷ୍ଟ ଚ୍ୟାନେଲର ସମ୍ପାଦକ ଓ ତାଙ୍କ ଉମରକୋଟ ସାମ୍ବାଦିକଙ୍କ ମଧ୍ୟରେ ହୋଇଥିବା କଥାବାର୍ତ୍ତାର ରେକର୍ଡିଂକୁ ଶୁଣାଇଛନ୍ତି ବିରଞ୍ଚି ନାରାୟଣ ତ୍ରିପାଠୀ ।

ଚ୍ୟାନେଲର ସମ୍ପାଦକ ଜଣକ ସାମ୍ବାଦିକତା ଭଳି ପବିତ୍ର ବୃତ୍ତିକୁ କଳୁସିତ କରିଥିବା ଓ ସୁପାରି ସାମ୍ବାଦିକ କହି ଅତି କଡ଼ା ଭାଷାରେ ସେ ଏଭଳି କାର୍ଯ୍ୟକୁ ନିନ୍ଦା କରିଛନ୍ତି । ଉମରକୋଟରୁ ଆସିଥିବା ଜଣେ ଆଦିବାସୀ ମନ୍ତ୍ରୀଙ୍କୁ ଷଡ଼ଯନ୍ତ୍ର କରି ବଦନାମ କରିବାକୁ ସଂପୃକ୍ତ ସମ୍ପାଦକ ଜଣକ କରିଥିବା ହୀନ ଚେଷ୍ଟା ବିରୋଧରେ ଗଣଶିକ୍ଷା ମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ଥାନାରେ ଲିଖିତ ଅଭିଯୋଗ କରାଯାଇଥିବା ସେ ସୂଚନା ଦେଇଛନ୍ତି ।