UP Congress Office Clash / କଂଗ୍ରେସ ଅଫିସରେ ମହାଭାରତ, ନେତାଙ୍କ ସାମ୍ନାରେ ହେଲା ଜୋତା ମାଡ଼ !

ଉତ୍ତର ପ୍ରଦେଶ କଂଗ୍ରେସ ମୁଖ୍ୟାଳୟରେ ନୂଆ ପ୍ରଦେଶ ଅଧ୍ୟକ୍ଷଙ୍କ ପଦଗ୍ରହଣ ଉତ୍ସବ ପାଲଟିଗଲା ରଣକ୍ଷେତ୍ର । ମଞ୍ଚରେ ଚାଲିଥିଲା ରାଜନୈତିକ କାର୍ଯ୍ୟକ୍ରମ, ହେଲେ ଅନ୍ୟପଟେ ନେତାଙ୍କ ସମର୍ଥକଙ୍କ ମଧ୍ୟରେ ଆରମ୍ଭ ହୋଇଗଲା ଜୋରଦାର ହଙ୍ଗାମା । ପୂର୍ବତନ ପ୍ରଦେଶ ଅଧ୍ୟକ୍ଷ ଅଜୟ ରାୟ ଏବଂ ମହିଳା କାଉନସିଲର ମମତା ଚୌଧୁରୀଙ୍କ ମଧ୍ୟରେ ବଚସା ପରେ ପରିସ୍ଥିତି ଏପରି ବିଗିଡ଼ିଗଲା ଯେ, ସମର୍ଥକମାନେ ପରସ୍ପରକୁ ଚାପୁଡ଼ା ମାରିବା ସହ ଜୋତାରେ ମଧ୍ୟ ଆକ୍ରମଣ କରିଥିବା ଅଭିଯୋଗ ହୋଇଛି । ଏହି ଘଟଣାର ଭିଡିଓ ଏବେ ଭାଇରାଲ ହେଉଛି ।

ଉତ୍ତର ପ୍ରଦେଶ କଂଗ୍ରେସ ମୁଖ୍ୟାଳୟରେ ରବିବାର ଦିନ ଏକ ରାଜନୈତିକ କାର୍ଯ୍ୟକ୍ରମ ସମୟରେ ଜୋରଦାର ହଙ୍ଗାମା ଦେଖିବାକୁ ମିଳିଛି । ନବନିଯୁକ୍ତ ପ୍ରଦେଶ କଂଗ୍ରେସ ଅଧ୍ୟକ୍ଷ ଆରାଧନା ମିଶ୍ରା ମୋନାଙ୍କ ପଦଗ୍ରହଣ ସମାରୋହ ଚାଲିଥିବା ବେଳେ ପୂର୍ବତନ ପ୍ରଦେଶ ଅଧ୍ୟକ୍ଷ ଅଜୟ ରାୟ ଏବଂ କଂଗ୍ରେସର ମହିଳା କାଉନସିଲର ମମତା ଚୌଧୁରୀଙ୍କ ମଧ୍ୟରେ ବଚସା ହୋଇଥିଲା । ପରେ ଏହି ବିବାଦ ଏତେ ବଢ଼ିଯାଇଥିଲା ଯେ, ଉଭୟ ପକ୍ଷର ସମର୍ଥକଙ୍କ ମଧ୍ୟରେ ମାରପିଟ୍ ଆରମ୍ଭ ହୋଇଯାଇଥିଲା । ଏପରିକି ଚାପୁଡ଼ା ମାଡ଼ ସହ ଜୋତାରେ ଆକ୍ରମଣ ହୋଇଥିବା ଅଭିଯୋଗ ହୋଇଛି । ଘଟଣାର ଭିଡିଓ ଏବେ ଦ୍ରୁତଗତିରେ ଭାଇରାଲ୍ ହେଉଛି ।

ପଦଗ୍ରହଣ ସମାରୋହରେ ଆରମ୍ଭ ହେଲା ବିବାଦ

ରବିବାର ଦିନ ଆରାଧନା ମିଶ୍ରା ମୋନା ଉତ୍ତର ପ୍ରଦେଶ କଂଗ୍ରେସର ନୂଆ ପ୍ରଦେଶ ଅଧ୍ୟକ୍ଷ ଭାବେ ଦାୟିତ୍ୱ ଗ୍ରହଣ କରିବାକୁ ଥିଲେ । ଏହି ଅବସରରେ ପୂର୍ବତନ ପ୍ରଦେଶ ଅଧ୍ୟକ୍ଷ ଅଜୟ ରାୟ ଦାୟିତ୍ୱ ହସ୍ତାନ୍ତର କରିବା ପାଇଁ ଦଳୀୟ କାର୍ଯ୍ୟାଳୟରେ ପହଞ୍ଚିଥିଲେ । ତାଙ୍କ ସହ ତାଙ୍କର କିଛି ସମର୍ଥକ ମଧ୍ୟ ଉପସ୍ଥିତ ଥିଲେ ।

ଏହି ସମୟରେ ଲକ୍ଷ୍ନୌ ନଗର ନିଗମରେ କଂଗ୍ରେସ ପାର୍ଷଦ ଦଳର ନେତା ମମତା ଚୌଧୁରୀଙ୍କ ସହ ଅଜୟ ରାୟଙ୍କ ସମର୍ଥକମାନଙ୍କର କୌଣସି କଥାକୁ ନେଇ ଯୁକ୍ତିତର୍କ ହୋଇଥିଲା । ଧୀରେ ଧୀରେ ଏହି ବଚସା ତୀବ୍ର ରୂପ ନେଇଥିଲା ଏବଂ ପରିସ୍ଥିତି ହାତାହାତି ପର୍ଯ୍ୟନ୍ତ ପହଞ୍ଚିଥିଲା । ଏହି ସମୟରେ ଉଭୟ ପକ୍ଷର ସମର୍ଥକଙ୍କ ମଧ୍ୟରେ ଚାପୁଡ଼ା ମାଡ଼ ହୋଇଥିବା ସହ ଜୋତା ମଧ୍ୟ ବାହାରିଥିବା ଅଭିଯୋଗ ହୋଇଛି ।

ରାଗିଯାଇ କାର୍ଯ୍ୟାଳୟ ଛାଡ଼ିଲେ ଅଜୟ ରାୟ

ଏହି ଘଟଣା ପରେ ଅଜୟ ରାୟ ଅସନ୍ତୋଷ ପ୍ରକାଶ କରି କଂଗ୍ରେସ କାର୍ଯ୍ୟାଳୟରୁ ବାହାରି ଯାଇଥିଲେ । ପରିସ୍ଥିତିକୁ ଶାନ୍ତ କରିବା ଏବଂ ତାଙ୍କୁ ବୁଝାଇବା ପାଇଁ କଂଗ୍ରେସର ବରିଷ୍ଠ ନେତା ପ୍ରମୋଦ ତିୱାରୀ ତାଙ୍କ ସହ ବାହାରକୁ ଆସିଥିଲେ । ଏହି ସମୟରେ କଂଗ୍ରେସର କାର୍ଯ୍ୟକାରୀ ଅଧ୍ୟକ୍ଷ ଇମ୍ରାନ ମସୁଦ ମଧ୍ୟ ଉପସ୍ଥିତ ଥିଲେ ।
ନବନିଯୁକ୍ତ ପ୍ରଦେଶ ଅଧ୍ୟକ୍ଷ ଆରାଧନା ମିଶ୍ରା ମୋନା ଏବଂ ଅନ୍ୟ ବରିଷ୍ଠ ନେତାମାନେ ମଧ୍ୟ ଅଜୟ ରାୟଙ୍କୁ ବୁଝାଇବା ସହ ବିବାଦର ସମାଧାନ କରିବାକୁ ଉଦ୍ୟମ କରିଥିଲେ ।

ଏହି ବିବାଦ ପରେ ଅଜୟ ରାୟ ସମ୍ପୃକ୍ତ ମହିଳାଙ୍କ ବିରୋଧରେ ଦଳୀୟ କାର୍ଯ୍ୟାନୁଷ୍ଠାନ ନିଆଯିବା ଦାବିରେ ଅଡ଼ି ରହିଥିଲେ । ମମତା ଚୌଧୁରୀଙ୍କ ସହ ହୋଇଥିବା ବଚସାକୁ ନେଇ ସେ ଅସନ୍ତୁଷ୍ଟ ଥିବା କୁହାଯାଉଛି । ଏହାପରେ ରାଜ୍ୟସଭା ସାଂସଦ ପ୍ରମୋଦ ତିୱାରୀ ତାଙ୍କୁ ଆଶ୍ୱାସନା ଦେଇଥିଲେ। ଶେଷରେ ଅଜୟ ରାୟ ପୁଣିଥରେ ପ୍ରଦେଶ କଂଗ୍ରେସ କାର୍ଯ୍ୟାଳୟକୁ ଫେରିଥିଲେ ।

ନୂଆ ପ୍ରଦେଶ ଅଧ୍ୟକ୍ଷଙ୍କ ପଦଗ୍ରହଣ ସମାରୋହରେ ଏଭଳି ହଙ୍ଗାମା କଂଗ୍ରେସ ଦଳ ମଧ୍ୟରେ ଥିବା ମତଭେଦକୁ ନେଇ ଚର୍ଚ୍ଚା ସୃଷ୍ଟି କରିଛି। ତେବେ ଏହି ଘଟଣାରେ ଆଗକୁ ଦଳ ପକ୍ଷରୁ କି ପଦକ୍ଷେପ ନିଆଯାଉଛି, ତାହା ଉପରେ ସମସ୍ତଙ୍କ ନଜର ରହିଛି ।