ଆସାମ ବିଧାନସଭା ନିର୍ବାଚନ ଫଳାଫଳ ଲାଗି ଜାରି ରହିଛି ଭୋଟ ଗଣତି । ରାଜ୍ୟର ୧୨୬ଟି ବିଧାନସଭା ଆସନ ଲାଗି ଏପ୍ରିଲ ୯ ତାରିଖରେ ମତଦାନ ହୋଇଥିଲା । ଜାଲୁକବାରି ବିଧାନସଭା ନିର୍ବାଚନ ମଣ୍ଡଳୀ ରାଜ୍ୟର ସବୁଠୁ ଗୁରୁତ୍ଵପୂର୍ଣ୍ଣ ସିଟ୍‌ କାରଣ ଆସାମର ମୁଖ୍ୟମନ୍ତ୍ରୀ ହିମନ୍ତ ବିଶ୍ଵଶର୍ମା ମୈଦାନରେ ଅଛନ୍ତି । ସିଏମ ହିମନ୍ତି ଏହି ଆସନରୁ ୫ ଥରର ବିଧାୟକ । ୨୦୦୧ରେ ସେ ପ୍ରଥମ ଥର ଲାଗି ଏହି ଆସନରୁ ନିର୍ବାଚନ ଜିତିଥିଲେ । ହିମନ୍ତଙ୍କୁ ଟକ୍କର ଦେବା ଲାଗି କଂଗ୍ରେସ ବିଦିଶା ନିୟୋଗଙ୍କୁ ମୈଦାନକୁ ପଠାଇଛି ଏବଂ ସେ ପ୍ରଥମ ଥର ଲାଗି ନିର୍ବାଚନ ଲଢୁଛନ୍ତି ।

• ଆଗରେ ଅଛନ୍ତି ହିମନ୍ତ

ପ୍ରଥମ ରାଉଣ୍ଡର ଗଣତିରେ ହିମନ୍ତ ବିଶ୍ଵଶର୍ମା ବହୁ ଆଗରେ ଅଛନ୍ତି । ଏହି ନିର୍ବାଚନ ମଣ୍ଡଳୀରେ ମୋଟ ୧୮ଟି ରାଉଣ୍ଡରେ ଭୋଟ ଗଣତି ହେଉଛି । ଅପରାହ୍ନ ୧ଟା ସୁଦ୍ଧା ୭ଟି ରାଉଣ୍ଡ ସରିଥିବାବେଳେ ହିମନ୍ତ ବିଶ୍ଵଶର୍ମା ୪୬,୭୩୭ଟି ଭୋଟ ପାଇଛନ୍ତି ଓ ୩୦,୧୫୯ ଭୋଟରେ ଆଗୁଆ ଅଛନ୍ତି । ତାଙ୍କର ନିକଟତମ ପ୍ରତିଦ୍ଵନ୍ଦ୍ଵୀ କଂଗ୍ରେସର ବିଦିଶା ନିୟୋଗଙ୍କୁ ମିଳିଛି ୧୬,୫୭୮ ଖଣ୍ଡ ଭୋଟ୍ । ସେହିପରି ତୃତୀୟରେ ଅଛନ୍ତି ସ୍ଵାଧୀନ ପ୍ରାର୍ଥିନୀ ଦିପିକା ଦାସ, ଯାହାଙ୍କୁ ମାତ୍ର ୯୦୯ ଖଣ୍ଡ ଭୋଟ ମିଳିଛି । ସେ ହିମନ୍ତ ବିଶ୍ଵଶର୍ମାଙ୍କଠାରୁ ୪୫,୮୨୮ ଖଣ୍ଡ ଭୋଟ ପଛରେ ଅଛନ୍ତି । ନୋଟାକୁ ଯାଇଛି ୧୨୭୯ ଖଣ୍ଡ ଭୋଟ୍ ।

• ୨୦୨୧ ନିର୍ବାଚନ ଫଳ

ଜାଲୁକବାରି ବିଧାନସଭା ଆସନରେ ୨୦୨୧ ନିର୍ବାଚନ ସମୟରେ ଭାରତୀୟ ଜନତା ପାର୍ଟି ହିମନ୍ତ ବିଶ୍ଵଶର୍ମାଙ୍କୁ ପ୍ରାର୍ଥୀ କରିଥିଲା । ସେତେବେଳେ କଂଗ୍ରେସ ରୋମେନ ଚନ୍ଦ୍ର ବର୍ଥାକୁରଙ୍କୁ ପ୍ରାର୍ଥୀ କରିଥିଲା । ଏହି ନିର୍ବାଚନରେ ହିମନ୍ତ ବିଶ୍ଵଶର୍ମା ବମ୍ଫର ବିଜୟ ହାସଲ କରିଥିଲେ । ଏହି ନିର୍ବାଚନ ମଣ୍ଡଳୀରେ ହାରଜିତର ପ୍ରଭେଦ ୧,୦୧,୯୧୧ ଭୋଟ୍ ଥିଲା । ୨୦୨୧ ନିର୍ବାଚନରେ ହିମନ୍ତ ଏହି ଆସନରୁ ପଞ୍ଚମ ଥର ଲାଗି ବିଧାୟକ ହୋଇଥିବାବେଳେ ନିକଟତମ ପ୍ରତିଦ୍ଵନ୍ଦ୍ଵୀ କଂଗ୍ରେସର ରୋମେନ ଚନ୍ଦ୍ରଙ୍କୁ ହରାଇଥିଲେ । ଯଦି ଆମେ ୨୦୧୬ ନିର୍ବାଚନ କଥା କହିବା, ସେତେବେଳେ ଏହି ଆସନରେ ମୋଟ ମତଦାନ ୮୫ ପ୍ରତିଶତ ଥିବାବେଳେ ହିମନ୍ତ ବିଶ୍ଵଶର୍ମା ସେତେବେଳେ କଂଗ୍ରେସ ପ୍ରାର୍ଥୀ ନିରେନ ଡେକାଙ୍କୁ ୫୬ ପ୍ରତିଶତ ଭୋଟ୍ ବ୍ୟବଧାନରେ ପରାସ୍ତ କରି ବିଜୟ ହାସଲ କରିଥିଲେ ।

ପଢନ୍ତୁ ଏହି ଖବର: ଆସାମରେ ହ୍ୟାଟ୍ରିକ୍ ବିଜୟ ମାରିବ କି ବିଜେପି ? ପ୍ରାରମ୍ଭିକ ଟ୍ରେଣ୍ଡରେ ୯୯ ଆସନରେ ଆଗୁଆ

ତଳ ଆସାମରେ ଯାଉଥିବା ଜାଲୁକବାରି ବିଧାନସଭା ଆସନରୁ ସିଏମ ହିମନ୍ତ ୫ଥର ଲଗାତାର ନିର୍ବାଚନ ଜିତିସାରିଥିବାବେଳେ ଏଥର ଷଷ୍ଠ ଥର ପାଇଁ ବିଜୟ ହାସଲ କରିବାକୁ ଲକ୍ଷ୍ୟ ରଖିଛନ୍ତି । ହିମନ୍ତ କଂଗ୍ରେସରେ ଥିବାବେଳେ ପ୍ରଥମ ଥର ଲାଗି ୨୦୦୧ରେ ନିର୍ବାଚନ ଲଢିଥିଲେ । ୨୦୦୧, ୨୦୦୬ ଏବଂ ୨୦୧୧ ପର୍ଯ୍ୟନ୍ତ କଂଗ୍ରେସରୁ ଏବଂ ୨୦୧୬ ଓ ୨୦୨୧ରେ ବିଜେପିରୁ ଏଠାରୁ ଲଢିଥିଲେ । ୨୦୨୧ରେ ଏହି ଆସନରୁ ହିମନ୍ତ ୧ ଲକ୍ଷ ଅଧିକ ଭୋଟ ମାର୍ଜିନର ବିଜୟୀ ହୋଇଥିଲେ । ଏଥର ନିର୍ବାଚନରେ ହିମନ୍ତ ବିଶ୍ଵଶର୍ମାଙ୍କୁ କଂଗ୍ରେସରୁ ବିଦିଶା ନିୟୋଗ ଓ ସ୍ଵାଧୀନ ପ୍ରାର୍ଥୀ ଦିପିକା ଦାସ ଟକ୍କର ଦେଉଛନ୍ତି ।