ସପ୍ତଦଶ ବିଧାନସଭାର ଚତୁର୍ଥ ଅଧିବେଶନର ଦ୍ୱିତୀୟ ଦିନରେ ବି ଗୃହ ଠିକ୍ ଭାବରେ ଚାଲିପାରିଲାନି । ଆସନ୍ତାକାଲି ସକାଳ 10 ଟା ଯାଏଁ ଗୃହ ମୁଲତବୀ କରିଛନ୍ତି ବାଚସ୍ପତି । ଦ୍ଵିତୀୟ ଦିନ ଗୃହ କାର୍ଯ୍ୟ ଆରମ୍ଭରୁ ବିରୋଧୀ ହୋ ହାଲ୍ଲା କରିଥିଲେ । ପ୍ରଶ୍ନକାଳ ଆରମ୍ଭରୁ ସାର ଅଭାବ ପ୍ରସଙ୍ଗ ଉଠାଇ ନାରାବାଜି କରିଥିଲା ବିଜେଡି । ବାଚସ୍ପତିଙ୍କ ପୋଡିୟମ ତଳକୁ ଆସି ବିଜେଡି ବିଧାୟକ ପ୍ରତିବାଦ କରିଥିଲେ । ଚାଷୀ ମାରଣ ନୀତି ଚଳିବ ନାହିଁ ନାରା ପକାଇଥିଲେ ବିଜେଡି ବିଧାୟକ । ହାତ ରେ ପ୍ଲାକାର୍ଡ, ବ୍ୟାନର ଧରି ଗୃହ ମଧ୍ୟ ଭାଗରେ ନାରାବାଜି । ମାତ୍ର 4 ମିନିଟ୍ ପ୍ରଶ୍ନକାଳ ଚାଲିବା ପରେ ଅପରାହ୍ନ 4 ଟା ଗୃହ ମୁଲତବି ଘୋଷଣା କରିଥିଲେ ବାଚସ୍ପତି ।

ଆଜି ପ୍ରଶ୍ନକାଳରେ ଉଚ୍ଚ ଶିକ୍ଷା, ଗଣଶିକ୍ଷା, ବୈଷୟିକ ଶିକ୍ଷା, କ୍ରୀଡା, ଶିଳ୍ପ, ସଂସ୍କୃତି ବିଭାଗ ସହ ଅନୁସୂଚିତ ଜାତି ଓ ଜନଜାତି ବିଭାଗ ଆଲୋଚନା ହୋଇଥାନ୍ତା । ହଟ୍ଟଗୋଳ ପରେ ଧୋଇ ହୋଇଗଲା । ସାର ଅଭାବ ଓ କଳାବଜାରୀ ପ୍ରସଙ୍ଗକୁ ନେଇ ଗୃହର ମଧ୍ୟ ଭାଗରେ ବିଜେଡିର ପ୍ରତିବାଦ ସବୁ ଭଣ୍ଡୁର୍ କରିଦେଲା । ମୌସୁମୀ ଅଧିବେଶନ ଦ୍ୱିତୀୟ ଦିନ ପ୍ରଥମରୁ ଗୃହରେ ପ୍ରବଳ ହଟ୍ଟଗୋଳ କରିଥିଲେ ବିରୋଧୀ । ନିଜ ଆସନରେ ଛିଡ଼ା ହୋଇ ପ୍ରତିବାଦ କଲା କଂଗ୍ରେସ ।

ଏହାପରେ ଅପରାହ୍ନ 4 ଟା ପରେ ଗୃହ କାର୍ଯ୍ୟ ଆରମ୍ଭ ହେବା ପରେ କଂଗ୍ରେସ ବିରୋଧରେ ସ୍ବାଧିକାର ଭଙ୍ଗ ନୋଟିସ୍ ଆଣିଲା ବିଜେପି । ବିଧାନସଭାରେ ଅନାସ୍ଥା ପ୍ରସ୍ତାବ ଉପସ୍ଥାପନ ପୂର୍ବରୁ ଗଣମାଧ୍ୟମରେ ବିବୃତି ଦେଇଥିବାରୁ କଂଗ୍ରେସ ଦଳ ବିରୋଧରେ ସ୍ବାଧୀକାର ଭଙ୍ଗ ନୋଟିସ୍ ଆଣିଛି ବିଜେପି । ବିଜେପି ବିଧାୟକ ପଦ୍ମଲୋଚନ ପଣ୍ଡା କଂଗ୍ରେସ ବିରୋଧରେ ସ୍ବାଧୀକାର ଭଙ୍ଗ ନୋଟିସ୍ ଆଣିଛନ୍ତି । ସେପଟେ ଅନାସ୍ଥା ନେଇ ନୋଟିସ ପାଇଥିବା ଜଣାଇଲେ ବାଚସ୍ପତି । ତେବେ ଗୃହ ଅର୍ଡରରେ ନଥିବାରୁ ବିଚାର ପାଇଁ ଗ୍ରହଣ କରାଯାଇ ପାରିବ ନାହିଁ ବୋଲି ବାଚସ୍ପତି କହିଛନ୍ତି ।