ରାଜ୍ୟସଭା ରେସରେ ଚତୁର୍ଥ ଆସନ ପାଇଁ ବିଗ୍ ଫାଇଟ୍ । ଦତ୍ତେଶ୍ୱର ହୋତା ବନାମ ଦିଲ୍ଲୀପ ରାୟ । ଦତ୍ତେଶ୍ୱରକୁ ନେଇ କଂଗ୍ରେସରେ କେଁ । ନିର୍ବାଚନ ବେଳେ କ୍ରସ ଭୋଟିଂ ସମ୍ଭାବନା । ଏପଟେ ଦତ୍ତେଶ୍ୱରଙ୍କ ଟ୍ରାକ ରେକର୍ଡ ବଢ଼ାଇଲା ବିବାଦ ।

କମନ କ୍ୟାଣ୍ଡିଡେଟ କରି ଡାକ୍ତର ଦତ୍ତେଶ୍ୱର ହୋତାଙ୍କ ନା ଘୋଷଣା କରିଥିଲେ ବିଜେଡି ସୁପ୍ରିମୋ ନବୀନ ପଟ୍ଟନାୟକ । ଆଉ ଏହାକୁ ସମର୍ଥନ ଜଣାଇଥିଲା କଂଗ୍ରେସ । ଭୋଟ୍‌ ଗଣିତ ଦେଖିଲେ ରାଜ୍ୟସଭାର ଚତୁର୍ଥ ଆସନ ଯେ ଦତ୍ତେଶ୍ୱର ବାଜି ମାରି ନେବେ ତାହା ଜଳ ଜଳ ଦିଶୁଥିଲା । ହେଲେ ବିଜେପି ଶିବିରରୁ ଗ୍ରୀନ୍‌ ସିଗନାଲ ପାଇବା ପରେ ପୂର୍ବତନ କେନ୍ଦ୍ରମନ୍ତ୍ରୀ ତଥା ବରିଷ୍ଠ ନେତା ଦିଲ୍ଲୀପ ରାୟ ସ୍ୱାଧୀନ ପ୍ରାର୍ଥୀ ହେବା ସବୁ ଅଙ୍କ ବିଗାଡି ଦେଲେ । ଏବେ ଦିଲ୍ଲୀପ ଓ ଦତ୍ତେଶ୍ୱର ଭିତରେ ହାଇଭୋଲଟେଜ୍‌ ଲଢେଇ ହେବା ସ୍ପଷ୍ଟ ଜଣାପଡୁଛି । ସେପଟେ ଦିଲ୍ଲୀପଙ୍କୁ ଜିତିବା ପାଇଁ ଆବଶ୍ୟକ ପଡୁଥିବା ଅଧିକ ୮ ଆସନ କେଉଁ ଶିବିରରୁ ଆସିବା ତାକୁ ନେଇ ସସପେନ୍ସ ବଢୁଥିବା ବେଳେ କ୍ରସ୍‌ ଭୋଟିଂ ସମ୍ଭାବନା ବାରି ହୋଇପଡୁଛି ।

ଦତ୍ତେଶ୍ୱରକୁ ନେଇ କଂଗ୍ରେସ ଭିତରେ ସବୁକିଛି ଠିକ୍‌ ଚାଲି ନ ଥିବା ଚର୍ଚ୍ଚା ହେଉଛି । ଗତକାଲି ବସିଥିବା ବିଧାୟକ ଦଳ ବୈଠକରେ ଦୁଇ ବିଧାୟକ ରମେଶ ଜେନା ଓ ସୋଫିଆ ଫିର୍ଦୋଷ ଅନୁପସ୍ଥିତ ଥିବା ବେଳେ ନବୀନ ଘୋଷଣା କରିଥିବା ପ୍ରାର୍ଥୀକୁ କଂଗ୍ରେସର ସମର୍ଥନ ନେଇ ପ୍ରଶ୍ନ ଉଠାଇଥିଲେ କିଛି ବିଧାୟକ । ଆଜି କିନ୍ତୁ ଭକ୍ତ ଦାସ ଓ ରମେଶ ଜେନାଙ୍କ ଭିତରେ ରୁଦ୍ଧଦ୍ୱାର ବୈଠକ ବସିବା ପରେ ବୟାନ ବଦଳାଇଛନ୍ତି ରମେଶ ।

ସେପଟେ ପୂର୍ବ ଟ୍ରାକ ରେକର୍ଡକୁ ନେଇ ବିବାଦରେ ଅଛନ୍ତି ଦତ୍ତେଶ୍ୱର ହୋତା । ଏସସିବି ମେଡିକାଲ କଲେଜରେ ୟୁରୋଲୋଜି ବିଭାଗର ମୁଖ୍ୟ ଥିବା ବେଳେ ସେ ନିଜ କ୍ଲିନିକରେ ପିଜି ଛାତ୍ରଙ୍କୁ ରୋଗୀ ଦେଖିବା କାର୍ଯ୍ୟରେ ନିୟୋଜିତ କରୁଥିଲେ । ଯେଉଁମାନେ ଏହି କର୍ଯ୍ୟ ନ କରିବେ ସେମାନଙ୍କୁ ପରୀକ୍ଷାରେ ଫେଲ୍ କରି ଦେବାକୁ ଦେଉଥିଲେ ଧମକ । ଏ ପରିକି ନିଜ ଘର କାର୍ଯ୍ୟରେ ପିଜି ଛାତ୍ରଙ୍କୁ ନିୟୋଜିତ କରୁଥିବାର ଅଭିଯୋଗ ଆଣିଥିଲେ ୧୦ ଜଣ ପିଜି ଛାତ୍ର । ଯାହାକୁ ନେଇ ମାମଲା କୋର୍ଟକୁ ଯିବା ପରେ ପରୀକ୍ଷା ଦାୟିତ୍ବରୁ ଡାକ୍ତର ହୋତାଙ୍କୁ ହଟାଇବାକୁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଥିଲେ ହାଇକୋର୍ଟ ।