MCD Election 2026 / ପୁଣି ଥରେ ଏମସିଡ଼ି ହାତେଇପାରେ ବିଜେପି; ଲଢେଇ ପୂର୍ବରୁ ମୈଦାନ ଛାଡି଼ଲେ ବିରୋଧି

BJP Candidate List for MCD Election: ବହୁ ପ୍ରତୀକ୍ଷିତ ଦିଲ୍ଲୀ ମହାନଗର ନିଗମ ନିର୍ବାଚନ ପାଇଁ ଶାସକ ବିଜେପି ଏହାର ଦଳୀୟ ପ୍ରାର୍ଥୀ ଘୋଷଣା କରିଛି। ଦଳ ମେୟର ପଦ ପାଇଁ ପ୍ରବେଶ ୱାହି ଏବଂ ଡେପୁଟି ମେୟର ପଦ ପାଇଁ ମୋନିକା ପନ୍ତଙ୍କୁ ମନୋନୀତ କରିଛି। ଅନ୍ୟପକ୍ଷରେ ମୁଖ୍ୟ ବିରୋଧି ଦଳ ଆମ ଆଦମୀ ପାର୍ଟି (ଆପ୍) ମେୟର ନିର୍ବାଚନ ପାଇଁ କୌଣସି ପ୍ରାର୍ଥୀ ଦେଇନାହିଁ। ଆପ ପୁଣି ଥରେ ଏମସିଡି ମେୟର ପଦ ପାଇଁ କୌଣସି ପ୍ରାର୍ଥୀ ଦେଇନାହିଁ। ଯାହା ପରେ ବିଜେପି ପୁଣି ଥରେ ଏମସିଡି ମେୟର ପଦ ହାତେଇବା ଏକ ପ୍ରକାର ସ୍ପଷ୍ଟ ହୋଇଯାଇଛି।

ଦିଲ୍ଲୀ ବିଜେପି ଅଧ୍ୟକ୍ଷ ବୀରେନ୍ଦ୍ର ସଚଦେବଙ୍କ ଦ୍ୱାରା ଜାରି ଏକ ବିଜ୍ଞପ୍ତି ଅନୁଯାୟୀ, ବିଜେପି ଆଗାମୀ ଏମସିଡି ମେୟର, ଡେପୁଟି ମେୟର ଏବଂ ଷ୍ଟାଣ୍ଡିଂ କମିଟି ସଦସ୍ୟ ପାଇଁ ଦଳୀାୟ ପ୍ରାର୍ଥୀ ଘୋଷଣା କରିଛି। ଦଳ ମେୟର ପଦ ପାଇଁ ୱାର୍ଡ ନମ୍ବର ୫୩-ରୋହିଣୀ-E କର୍ପୋରେଟର ପ୍ରବେଶ ୱାହି ଏବଂ ୱାର୍ଡ ନମ୍ବର ୨୦୬-ଆନନ୍ଦ ବିହାର କର୍ପୋରେଟର ମୋନିକା ପନ୍ତଙ୍କୁ ଡେପୁଟି ମେୟର ପଦ ପାଇଁ ଦଳୀୟ ପ୍ରାର୍ଥୀ କରିଛି। ସେହିପରପି ଦଳ ଏହାର ପାର୍ଟି ଷ୍ଟାଣ୍ଡିଂ କମିଟି ସଦସ୍ୟ ଏବଂ ଗୃହର ନେତା ପଦ ପାଇଁ ୱାର୍ଡ ନମ୍ବର ୨୭-ବେଗୁମପୁର କର୍ପୋରେଟର ଜୟ ଭଗବାନ ଯାଦବ ଏବଂ ୱାର୍ଡ ନମ୍ବର ୮୨-ପାହାଡ଼ଗଞ୍ଜରୁ କର୍ପୋରେଟର ମନୀଷ ଚଢାଙ୍କୁ ସ୍ଥାୟୀ କମିଟି ସଦସ୍ୟ ନିଯୁକ୍ତ କରିଛି।

ଦଳୀୟ ପ୍ରାର୍ଥୀଙ୍କ ନାମାଙ୍କନ ଦାଖଲ
ଦିଲ୍ଲୀ ନଗର ନିଗମରେ ମେୟର, ଡେପୁଟି ମେୟର ଏବଂ ଷ୍ଟାଣ୍ଡିଂ କମିଟି ନିର୍ବାଚନ ପାଇଁ ବିଜେପି ପ୍ରାର୍ଥୀ ସେମାନଙ୍କର ନାମାଙ୍କନ ଦାଖଲ କରିଛି। ବର୍ତ୍ତମାନର ମେୟର ସର୍ଦ୍ଦାର ରାଜା ଇକବାଲ ସିଂହ, ଶାହଦରା ଦକ୍ଷିଣ ଜୋନ୍ ଅଧ୍ୟକ୍ଷ ରାମ କିଶୋର ଶର୍ମା ଏବଂ ଦଳର ଅନେକ କର୍ପୋରେଟର ଉପସ୍ଥିତ ରହି ପ୍ରାର୍ଥୀଙ୍କୁ ସେମାନଙ୍କର ସମର୍ଥନ ଜଣାଇଥିଲା।

ନାମାଙ୍କନ ଦାଖଲ କରିବା ପରେ ମେୟର ପ୍ରାର୍ଥୀ ପ୍ରବେଶ ୱାହି ଦଳୀୟ ନେତୃବୃନ୍ଦଙ୍କ ପ୍ରତି କୃତଜ୍ଞତା ଜଣାଇ କହିଛନ୍ତି ଯେ ସେ ତାଙ୍କ ଉପରେ ନ୍ୟସ୍ତ ହୋଇଥିବା ଦାୟିତ୍ୱକୁ ପୂର୍ଣ୍ଣ ସମର୍ପିତ ଭାବରେ ପାଳନ କରିବେ। ତାଙ୍କର ପ୍ରାଥମିକତା ହେଉଛି ଦିଲ୍ଲୀ ନଗର ନିଗମର ଚାଲିଥିବା ବିକାଶ କାର୍ଯ୍ୟକୁ ଆଗକୁ ବଢାଇବା ଏବଂ ସହରରେ ପରିମଳ ବ୍ୟବସ୍ଥାକୁ ଆହୁରି ମଜବୁତ କରିବା ହେବ। ଅନ୍ୟପଟେ ବିଜେପି ଡେପୁଟି ମେୟର ପ୍ରାର୍ଥୀ ମୋନିକା ପନ୍ତ ମଧ୍ୟ ଦଳୀୟ ନେତୃତ୍ୱକୁ ଧନ୍ୟବାଦ ଜଣାଇ କହିଛନ୍ତି, ଯେ ସେ ଦିଲ୍ଲୀବାସୀଙ୍କ ସେବା ପାଇଁ ପୂର୍ଣ୍ଣ ପ୍ରତିବଦ୍ଧତାର ସହିତ କାମ କରିବେ।

ଏହି ନିର୍ବାଚନର ଆନୁଷ୍ଠାନିକ ପ୍ରକ୍ରିୟା ସମାପ୍ତ ହେବା ପରେ ଫଳାଫଳ ଘୋଷଣା କରାଯିବ। ଏମସିଡ଼ି ନିର୍ବାଚନ ପାଇଁ ବିଜେପି ଯେଉଁ ପ୍ରାର୍ଥୀଙ୍କୁ ଚୟନ କରିଛି, ସେମାନଙ୍କ ମଧ୍ୟରେ ପ୍ରବେଶ ୱାହି ବର୍ତ୍ତମାନ ଦିଲ୍ଲୀ ନଗର ନିଗମର ଗୃହର ନେତା ଥିବା ବେଳେ ଜୟ ଭଗବାନ ଯାଦବ ଡେପୁଟି ମେୟର ପଦରେ ଅବସ୍ଥାପିତ ଅଛନ୍ତି। ପୂର୍ବରୁ ଜୟ ଭଗବାନ ଯାଦବ ଗୃହର ଉପନେତା ଭାବରେ କାର୍ଯ୍ୟ କରିଥିଲେ। ମନୀଷ ଚଢା ସ୍ୱାସ୍ଥ୍ୟ କମିଟିର ଅଧ୍ୟକ୍ଷ ହୋଇଛନ୍ତି। ବିଜେପି ତାଙ୍କୁ ଯେଉଁଭଳି ଭାବରେ ଅସ୍ଥାୟୀ କମିଟିର ସଦସ୍ୟ ଭାବରେ ପଠାଇଛି, ସେଥିରୁ ଅନୁମାନ କରାଯାଉଛି ଯେ ବିଜେପି ସ୍ଥାୟୀ କମିଟି ଅଧ୍ୟକ୍ଷ ଦାୟିତ୍ୱ ଚଢାଙ୍କୁ ଦେଇପାରେ।